كورنەكى سۋرەت. فوتو: QT

ءبىلىم جانە عىلىم ءمينيسترى اسحات ايماعامبەتوۆ عىلىمي كادرلاردى دايارلاۋدى جەتىلدىرۋ جانە اكادەميالىق ورتانى جاقسارتۋ تەتىگى جايلى ءوزىنىڭ facebook  جەلىسىندەگى رەسمي پاراعىندا جازبا جاريالادى.

ايماعامبەتوۆتىڭ ايتۋىنشا، جاڭا قادامداردىڭ كوبى مينيسترلىك جانىنداعى جاس عالىمدار كەڭەسىنىڭ ۇسىنىسى نەگىزىندە ازىرلەنگەن. سايكەسىنشە ديسسەرتاتسيانى قورعاۋ ءۇشىن قاجەتتى باسىلىمدارعا قويىلاتىن تالاپتاردى وزگەرتۋ بويىنشا ۆەدومستۆو بۇيرىعىنىڭ نوبايى دايىندالدى.

مينيسترلىكتىڭ №127 بۇيرىعىنا سايكەس، دوكتورانتقا قورعاۋعا جولداما الۋ ءۇشىن  مىندەتتى تۇردە جەتى ماقالا جاريالاۋ كەرەك، بۇل رەتتە ساپاسى بويىنشا ەرەكشە تالاپتار قويىلمايدى.

«بۇگىنگە دەيىن باستى نازار تەك ساندىق كورسەتكىشكە اۋدارىلىپ، ماقالالار ساپاسى كۇماندى جۋرنالداردا جاريالانا باستايدى. كەيىن عالىمدارىمىزدىڭ ماقالالارى حالىقارالىق بازالاردان شىعارىلعان بەلگىسىز ءبىر جۋرنالداردا باسىلىپ شىققاندا تاڭ قالىپ جاتامىز. البەتتە، قالىپتاسقان بۇل ءداستۇردى وزگەرتۋ كەرەك. ياعني، سۇرانىسقا يە ەمەس «ءالسىز» جۋرنالداردا ماقالالاردىڭ كوپ جاريالانۋىنا قاراعاندا، بەدەلدى جۋرنالداردا ساپالى جاريالانىمدار از شىققانى جاقسىراق دەپ انىق ايتۋعا بولادى»، – دەيدى ول.

سونىمەن قاتار ديسسەرتاتسيالىق كەڭەس تۋرالى ۇلگىلىك ەرەجەگە كەڭەس مۇشەلەرىنە قويىلاتىن تالاپتاردى ارتتىرۋ جونىندەگى جاڭا نورما ەنگىزىلەدى. كەڭەس مۇشەلەرىنىڭ كەمىندە 2/3 بولىگىندە حيرش يندەكسى مەن رەتسەنزيالاناتىن حالىقارالىق عىلىمي جۋرنالداردا كەمىندە ءۇش جاريالانىم بولۋى ءتيىس. الەۋمەتتىك-گۋمانيتارلىق باعىتتار ءۇشىن بۇل كورسەتكىشتەر تومەن بولادى.

سونداي-اق ماگيسترلىك جانە دوكتورلىق ديسسەرتاتسيا جەتەكشىلەرىنە قويىلاتىن تالاپ تا وزگەرەدى.

ايماعامبەتوۆ ءوز جازباسىندا «ماسەلەن، ەگەر بۇگىنگى تاڭدا دوكتورانتتان كۇشتى جۋرنالداردا جاريالانىم تالاپ ەتىلسە، وندا عىلىمي جەتەكشىنىڭ دە وسىنداي جاريالانىمى بولۋى ءتيىس. قازىرگى ۋاقىتتا ءىس جۇزىندە ءتيىستى تالاپتار جوق»، – دەيدى.

"The Qazaq Times"