Foto: https://finobzor.ru

Qazaqstan Reseydiñ Bayqoñırda «Bäyterek» ğarış zımıran keşenin qwru turalı wsınısın qoldadı. Bwl turalı Cifrlıq damu, innovaciya jäne aeroğarış önerkäsibi ministri Asqar Jwmağaliev mälim etti.

Bastapqıda jobanı «Angara» reseylik zımırannıñ negizinde iske asıru josparlanğan. «Angara» zımıranı uaqıtında dayın bolmağandıqtan, taraptar jobanı «Soyuz-5» zımıranı negizinde iske asıruğa kelisken. Jwmağalievtiñ aytuınşa, «Bäyterek» keşeninen pilotsız zımırandar wşırıladı. Mwnımen qatar, resmi ökil Qazaqstan Resey jäne Birikken Arab Ämirlikterimen «Gagarin startı» jobasın qolğa aldıq dep süyinşilep otır. Ministrdiñ aytuınşa, bwl joba «Bayqoñır» keşeni boyınşa strategiyalıq äriptestik pen ekijaqtı ıntımaqtastıqtı odan äri nığaytadı-mıs.

Resey zımıran-tasığıştı jäne onıñ qwramdas bölikterin tasımaldau qwraldarın qwrudı, ekpindetkiş bloktıñ, ğarış apparatınıñ jäne tehnikalıq keşenderdi qarjılandıradı. Al Qazaqstan «Zenit-M» ğarış zımıran keşeniniñ infraqwrılımın qayta jañart, starttıq jäne tehnikalıq keşenderdi paydalanu boyınşa kadrlıq dayarlaudıñ oqu-jattığu qwraldarın qwruı tiis. «Bäyterek» jobasın jüzege asıruğa Resey $916 mln, al Qazaqstan şamamen $233 mln böludi josparlap otır. Hattamanı Senat bekitkennen keyin Qazaqstan prezidenti qol qoyadı.

2013 jılı Qazaqstan men Resey Federaciyası arasında «Bayqoñır» ğarış aylağınan wşıru kezinde wşıru apparatınıñ bölşegi qwlaytın aymaq retinde Qazaqstan aumağınan jer uçaskesin beru turalı kelisimge qol qoyılğan bolatın.

2014 jılı jeltoqsanda Qazaqstan men Resey «Soltüstik traektoriya» dep atalatın «Bayqoñır» ğarış aylağınan wşıru kezinde tasımaldağış zımıran bölikteriniñ qwlau audanı retinde jer uçaskesin beru jäne paydalanu şarttarı turalı ükimetaralıq kelisimge qol qoyğan. Qwjatqa säykes Qazaqstan Reseyge jalpı audanı 63,2 mıñ ga bolatın N120 audanın böldi (onıñ işinde 22,52 mıñ ga Aqtöbe oblısında jäne 40,68 mıñ ga Qostanay oblısında). Atalğan audandardı paydalanğanı üşin tölem jılına $460 mıñ mölşerinde. «Soyuz» ülgisindegi tasımaldağış zımırandar sanına baylanıstı Aqtöbe men Qostanay oblıstarı arasındağı tölem tiisinşe $103 mıñ jäne $357 mıñ mölşerinde. «Soltüstik» traektoriyası boyınşa belgilengen qajetti audan 1994 jılğı 10 jeltoqsandağı «Bayqoñır» keşenin jalğa alu şartında közdelmegen. Sondıqtan da Qazaqstan arnayı tärtippen jıl sayın birneşe osınday sınaqtardıñ jürgiziluine rwqsat bergen.

2018 jılı Bayqoñır ğarış aylağında «Bäyterek» ĞZK qwru turalı 2004 jılğı 22 jeltoqsandağı Qazaqstan men Resey ükimetteri arasındağı kelisimge özgerister men tolıqtırular engizu turalı hattamağa qol qoyıldı.

Bayqoñır ğarış aylağı Reseyge 2050 jılğa deyin jalğa berilgen. Resey tarapı Qazaqstan halqınıñ qarsılığına qaramastan apatqa jii wşıraytın «Proton» zımırandarın wşıruın osı künge deyin jalğastırıp keledi.

"The Qazaq Times"