Jemqorlıq indeksi boyınşa Qazaqstan birşama joğarıladı. Foto: Transparency International (TI) halıqaralıq wyımınıñ resmi saytınan (transparency.org)

Transparency International (TI) halıqaralıq wyımınıñ 2019 jılğa arnalğan jemqorlıq boyınşa Qazaqstan 180 eldiñ işinde 113-orınğa jayğastı.

Qazaqstan 2018 jılmen salıstırğanda bıltır 11 satığa joğarılağan. Demek jemqorlıq edäuir azayğan nemese küres qarqın ala bastağan.

23 qañtarda jariyalanğan zertteude wyım ädettegidey  180 eldiñ memlekettik organdarındağı jemqorlıq jağdayına bağa berip, arnayı esebin tüzgen. Neğwrlım alğaşqı qatardan körinse, soğwrlım jemqorlıq qaupi azaya tüsedi. 100 ball eseptik körsetkişpen anıqtalatın jüyede ball sanı wlğayğan sayın onıñ jemqorlıqqa tözbeuşilik imuniteti de artadı.

Qazaqstan jemqorlıq indeksinde 2018 jılı 31 balmen 124-orında bolsa, 2019 jılı 34 balmen 113-orınğa köterildi. Reytingide Qazaqstanmen birge Nepal, Filippin, Zambiya, Sal'vador, Svazilend qatar twr.

Wyım esebinde «Joğarı deñgeydegi alayaqtıqtan bastap bilim beru, densaulıq saqtau siyaqtı qoğamdıq qızmetti paydalanuğa kedergi keltiretin wsaq paraqorlıq, azamattar jemqor basşılar men mekemelerden şarşadı. Bwl ükimetke senimsizdikti wlğaytıp, sayasi jetekşiler men saylanatın lauazımdı twlğalarğa senimdi joyadı» delingen.

Postkeñestik elder arasında Gruziya 44-orın, Belarus' 66-orınğa twraqtağan.  Al Ortalıq Aziyada eñ naşar körsetkiş - Türkimenstan (165-orın), Özbekstan (153-orın) jäne Täjikstanda (153-orın) bayqaladı.

Köş basındağı jäne eñ soñındağı elder körsetkişi. Foto: Transparency International (TI) halıqaralıq wyımınıñ resmi saytınan (transparency.org)

Jemqorlıqqa tözbeytin, korrupciyasız jüye qwra bilgen üştikke Daniya (87 ballmen 1-orın) men Jaña Zelandiya (87 ballmen 1-orın),  Finlyandiya (86 ballmen 2-orın) kirgen. Al jemqorlıq şırmauına tüsken eñ soñğı elder qatarında Siriya (13 ballmen 178-orın), Oñtüstik Sudan (12 ballmen 179-orın) jäne Somali (9 ballmen 180-orın) ataldı.

"The Qazaq Times"