Körneki suret. Foto: aşıq derekköz

Keşe astanalıq äkim orınbasarı men jañaözendik sud'ya para alğanı üşin 3 jılğa temir torğa qamalıp, qılmıstıq iske qatısı bar özge de ayıptaluşılarğa jaza tağayındaldı. Künbe-kün örşigen jemqorlıqtıñ «saldarımen küres» qaşanğı jalğaspaq? Sıbaylas jemqorlıqtı qabıldau indeksi boyınşa 124-şi orınğa jayğasqan Qazaqstanda qazına wrılarınıñ ülkeni şalqıp, wsağı oñay twtılıp jür.  

El astanasınıñ sıbaylas jemqorlıqqa qarsı qızmeti qalanıñ Almatı audanı äkiminiñ bwrınğı orınbasarı Talğat Tleuov pen «Layn Grupp» JŞS jäne «Aqjayıq Energo» JŞS direktorı B.Abdievke qatıstı sotqa deyingi tergeudi ayaqtağan. T.M. Tleuov Almatı audanın jarıqtandıruğa qızmet körsetu boyınşa Memlekettik satıp alu turalı şartta orındalğan jwmıstar aktilerine qol qoyğanı üşin, sonday-aq jalpı qamqorlığı üşin B.Abdievten 5 million teñge somasında para aldı degen küdikke ilingen.

Osı is boyınşa 17 qazan elordadağı Esil audanınıñ №2 audandıq sotınıñ ükimimen Talğat Tleuov para alğanı üşin kinäli dep tanılıp, oğan 3 jıl merzimge bas bostandığınan ayıru jäne memlekettik qızmette lauazımdı qızmetpen aynalısu qwqığınan ömir boyına ayıru jazası tağayındaldı. Osı ükimmen B.Abdiev para bergeni üşin sottaldı jäne oğan 71 million teñge köleminde ayıppwl salındı.

Däl osı taqilettes ayıppen Jañaözende qalalıq sottıñ sud'yası para alğanı üşin sottaldı. Vedomstvo mälimetinşe, Jañaözen qalalıq sotınıñ sud'yası Ayzada Seylhanovağa jäne qala äkimdiginiñ TKŞ bas mamanı A.Aqnazarovqa qatıstı sıbaylas jemqorlıq qılmıs jasadı degen küdik boyınşa sotqa deyingi tergeu ayaqtalıp sotqa joldanğan. Seylhanova Jañaözen qalalıq jer qatınastarı böliminiñ talap arızın qarausız qaldıru turalı ökim şığarğanı üşin Aqnazarov arqılı 500 mıñ teñge köleminde para aldı degen küdikke ilingen. Bwl faktini Antikorrupciyalıq qızmet işki qauipsizdik jäne Joğarğı Sottağı sıbaylas jemqorlıqtıñ aldın alu bölimimen birlesip anıqtağan desedi. Astanalıq şeneuniktiñ sotımen qatar jañaözendik sud'ya Seylhanova da Aqtau qalalıq sotınıñ ükimimen sottalıp, 3 jıl merzimge bas bostandığınan ayırıldı. İske qatısı bar degen ayıppen Aqnazarov ta sottalıp, oğan 1 jıl bas bostandığınan ayıru jazası belgilendi. Sot ükimine säykes sottalğandardıñ memlekettik qızmette lauazımdı qızmetpen aynalısuına ömir boyına tıyım salındı.

Bwl birinşi ret emes. Bizde keyde bir künde tap osı paraqorlıq qılmısı negizinde birneşe sot bolıp jatadı. Esteriñizge sala ketsek, biıl qañtarda jariyalanğan Transparency International wyımınıñ jemqorlıq indeksinde Qazaqstan 180 eldiñ işinde 124-orındı qanağat twtqan. Zertteuşi halıqaralıq wyımnıñ atqaruşı direktorı Ol'ga Şiyannıñ sözinşe, TI esebinde Qazaqstan qarjı ministrligi qwrılımın korrupciya jaylağanın, al işki ister ministrligi özine jüktelgen qızmet mindetin atqaruğa «därmensiz» organğa aynalğanın atap körsetken.

Transparency International «Qazirgi kezde Reseyden bastap Äzerbayjanğa deyin, Ukrainadan bastap Özbekstanğa deyin köptegen elderde köbine avtoritarlıq basqaru kesirinen demokratiyalıq instituttar men normalarğa qater tönip twr. Demokratiyası älsiz qoğamda korrupciya örşidi. Memlekettik sektordağı korrupciyamen küreste sayasi erik-jigerdiñ joqtığı azamattardıñ sayasi qwqıqtarın bwzadı, sonıñ kesirinen adamdar keyin äseri qalay boladı dep alañdap, oy-pikirin aşıq bildire almaydı, şeru ötkizu jäne birigu bostandıqtarın paydalana almaydı» degen wyım bayandamasında.

Bwqara ğana emes, prezidenttiñ özi äşkere sınğa alğan atışulı «Astana LRT» jobasınıñ bwrınğı basqarma törağası Talğat Ardanğa halıqaralıq izdeu jariyalandı.

Qazaqstandağı Sıbaylas jemqorlıqqa qarsı twru sayasatı profilaktikadan bwrın, saldarğa basımdıq beretin siyaqtı. Sayasi şımıldıqtıñ arğı jağındağı qanday oyındar men jüristerdiñ nätijesinde közge tüsip jatqanı da sır. Nege wqsas ayıptarmen on jılğa sottalğan şendi üş jılğa jetpey bosap şığıp, nemese ministrliktegi qaysıbir memuar jazğış vice-ministr auır ayıptan jeñil qwtılıp, azamattıq qoğam men BWW, halıqaralıq qwqıqtıq wyımdar «sayasi naqaq twtqın» dep tanığan azamat densaulıq jağdayınıñ auırlığına qaramastan bosatılmaydı? Demek, bwdan biliktiñ müddelilik poziciyasın bayqauğa boladı.

"Ayran işkeni qwtılıp, şelek jalağanı twtıla qoyatın" sıbaylas jemqorlıqpen küres sayasatınıñ kurs-bağdarın özgertuge aqjağalılardıñ batılı bara qoyar ma eken?

"The Qazaq Times"