جەمقورلىق يندەكسى بويىنشا قازاقستان ءبىرشاما جوعارىلادى. فوتو: Transparency International (TI) حالىقارالىق ۇيىمىنىڭ رەسمي سايتىنان (transparency.org)

Transparency International (TI) حالىقارالىق ۇيىمىنىڭ 2019 جىلعا ارنالعان جەمقورلىق بويىنشا قازاقستان 180 ەلدىڭ ىشىندە 113-ورىنعا جايعاستى.

قازاقستان 2018 جىلمەن سالىستىرعاندا بىلتىر 11 ساتىعا جوعارىلاعان. دەمەك جەمقورلىق ەداۋىر ازايعان نەمەسە كۇرەس قارقىن الا باستاعان.

23 قاڭتاردا جاريالانعان زەرتتەۋدە ۇيىم ادەتتەگىدەي  180 ەلدىڭ مەملەكەتتىك ورگاندارىنداعى جەمقورلىق جاعدايىنا باعا بەرىپ، ارنايى ەسەبىن تۇزگەن. نەعۇرلىم العاشقى قاتاردان كورىنسە، سوعۇرلىم جەمقورلىق قاۋپى ازايا تۇسەدى. 100 بالل ەسەپتىك كورسەتكىشپەن انىقتالاتىن جۇيەدە بالل سانى ۇلعايعان سايىن ونىڭ جەمقورلىققا توزبەۋشىلىك يمۋنيتەتى دە ارتادى.

قازاقستان جەمقورلىق يندەكسىندە 2018 جىلى 31 بالمەن 124-ورىندا بولسا، 2019 جىلى 34 بالمەن 113-ورىنعا كوتەرىلدى. رەيتينگىدە قازاقستانمەن بىرگە نەپال، فيليپپين، زامبيا، سالۆادور، سۆازيلەند قاتار تۇر.

ۇيىم ەسەبىندە «جوعارى دەڭگەيدەگى الاياقتىقتان باستاپ ءبىلىم بەرۋ، دەنساۋلىق ساقتاۋ سياقتى قوعامدىق قىزمەتتى پايدالانۋعا كەدەرگى كەلتىرەتىن ۇساق پاراقورلىق، ازاماتتار جەمقور باسشىلار مەن مەكەمەلەردەن شارشادى. بۇل ۇكىمەتكە سەنىمسىزدىكتى ۇلعايتىپ، ساياسي جەتەكشىلەر مەن سايلاناتىن لاۋازىمدى تۇلعالارعا سەنىمدى جويادى» دەلىنگەن.

پوستكەڭەستىك ەلدەر اراسىندا گرۋزيا 44-ورىن، بەلارۋس 66-ورىنعا تۇراقتاعان.  ال ورتالىق ازيادا ەڭ ناشار كورسەتكىش - تۇركىمەنستان (165-ورىن), وزبەكستان (153-ورىن) جانە تاجىكستاندا (153-ورىن) بايقالادى.

كوش باسىنداعى جانە ەڭ سوڭىنداعى ەلدەر كورسەتكىشى. فوتو: Transparency International (TI) حالىقارالىق ۇيىمىنىڭ رەسمي سايتىنان (transparency.org)

جەمقورلىققا توزبەيتىن، كوررۋپتسياسىز جۇيە قۇرا بىلگەن ۇشتىككە دانيا (87 باللمەن 1-ورىن) مەن جاڭا زەلانديا (87 باللمەن 1-ورىن),  فينليانديا (86 باللمەن 2-ورىن) كىرگەن. ال جەمقورلىق شىرماۋىنا تۇسكەن ەڭ سوڭعى ەلدەر قاتارىندا سيريا (13 باللمەن 178-ورىن), وڭتۇستىك سۋدان (12 باللمەن 179-ورىن) جانە سومالي (9 باللمەن 180-ورىن) اتالدى.

"The Qazaq Times"