I.Imanbay: «Jas Alaş» gazetiniñ Dempartiyağa eş qatısı joq, bolmaydı da!

Qazaq baspasözindegi ornı bölek darındı jurnalisterdiñ wstahanasına aynalğan qara şañıraq basılımı, «Jas Alaş» gazetine bas redaktor bolıp kelgen jurnalist Inga Imanbay arnayı pikir bildirdi.

Bwğan deyin birneşe jıl boyı şığarmaşıl jurnalist, soñğı üş jıl boyı qiın jağdaydağı gazetti köterip, redaktorlıq qızmette bolğan Ruslan Erbota da jemisti eñbek etkenin habarlağan edik. Bwrınğı redaktor Ruslan Erbota keşe facebook jelisindegi jeke parağında «gazet tirajın qwlatpay wstauğa» tırısqanın, «sayttıñ kündik oqılımın on mıñnan asırğanın» eske alıp, pikir bildirgen bolatın:

«Gazettiñ endigi bağıtı, tağdırı qalay boların, jaña redaktorı «Jas Alaştıñ» dästürin saqtar-saqtamasın, listovkağa aynalar-aynalmasın nemese bir partiyanıñ qol şoqparı bolar-bolmasın jäne de basqaların endi akcioner biledi. Gazettiñ endigi bas redaktorı jäne sponsorı Inga Imanbay», – dedi ol.

Bwl turalı tosın şeşimge tañırqağan gazettiñ ekonomika böliminiñ jetekşisi Elnwr Baqıtqızı Azattıqqa bergen komentariyinde «Bwrınğı bas redaktor Ruslan Erbota gazetti öte qiın jağdayda aldı. Basılımnıñ qarjı jağdayı öte twraqsız boldı. Saytı mülde jwmıs istemeytin. Al qazir saytqa künine 10 mıñ oqırman kiredi. …Mwnday eñbekti elep-eskermey, adam siyaqtı şığarıp salmay, alğıs aytpay, tüsindirmey, kütpegen jerden basqa adamdı äkelip qoya salu bwl adamgerşilikke jatpaydı. Bwl wjımdı sıylamau, jüz jıldıq tarihı bar gazetti sıylamau» degen.

Tipti 18 mıñdıq tirajben taraytın gazet wjımı «kütpegen jerden gazettiñ bas redaktorın auıstırğan qwrıltayşılardıñ äreketine» qarsılıq retinde bügingi beysenbilik nömirin şığarudan bas tartqan.

Tüsten keyin jaña tağayındauğa qatıstı Inga Imanbay öziniñ facebook  jelisindegi jeke parağında «atap aytatın mäsele – «Jas Alaştıñ» Janbolat jäne basqa da azamattar qwrıp jatqan Demokratiyalıq partiyağa eş qatısı joq, bolmaydı da» jäne «gazet eşkimge de satılğan joq» dep kesip ayttı. Basılıp kele jatqanına endigi jılı ğasır tolatın «Jas Alaş» gazetiniñ jaña redaktorı Inga Imanbaydıñ jazbası:

Qadirli dostar!

«Jas Alaş» gazetine bas redaktor bolıp tağayındaldım.

Meniñ de jurnalistik jolım, qızmetim «Jas Alaştan» bastalıp, osı wyadan qanat qaqtım.
Meniñ aytatınım: «Jas Alaş» bwrınnan dästüri qalıptasqan, aqiqatşıl, şındıqtı jazatın, qaşan da halıq jağında bolğan abıroylı basılım. Ol jerge bas redaktor bolıp tağayındaluım – men üşin ülken jauapkerşilik äri sın. Endigi maqsatım – «Jas Alaştıñ» aqiqatşıl jolın jalğastıru, Altınbek Särsenbaywlı ağamızdıñ sayasi mwrasın qalıñ köpşilik arasında keñinen nasihattau jäne ol kisi armandağan ädiletti Qazaqstandı ornatuğa ülesimdi qosıp, basılımdı jaña deñgeyge köteru.
Internette körip otırmın – «gazet satılıptı-mıs, partiyalıq basılımğa aynaladı» degen alıpqaşpa äñgime jür. Birden aytayın: gazet eşkimge de satılğan joq. Meni bwl basılımğa şaqırğan «Jas Alaş» basşıları mwnı aşıq ayttı jäne bastı talaptarı –  gazetti eldegi eñ mıqtı täuelsiz aqparat qwralına aynaldıru. Gazettiñ redakciyalıq sayasatınıñ wstanımdarı küşeyedi, şındıq ta, aqiqat ta aytıladı. Saraptamalıq materialdardı, avtorlardıñ sanın köbeytemiz. «Jas Alaş» halıqtıñ ortasında jürgen, barlıq mañızdı qoğamdıq-sayasi, äleumettik mäselelerdi qozğaytın basılım retinde qaladı, mümkindiginşe, onı odan da biik beleske köteruge tırısamız!
Atap aytatın mäsele – «Jas Alaştıñ» Janbolat jäne basqa da azamattar qwrıp jatqan Demokratiyalıq partiyağa eş qatısı joq, bolmaydı da. «Jas Alaş» qaşan da halıqtıq, eldik basılım boldı, onı bir partiyanıñ ya qozğalıstıñ gazetine aynaldıruğa eşkim de jol bermeydi. «Jas Alaş» barlıq wyımdar men qozğalıstarğa, azamattarğa teñ qaraydı, birde-bir wyımnıñ soyılına aynalmaydı! Demokratiyalıq partiya onsız da aqparat keñistiginde belsendi, äleumettik jeliler, internet arqılı öz ideyaların taratıp keledi. «Jas Alaş» qaşan da aqparattı ob'ektivti türde berdi, sol joldan aynımaydı. Ol negizgi äri bastı mäsele deuge boladı.
Sonımen birge «Jas Alaştıñ» äleumettik jeli men internettegi belsendiligin arttıramız. Oğan qatıstı da birqatar ideyalar men jobalar bar. Bolaşaqta onıñ bärin qoğamnıñ nazarına wsına jatarmız.
«Jas Alaşta» qanday taqırıptar qozğalğanın qalaysız? Qanday avtorlardı körgiñiz keledi? Ideyalarıñız ben oylarıñız bolsa, jazıñızdar, bölisiñizder. Biz qaşan da qoğamğa aşıqpız.

"The Qazaq Times"