ي.يمانباي: «جاس الاش» گازەتىنىڭ دەمپارتياعا ەش قاتىسى جوق، بولمايدى دا!

قازاق باسپاسوزىندەگى ورنى بولەك دارىندى جۋرناليستەردىڭ ۇستاحاناسىنا اينالعان قارا شاڭىراق باسىلىمى، «جاس الاش» گازەتىنە باس رەداكتور بولىپ كەلگەن جۋرناليست ينگا يمانباي ارنايى پىكىر ءبىلدىردى.

بۇعان دەيىن بىرنەشە جىل بويى شىعارماشىل جۋرناليست، سوڭعى ءۇش جىل بويى قيىن جاعدايداعى گازەتتى كوتەرىپ، رەداكتورلىق قىزمەتتە بولعان رۋسلان ەربوتا دا جەمىستى ەڭبەك ەتكەنىن حابارلاعان ەدىك. بۇرىنعى رەداكتور رۋسلان ەربوتا كەشە facebook جەلىسىندەگى جەكە پاراعىندا «گازەت تيراجىن قۇلاتپاي ۇستاۋعا» تىرىسقانىن، «سايتتىڭ كۇندىك وقىلىمىن ون مىڭنان اسىرعانىن» ەسكە الىپ، پىكىر بىلدىرگەن بولاتىن:

«گازەتتىڭ ەندىگى باعىتى، تاعدىرى قالاي بولارىن، جاڭا رەداكتورى «جاس الاشتىڭ» ءداستۇرىن ساقتار-ساقتاماسىن، ليستوۆكاعا اينالار-اينالماسىن نەمەسە ءبىر پارتيانىڭ قول شوقپارى بولار-بولماسىن جانە دە باسقالارىن ەندى اكتسيونەر بىلەدى. گازەتتىڭ ەندىگى باس رەداكتورى جانە سپونسورى ينگا يمانباي»، – دەدى ول.

بۇل تۋرالى توسىن شەشىمگە تاڭىرقاعان گازەتتىڭ ەكونوميكا ءبولىمىنىڭ جەتەكشىسى ەلنۇر باقىتقىزى ازاتتىققا بەرگەن كومەنتاريىندە «بۇرىنعى باس رەداكتور رۋسلان ەربوتا گازەتتى وتە قيىن جاعدايدا الدى. باسىلىمنىڭ قارجى جاعدايى وتە تۇراقسىز بولدى. سايتى مۇلدە جۇمىس ىستەمەيتىن. ال قازىر سايتقا كۇنىنە 10 مىڭ وقىرمان كىرەدى. …مۇنداي ەڭبەكتى ەلەپ-ەسكەرمەي، ادام سياقتى شىعارىپ سالماي، العىس ايتپاي، تۇسىندىرمەي، كۇتپەگەن جەردەن باسقا ادامدى اكەلىپ قويا سالۋ بۇل ادامگەرشىلىككە جاتپايدى. بۇل ۇجىمدى سىيلاماۋ، ءجۇز جىلدىق تاريحى بار گازەتتى سىيلاماۋ» دەگەن.

ءتىپتى 18 مىڭدىق تيراجبەن تارايتىن گازەت ۇجىمى «كۇتپەگەن جەردەن گازەتتىڭ باس رەداكتورىن اۋىستىرعان قۇرىلتايشىلاردىڭ ارەكەتىنە» قارسىلىق رەتىندە بۇگىنگى بەيسەنبىلىك ءنومىرىن شىعارۋدان باس تارتقان.

تۇستەن كەيىن جاڭا تاعايىنداۋعا قاتىستى ينگا يمانباي ءوزىنىڭ facebook  جەلىسىندەگى جەكە پاراعىندا «اتاپ ايتاتىن ماسەلە – «جاس الاشتىڭ» جانبولات جانە باسقا دا ازاماتتار قۇرىپ جاتقان دەموكراتيالىق پارتياعا ەش قاتىسى جوق، بولمايدى دا» جانە «گازەت ەشكىمگە دە ساتىلعان جوق» دەپ كەسىپ ايتتى. باسىلىپ كەلە جاتقانىنا ەندىگى جىلى عاسىر تولاتىن «جاس الاش» گازەتىنىڭ جاڭا رەداكتورى ينگا يمانبايدىڭ جازباسى:

قادىرلى دوستار!

«جاس الاش» گازەتىنە باس رەداكتور بولىپ تاعايىندالدىم.

مەنىڭ دە جۋرناليستىك جولىم، قىزمەتىم «جاس الاشتان» باستالىپ، وسى ۇيادان قانات قاقتىم.
مەنىڭ ايتاتىنىم: «جاس الاش» بۇرىننان ءداستۇرى قالىپتاسقان، اقيقاتشىل، شىندىقتى جازاتىن، قاشان دا حالىق جاعىندا بولعان ابىرويلى باسىلىم. ول جەرگە باس رەداكتور بولىپ تاعايىندالۋىم – مەن ءۇشىن ۇلكەن جاۋاپكەرشىلىك ءارى سىن. ەندىگى ماقساتىم – «جاس الاشتىڭ» اقيقاتشىل جولىن جالعاستىرۋ، التىنبەك سارسەنبايۇلى اعامىزدىڭ ساياسي مۇراسىن قالىڭ كوپشىلىك اراسىندا كەڭىنەن ناسيحاتتاۋ جانە ول كىسى ارمانداعان ادىلەتتى قازاقستاندى ورناتۋعا ۇلەسىمدى قوسىپ، باسىلىمدى جاڭا دەڭگەيگە كوتەرۋ.
ينتەرنەتتە كورىپ وتىرمىن – «گازەت ساتىلىپتى-مىس، پارتيالىق باسىلىمعا اينالادى» دەگەن الىپقاشپا اڭگىمە ءجۇر. بىردەن ايتايىن: گازەت ەشكىمگە دە ساتىلعان جوق. مەنى بۇل باسىلىمعا شاقىرعان «جاس الاش» باسشىلارى مۇنى اشىق ايتتى جانە باستى تالاپتارى –  گازەتتى ەلدەگى ەڭ مىقتى تاۋەلسىز اقپارات قۇرالىنا اينالدىرۋ. گازەتتىڭ رەداكتسيالىق ساياساتىنىڭ ۇستانىمدارى كۇشەيەدى، شىندىق تا، اقيقات تا ايتىلادى. ساراپتامالىق ماتەريالداردى، اۆتورلاردىڭ سانىن كوبەيتەمىز. «جاس الاش» حالىقتىڭ ورتاسىندا جۇرگەن، بارلىق ماڭىزدى قوعامدىق-ساياسي، الەۋمەتتىك ماسەلەلەردى قوزعايتىن باسىلىم رەتىندە قالادى، مۇمكىندىگىنشە، ونى ودان دا بيىك بەلەسكە كوتەرۋگە تىرىسامىز!
اتاپ ايتاتىن ماسەلە – «جاس الاشتىڭ» جانبولات جانە باسقا دا ازاماتتار قۇرىپ جاتقان دەموكراتيالىق پارتياعا ەش قاتىسى جوق، بولمايدى دا. «جاس الاش» قاشان دا حالىقتىق، ەلدىك باسىلىم بولدى، ونى ءبىر پارتيانىڭ يا قوزعالىستىڭ گازەتىنە اينالدىرۋعا ەشكىم دە جول بەرمەيدى. «جاس الاش» بارلىق ۇيىمدار مەن قوزعالىستارعا، ازاماتتارعا تەڭ قارايدى، بىردە-ءبىر ۇيىمنىڭ سويىلىنا اينالمايدى! دەموكراتيالىق پارتيا ونسىز دا اقپارات كەڭىستىگىندە بەلسەندى، الەۋمەتتىك جەلىلەر، ينتەرنەت ارقىلى ءوز يدەيالارىن تاراتىپ كەلەدى. «جاس الاش» قاشان دا اقپاراتتى وبەكتيۆتى تۇردە بەردى، سول جولدان اينىمايدى. ول نەگىزگى ءارى باستى ماسەلە دەۋگە بولادى.
سونىمەن بىرگە «جاس الاشتىڭ» الەۋمەتتىك جەلى مەن ينتەرنەتتەگى بەلسەندىلىگىن ارتتىرامىز. وعان قاتىستى دا بىرقاتار يدەيالار مەن جوبالار بار. بولاشاقتا ونىڭ ءبارىن قوعامنىڭ نازارىنا ۇسىنا جاتارمىز.
«جاس الاشتا» قانداي تاقىرىپتار قوزعالعانىن قالايسىز؟ قانداي اۆتورلاردى كورگىڭىز كەلەدى؟ يدەيالارىڭىز بەن ويلارىڭىز بولسا، جازىڭىزدار، بولىسىڭىزدەر. ءبىز قاشان دا قوعامعا اشىقپىز.

"The Qazaq Times"