Almatıdağı belsendilerdi wstap jatqan policeyler. 16 jeltoqsan 2019 jıl. Foto: Azattıq / Petr Trocenko

Keşe, Täuelsizdik küni Almatı men elordada ötken sankciyalanbağan beybit şerude ondağan azamat wstalğan edi. Qazaqstan işki ister ministrligi baspasöz qızmetiniñ habarlauınşa, «bas prokuraturanıñ eskertuine qaramastan, keybir azamattar arandatuşılıqqa wşırap, zañsız akciyalarğa qatısqan». 

Vedomstvonıñ remi mälimdemesinde elordada «ondağan azamat Respublika dañğılı men Abay köşesiniñ qiılısında jinalıp, rwqsat etilmegen miting ötkizdi. Almatı qalasında osığan wqsas rwqsat etilmegen miting Qazaqstan Täuelsizdigi monumentiniñ janında ötti. Osılayşa, olar mereke küni azamattardıñ tınıştığı men demalısın bwzdı» delingen.

Qatısuşılar «bilik organdarınıñ zañsız äreketterdi toqtatu turalı talaptarın orındamağandıqtan», el astanasında 32 adam, Almatı qalasında 23 adam policiyağa jetkizilgen. Dese de oqiğa ornında bolğan özge aqparat qwraldarı men azamattıq wyımdardıñ, belsendilerdiñ sözinşe, bir Almatınıñ özinde «keminde 40-50 şaqtı» adamdı avtozakpen alıp ketken.

Ministrlik mälimdemesinde wstalğandarğa qatıstı qanday şara körilip jatqanı naqtı aşıp aytılmağan.

Astanadağı wstau-qamau operaciyası. 16 jeltoqsan 2019 jıl. Foto: Azattıq / Säniya Toyken

Täuelsizdik küni qarsañında äleumettik jelilerde eldiñ är aymağındağı belsendiler eş negizsiz wstalıp, bostandığı şektelgeni habarlandı. Qaharman qwqıq qorğau bastaması taratqan derek boyınşa, 16 jeltoqsanğa deyin 13 qala-eldi mekende 53 sayasi añdu oqiğası anıqtalğan. Onıñ 23-i 5-15 kün aralığındağı äkimşilik qamau jäne 3-eui äkimşilik ayıppwl salu deregimen tirkeldi.

Bwğan deyin Qazaqstan sotı tıyım salğan «Qazaqstannıñ demokratiyalıq partiyası» äleumettik jelilerde azamattardı 16 jeltoqsan iri megapolister men oblıs ortalıqtarınıñ negizgi alañına jalpıwlttıq şeruge şaqırğan edi. 1986 jılı jäne 2011 jılı bolğan qayğılı oqiğa küni eldegi «Oyan, Qazaqstan», «Qazaqstannıñ demokratiyalıq partiyası» jäne «Halıq qwrıltayı» azamattıq-sayasi qozğalıstarı da alañğa tağzım etuge şığatının habarlağan bolatın.

Ädette, Qazaqstan biligi rwqsat etilmegen miting-şerulerge qatısuşılardı jappay wstap, olardı «zañ şeñberinde» ärtürli jauapkerşilikke tartadı.

"The Qazaq Times"