كەشە، تاۋەلسىزدىك كۇنى الماتى مەن ەلوردادا وتكەن سانكتسيالانباعان بەيبىت شەرۋدە ونداعان ازامات ۇستالعان ەدى. قازاقستان ىشكى ىستەر مينيسترلىگى ءباسپاسوز قىزمەتىنىڭ حابارلاۋىنشا, «باس پروكۋراتۋرانىڭ ەسكەرتۋىنە قاراماستان، كەيبىر ازاماتتار ارانداتۋشىلىققا ۇشىراپ، زاڭسىز اكتسيالارعا قاتىسقان».
ۆەدومستۆونىڭ رەمي مالىمدەمەسىندە ەلوردادا «ونداعان ازامات رەسپۋبليكا داڭعىلى مەن اباي كوشەسىنىڭ قيىلىسىندا جينالىپ، رۇقسات ەتىلمەگەن ميتينگ وتكىزدى. الماتى قالاسىندا وسىعان ۇقساس رۇقسات ەتىلمەگەن ميتينگ قازاقستان تاۋەلسىزدىگى مونۋمەنتىنىڭ جانىندا ءوتتى. وسىلايشا، ولار مەرەكە كۇنى ازاماتتاردىڭ تىنىشتىعى مەن دەمالىسىن بۇزدى» دەلىنگەن.
قاتىسۋشىلار «بيلىك ورگاندارىنىڭ زاڭسىز ارەكەتتەردى توقتاتۋ تۋرالى تالاپتارىن ورىنداماعاندىقتان»، ەل استاناسىندا 32 ادام، الماتى قالاسىندا 23 ادام پوليتسياعا جەتكىزىلگەن. دەسە دە وقيعا ورنىندا بولعان وزگە اقپارات قۇرالدارى مەن ازاماتتىق ۇيىمداردىڭ، بەلسەندىلەردىڭ سوزىنشە، ءبىر الماتىنىڭ وزىندە «كەمىندە 40-50 شاقتى» ادامدى اۆتوزاكپەن الىپ كەتكەن.
مينيسترلىك مالىمدەمەسىندە ۇستالعاندارعا قاتىستى قانداي شارا كورىلىپ جاتقانى ناقتى اشىپ ايتىلماعان.
استاناداعى ۇستاۋ-قاماۋ وپەراتسياسى. 16 جەلتوقسان 2019 جىل. فوتو: ازاتتىق / ءسانيا تويكەن
تاۋەلسىزدىك كۇنى قارساڭىندا الەۋمەتتىك جەلىلەردە ەلدىڭ ءار ايماعىنداعى بەلسەندىلەر ەش نەگىزسىز ۇستالىپ، بوستاندىعى شەكتەلگەنى حابارلاندى. Qaharman قۇقىق قورعاۋ باستاماسى تاراتقان دەرەك بويىنشا, 16 جەلتوقسانعا دەيىن 13 قالا-ەلدى مەكەندە 53 ساياسي اڭدۋ وقيعاسى انىقتالعان. ونىڭ 23-ءى 5-15 كۇن ارالىعىنداعى اكىمشىلىك قاماۋ جانە 3-ەۋى اكىمشىلىك ايىپپۇل سالۋ دەرەگىمەن تىركەلدى.
بۇعان دەيىن قازاقستان سوتى تىيىم سالعان «قازاقستاننىڭ دەموكراتيالىق پارتياسى» الەۋمەتتىك جەلىلەردە ازاماتتاردى 16 جەلتوقسان ءىرى مەگاپوليستەر مەن وبلىس ورتالىقتارىنىڭ نەگىزگى الاڭىنا جالپىۇلتتىق شەرۋگە شاقىرعان ەدى. 1986 جىلى جانە 2011 جىلى بولعان قايعىلى وقيعا كۇنى ەلدەگى «ويان، قازاقستان»، «قازاقستاننىڭ دەموكراتيالىق پارتياسى» جانە «حالىق قۇرىلتايى» ازاماتتىق-ساياسي قوزعالىستارى دا الاڭعا تاعزىم ەتۋگە شىعاتىنىن حابارلاعان بولاتىن.
ادەتتە، قازاقستان بيلىگى رۇقسات ەتىلمەگەن ميتينگ-شەرۋلەرگە قاتىسۋشىلاردى جاپپاي ۇستاپ، ولاردى «زاڭ شەڭبەرىندە» ءارتۇرلى جاۋاپكەرشىلىككە تارتادى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟