Jauınger boksşılardı marapattau säti. Foto: mod.gov.kz

Qazaqstannıñ Qarulı Küşterinde Qwrlıq äskerleriniñ bokstan IV aşıq turniri ayaqtaldı. Osığan oray, Qazaqstannıñ Qarulı Küşterinde äskeri qızmetşi boksşılar marapattaldı. Qazaqstan armiyasınıñ 25 jıldığına arnalğan sayısta üzdik bılğarı qolğap şeberi atağına segiz salmaq boyınşa şamamen 70 äskeri qızmetşi baq sınastı. Doda halıqaralıq boks federaciyasınıñ AIBA halıqaralıq erejeleri boyınşa ötkizildi. Bwl turalı vedomstvonıñ resmi saytı habaraladı.

Boksşılar 56, 60, 64, 69, 75, 81, 91 kelige deyin jäne 91 keliden joğarı salmaqta ärqaysısında 10 äskeri qızmetşiden qwralğan komanda qwramında öner körsetti. Sayıs barısında sportşılar arasında ımırasız bäseke boldı. Bwl jarısta eñ mıqtılar äri jaqsı dayındalğandar anıqtaldı. Jekpe-jekti baqılap otırğan bokstan Olimpiada oyındarınıñ çempionı Baqtiyar Artaev Qazaqstan Qarulı Küşteri äskeri qızmetşileriniñ dene dayarlığınıñ joğarı deñgeyin jäne jalpı Qazaqstan armiyasında bokstıñ damuın atap ötti. Nätijesinde, jalpı komandalıq esepte Desanttıq-şabuıldau äskerleriniñ komandası jeñimpaz atandı. «Şığıs» öñirlik qolbasşılığınıñ komandası ekinşi orındı enşilese, turnirge alğaş ret qatısqan QR Wlttıq wlanınıñ boksşıları üşinşi orındı mise twttı. Şeberliktiñ joğarı deñgeyin paş etken Qwrlıq äskerleriniñ Äskeri institutı men QR QM Kadet korpusınıñ komandaları üşin de bwl turnir alğaşqı boldı.

“The Qazaq Times”