«Keşikken jauap»: Almatı äkimdigi tilşi swrağına eki jarım aydan soñ jauap bergen

Azattıq tilşisi Almatı äkimi Baqıtjan Sağıntaevqa qoyğan swrağına 2,5 aydan soñ jauap aldı.

Tamızdıñ soñında qala äkimimen ötken qoğamdıq jiında Azattıq jurnalisi Manas Qayırtaywlı aşıq mikrofonda «policiya «Oyan, Qazaqstan» azamattıq wyımınıñ belsendilerin üyinen äketip jatqandığı» turalı saual joldağan bolatın. Şahar basşısı Sağıntaev swraq qoyğan tilşige män bermesten «jaqsı, boldı ma?» dep, nazar audarmağan sıñay tanıtqan. Jiın soñında jurnalistiñ qaytalap swrauına «sosın, sosın» degen edi. Konstituciya küni qarsañında oyanqazaqstandıq jastar jariyalağan beybit şeruge qatıstı qwqıq qorğau organdarı «tüsindiru jwmısın» ärtürli jağdayda jürgizgeni esimizde.

Bostandıq audanınıñ 700-ge tarta twrğınımen ötken kezdesude qala basşısı azamattardıñ sanına tañğalıp «mwnda Alatau audanına qarağanda swraq köp siyaqtı» dep ezu tartqan. 100-ge juıq azamattıñ saualın tapjılmay tıñdap, alğısın aytqan Sağıntaev Azattıq tilşisine läm-mim demedi.

Mine, arada 71 kün ötken soñ, 8 qaraşa mörlengen orıs tilindegi jauap hatı keñsege qaraşanıñ 14-i kelgen. Bir qızığı, memlekettik mekeme memlekettik tilde joldanğan saualğa orıs tilinde jauap bergen.

Äleumettik jelide jariyalanğan jauap hatta «Qwqıq qorğau organdarı «Oyan, Qazaqstan» belsendilerin istiñ zañdı-zañsızdığın anıqtau jäne dälelderdi tergeu maqsatında şaqıradı. Sonday-aq wstau üşin emes, zañdıq normalardı bwzbas üşin äñgimelesu-tüsindiru jwmısına şaqırıladı» delingen. Jauap hat Bostandıq audanı äkiminiñ apparat basşısı Batima Aliyarovanıñ atınan jazılğan.

Tilşi Manas Qayırtaywlına kelgen "äkimdiktiñ keşikken hatı". Foto: jurnalistiñ facebook paraqşasınan

Qazaqstandağı BAQ men mekemeler arasındağı kommunikaciyalıq qatınas tärtibi boyınşa, jauapker tarap wzaq degende 15 kün işinde jauap berui tiis. 1999 jılı 23 şildede qabıldanğan «Bwqaralıq aqparat qwraldarı turalı» №451 zañınıñ 2017 jılğı 28 jetoqsandağı jaña redakciyasına säykes,  4-tarauındağı («Bwqaralıq aqparat qwraldarınıñ azamattarmen jäne wyımdarmen qatınası») 18-baptıñ («Resmi habarlar» turalı) 3-tarmağında körsetilgendey BAQ swrauın jauap beruşi tarap (mekeme, wyım...) tirkelgen künnen bastap eki jwmıs küninen keşiktirmey jauap beruge mindetti. Al jauap beruge qosımşa zerdeleu-tekseru jwmıstarı qajet bolğan jağdayda «qarau merzimin aqparat ielenuşiniñ basşısı küntizbelik on bes künnen aspaytın merzimge bir märte wzartuı mümkin». Zañ osılay degenimen, köz aldımızdağı jağday basqaşa. Wzağanda 15 kündi közdeytin zañ eleusiz qalıp, Arıstı qalpına keltirer uaqıtta jauap hat keldi.

Qwqıq qorğauşılar «äkimdiktiñ keşikken hatına» baylanıstı zañda körsetilgen merzimnen keşiktiru, qazaq tilinde joldanğan saualğa orısşa jauap beru – zañ bwzuşılıq ekenin aytadı.

Mwnday jağday otandıq BAQ-tıñ kündelikti qızmetine tän dünie. Qwqıqtıq talabı zor äri azamattıq wstanımına berik äriptester (jurnalister) osı tärizdi «aqjağalılardıñ enjarlığınan» äbden qajığanın aytadı. Ädette Qazaqstandağı täuelsiz BAQ ärdayım beyresmi jäne resmi kedergilerge wşırap otıradı. Bizde BAQ qwqıqtarın qamtamasız etetin mindettemeler öte bayau jüretini jasırın emes.

"The Qazaq Times"