ازاتتىق ءتىلشىسى الماتى اكىمى باقىتجان ساعىنتاەۆقا قويعان سۇراعىنا 2,5 ايدان سوڭ جاۋاپ الدى.

تامىزدىڭ سوڭىندا قالا اكىمىمەن وتكەن قوعامدىق جيىندا ازاتتىق ءجۋرناليسى ماناس قايىرتايۇلى اشىق ميكروفوندا «پوليتسيا «ويان، قازاقستان» ازاماتتىق ۇيىمىنىڭ بەلسەندىلەرىن ۇيىنەن اكەتىپ جاتقاندىعى» تۋرالى ساۋال جولداعان بولاتىن. شاھار باسشىسى ساعىنتاەۆ سۇراق قويعان تىلشىگە ءمان بەرمەستەن «جاقسى، بولدى ما؟» دەپ، نازار اۋدارماعان سىڭاي تانىتقان. جيىن سوڭىندا ءجۋرناليستىڭ قايتالاپ سۇراۋىنا «سوسىن، سوسىن» دەگەن ەدى. كونستيتۋتسيا كۇنى قارساڭىندا ويانقازاقستاندىق جاستار جاريالاعان بەيبىت شەرۋگە قاتىستى قۇقىق قورعاۋ ورگاندارى «ءتۇسىندىرۋ جۇمىسىن» ءارتۇرلى جاعدايدا جۇرگىزگەنى ەسىمىزدە.

بوستاندىق اۋدانىنىڭ 700-گە تارتا تۇرعىنىمەن وتكەن كەزدەسۋدە قالا باسشىسى ازاماتتاردىڭ سانىنا تاڭعالىپ «مۇندا الاتاۋ اۋدانىنا قاراعاندا سۇراق كوپ سياقتى» دەپ ەزۋ تارتقان. 100-گە جۋىق ازاماتتىڭ ساۋالىن تاپجىلماي تىڭداپ، العىسىن ايتقان ساعىنتاەۆ ازاتتىق تىلشىسىنە ءلام-ميم دەمەدى.

مىنە، ارادا 71 كۇن وتكەن سوڭ، 8 قاراشا مورلەنگەن ورىس تىلىندەگى جاۋاپ حاتى كەڭسەگە قاراشانىڭ 14-ءى كەلگەن. ءبىر قىزىعى، مەملەكەتتىك مەكەمە مەملەكەتتىك تىلدە جولدانعان ساۋالعا ورىس تىلىندە جاۋاپ بەرگەن.

الەۋمەتتىك جەلىدە جاريالانعان جاۋاپ حاتتا «قۇقىق قورعاۋ ورگاندارى «ويان، قازاقستان» بەلسەندىلەرىن ءىستىڭ زاڭدى-زاڭسىزدىعىن انىقتاۋ جانە دالەلدەردى تەرگەۋ ماقساتىندا شاقىرادى. سونداي-اق ۇستاۋ ءۇشىن ەمەس، زاڭدىق نورمالاردى بۇزباس ءۇشىن اڭگىمەلەسۋ-ءتۇسىندىرۋ جۇمىسىنا شاقىرىلادى» دەلىنگەن. جاۋاپ حات بوستاندىق اۋدانى اكىمىنىڭ اپپارات باسشىسى باتيما الياروۆانىڭ اتىنان جازىلعان.

ءتىلشى ماناس قايىرتايۇلىنا كەلگەن "اكىمدىكتىڭ كەشىككەن حاتى". فوتو: ءجۋرناليستىڭ facebook پاراقشاسىنان

قازاقستانداعى باق مەن مەكەمەلەر اراسىنداعى كوممۋنيكاتسيالىق قاتىناس ءتارتىبى بويىنشا، جاۋاپكەر تاراپ ۇزاق دەگەندە 15 كۇن ىشىندە جاۋاپ بەرۋى ءتيىس. 1999 جىلى 23 شىلدەدە قابىلدانعان «بۇقارالىق اقپارات قۇرالدارى تۋرالى» №451 زاڭىنىڭ 2017 جىلعى 28 جەتوقسانداعى جاڭا رەداكتسياسىنا سايكەس،  4-تاراۋىنداعى («بۇقارالىق اقپارات قۇرالدارىنىڭ ازاماتتارمەن جانە ۇيىمدارمەن قاتىناسى») 18-باپتىڭ («رەسمي حابارلار» تۋرالى) 3-تارماعىندا كورسەتىلگەندەي باق سۇراۋىن جاۋاپ بەرۋشى تاراپ (مەكەمە، ۇيىم...) تىركەلگەن كۇننەن باستاپ ەكى جۇمىس كۇنىنەن كەشىكتىرمەي جاۋاپ بەرۋگە مىندەتتى. ال جاۋاپ بەرۋگە قوسىمشا زەردەلەۋ-تەكسەرۋ جۇمىستارى قاجەت بولعان جاعدايدا «قاراۋ مەرزىمىن اقپارات يەلەنۋشىنىڭ باسشىسى كۇنتىزبەلىك ون بەس كۇننەن اسپايتىن مەرزىمگە ءبىر مارتە ۇزارتۋى مۇمكىن». زاڭ وسىلاي دەگەنىمەن، كوز الدىمىزداعى جاعداي باسقاشا. ۇزاعاندا 15 كۇندى كوزدەيتىن زاڭ ەلەۋسىز قالىپ، ارىستى قالپىنا كەلتىرەر ۋاقىتتا جاۋاپ حات كەلدى.

قۇقىق قورعاۋشىلار «اكىمدىكتىڭ كەشىككەن حاتىنا» بايلانىستى زاڭدا كورسەتىلگەن مەرزىمنەن كەشىكتىرۋ، قازاق تىلىندە جولدانعان ساۋالعا ورىسشا جاۋاپ بەرۋ – زاڭ بۇزۋشىلىق ەكەنىن ايتادى.

مۇنداي جاعداي وتاندىق باق-تىڭ كۇندەلىكتى قىزمەتىنە ءتان دۇنيە. قۇقىقتىق تالابى زور ءارى ازاماتتىق ۇستانىمىنا بەرىك ارىپتەستەر (جۋرناليستەر) وسى ءتارىزدى «اقجاعالىلاردىڭ ەنجارلىعىنان» ابدەن قاجىعانىن ايتادى. ادەتتە قازاقستانداعى تاۋەلسىز باق ءاردايىم بەيرەسمي جانە رەسمي كەدەرگىلەرگە ۇشىراپ وتىرادى. بىزدە باق قۇقىقتارىن قامتاماسىز ەتەتىن مىندەتتەمەلەر وتە باياۋ جۇرەتىنى جاسىرىن ەمەس.

;feature=emb_title

"The Qazaq Times"