Nazarbaevtıñ Putin men Zelenskiydi astanada kezdestiru josparı «sayasi emeuirin» be?

Qazaqstannıñ eks-prezidenti Nazarbaev Putin men Zelenskiy arasındağı mäselege ara ağayındıq tanıtıp, olardı astana törinde kezdestirmek oyın wsındı.  

Bügin Nazarbaev «Astana Klubı» sayasi forumınıñ besinşi otırısınıñ plenarlıq mäjilisinde:

– Resey men Ukrainanıñ arasındağı jağday, ärine, qınjıltadı. Olar bir-birine öte jaqın elder. Alayda bolar is boldı, boyauı siñdi.. İşki jäne sırtqı küşter aralasıp ketti. Qazir qarım-qatınastıñ ajırap ketkeni sonşalıq... Men özim Ukrainanı jaqsı bilemin, Reseydi odan da jaqsı bilemin. Alğaşqı künderden bastap-aq eki eldi tatulastıruğa tırısıp kelemin, – dedi.

Ol Minskte bas qosıp,osı mäselelerdi şeşuge tırısqanın ayttı. «Mäskeudiñ talabı men ötinişi – Ukrainanıñ şığısındağı azamattardı qorğau turalı zañ qabıldau edi. Ol azamattar – sondağı proceske qatısqandar, sottalğandar, tağı basqa... Ukraina Radası mwnday zañdı qabıldağanımen, ol orındalmay jata berdi. Zañ osı jıldıñ 31 jeltoqsanında küşin joyadı», – dedi Qauipsizdik keñesiniñ «ömir boyğı» törağası.

Sonımen qatar Nazarbaev keşe Putinmen bwl mäseleni arı qaray qalay şeşuge bolatını turalı söyleskenin söz etti:

– Qarım-qatınastıñ uşıqqanı sonşalıq, Ukraina Batıs pen AQŞ-qa appelyaciyamen şığıp otır. Meniñ oyımşa, Resey men Ukrainanıñ prezidentterin jeke kezdestiru kerek. Tek osılay ğana kelisuge boladı. Sebebi, eki el arasındağı naqtı jağday şeşiledi. Men osınday kezdesu mümkin dep oylaymın. Meniñşe, qazir osı kezdesudiñ däl säti tuıp twr. Birinşiden, Zelenskiy saylauda halıqtıñ qoldauına ie boldı. Duma da jaña prezidentti qoldaytın azamattardı sayladı. Ol osı mäseleni şeşe aladı. Qos tarap kelisse, bwl mäseleni alğa jıljıtu kerek, – dedi.

Sarapşı mamandar men azamattıq qoğam Nazarbaevtıñ Resey men Ukraina arasındağı şielenisti elordada şeşuge wmtılısın – onıñ Qazaqstan sırtqı sayasatınıñ tizginin qolında ekenin megzeu dep bağalaydı.

Resey men Ukraina basşıları. Foto: aşıq derekköz

"The Qazaq Times"