نازارباەۆتىڭ پۋتين مەن زەلەنسكيدى استانادا كەزدەستىرۋ جوسپارى «ساياسي ەمەۋىرىن» بە؟

قازاقستاننىڭ ەكس-پرەزيدەنتى نازارباەۆ پۋتين مەن زەلەنسكي اراسىنداعى ماسەلەگە ارا اعايىندىق تانىتىپ، ولاردى استانا تورىندە كەزدەستىرمەك ويىن ۇسىندى.  

بۇگىن نازارباەۆ «استانا كلۋبى» ساياسي فورۋمىنىڭ بەسىنشى وتىرىسىنىڭ پلەنارلىق ماجىلىسىندە:

– رەسەي مەن ۋكراينانىڭ اراسىنداعى جاعداي، ارينە، قىنجىلتادى. ولار ءبىر-بىرىنە وتە جاقىن ەلدەر. الايدا بولار ءىس بولدى، بوياۋى ءسىڭدى.. ىشكى جانە سىرتقى كۇشتەر ارالاسىپ كەتتى. قازىر قارىم-قاتىناستىڭ اجىراپ كەتكەنى سونشالىق... مەن ءوزىم ۋكراينانى جاقسى بىلەمىن، رەسەيدى ودان دا جاقسى بىلەمىن. العاشقى كۇندەردەن باستاپ-اق ەكى ەلدى تاتۋلاستىرۋعا تىرىسىپ كەلەمىن، – دەدى.

ول مينسكتە باس قوسىپ،وسى ماسەلەلەردى شەشۋگە تىرىسقانىن ايتتى. «ماسكەۋدىڭ تالابى مەن ءوتىنىشى – ۋكراينانىڭ شىعىسىنداعى ازاماتتاردى قورعاۋ تۋرالى زاڭ قابىلداۋ ەدى. ول ازاماتتار – سونداعى پروتسەسكە قاتىسقاندار، سوتتالعاندار، تاعى باسقا... ۋكراينا راداسى مۇنداي زاڭدى قابىلداعانىمەن، ول ورىندالماي جاتا بەردى. زاڭ وسى جىلدىڭ 31 جەلتوقسانىندا كۇشىن جويادى»، – دەدى قاۋىپسىزدىك كەڭەسىنىڭ «ءومىر بويعى» توراعاسى.

سونىمەن قاتار نازارباەۆ كەشە پۋتينمەن بۇل ماسەلەنى ارى قاراي قالاي شەشۋگە بولاتىنى تۋرالى سويلەسكەنىن ءسوز ەتتى:

– قارىم-قاتىناستىڭ ۋشىققانى سونشالىق، ۋكراينا باتىس پەن اقش-قا اپپەلياتسيامەن شىعىپ وتىر. مەنىڭ ويىمشا، رەسەي مەن ۋكراينانىڭ پرەزيدەنتتەرىن جەكە كەزدەستىرۋ كەرەك. تەك وسىلاي عانا كەلىسۋگە بولادى. سەبەبى، ەكى ەل اراسىنداعى ناقتى جاعداي شەشىلەدى. مەن وسىنداي كەزدەسۋ مۇمكىن دەپ ويلايمىن. مەنىڭشە، قازىر وسى كەزدەسۋدىڭ ءدال ءساتى تۋىپ تۇر. بىرىنشىدەن، زەلەنسكي سايلاۋدا حالىقتىڭ قولداۋىنا يە بولدى. دۋما دا جاڭا پرەزيدەنتتى قولدايتىن ازاماتتاردى سايلادى. ول وسى ماسەلەنى شەشە الادى. قوس تاراپ كەلىسسە، بۇل ماسەلەنى العا جىلجىتۋ كەرەك، – دەدى.

ساراپشى ماماندار مەن ازاماتتىق قوعام نازارباەۆتىڭ رەسەي مەن ۋكراينا اراسىنداعى شيەلەنىستى ەلوردادا شەشۋگە ۇمتىلىسىن – ونىڭ قازاقستان سىرتقى ساياساتىنىڭ تىزگىنىن قولىندا ەكەنىن مەگزەۋ دەپ باعالايدى.

رەسەي مەن ۋكراينا باسشىلارى. فوتو: اشىق دەرەككوز

"The Qazaq Times"