Täjikstan şekarasına şabuıl jasaldı. Foto: TASS.

Orta Aziya elderiniñ köpten beri oyğa bükken küdigi men alañdauşılığı aqırı şınğa aynalğanday. Täjikstan ükimeti el şekarasına özderin «Islam memleketi» dep atağan terrorlıq toptıñ şabuıl jasağanın mälimdedi.

Täjikstan resmileriniñ mälimdeuinşe, 6 qaraşa küni tañğı sağat 03:00 şamasında «IM» terrorlıq tobınıñ 20 sodırı şekara beketine şabuıl jasağan. Şekara küzeti jasaqtarı jäne policiyamen qaqtığıs kezinde terrorlıq toptıñ 15 adamı oqqa wşqan.

Alayda, qazirge deyin atalğan terrorlıq wyım bwl şabuılğa qatısı bar-joğı turalı mälimdeme taratqan joq. Täjik policiyası aymaqtağı joldardı jauıp tastadı. Bwl mañğa jaqın Özbekstan şekara küzeti de qatañ küzet rejimin ornatqan.

Qaqıtığıs ornınan tüsirilgen suret. Foto: ASIAPLUS/OFFICIAL

Täjiktiñ Qorğanıs ministrligi oqiğa ornınan küyip ketken adam mürdeleri men örtengen kölikterdiñ suretin jariya etken. Mälimetke qarağanda şabuıl jasalğan şekara beketi Täjikstannıñ ortalıq qalası Duşanbeden 60 şaqırım qaşıqtıqta. Şabuılğa qatısı bar degen 5 küdikti qamalğan.

Sol eldegi aqparat qwraldarınıñ habarlauınşa, bwl qarulı sodırlar el şekarasına 3 qaraşada Auğanstannıñ Qwndız (Kunduz) provinciyasınan ötip kelgen. Tağı bir nazar audaratın jayt – qarulı toptıñ şekarağa jasağan şabuılı Täjikstan men Özbekstan arasındağı şekara dauına baylanıstı kelisimge qol qoyğannan keyin bolıp otır.

Ayta keteyik, Irak pen Süriya jerinde jeñilis tapqan «IM» terrorlıq tobı sayasi twraqsızdıq küşeygen Auğanstan jerine jinala bastağan bolatın. Terrorlıq toptıñ bwl äreketi Ortalıq Aziya elderine jaña qauip jaratuı mümkin ekeni bwdan bwrın da aytılğan.

“The Qazaq Times”