تاجىكستان شەكاراسىنا شابۋىل جاسالدى. فوتو: TASS.

ورتا ازيا ەلدەرىنىڭ كوپتەن بەرى ويعا بۇككەن كۇدىگى مەن الاڭداۋشىلىعى اقىرى شىنعا اينالعانداي. تاجىكستان ۇكىمەتى ەل شەكاراسىنا وزدەرىن «يسلام مەملەكەتى» دەپ اتاعان تەررورلىق توپتىڭ شابۋىل جاساعانىن مالىمدەدى.

تاجىكستان رەسميلەرىنىڭ مالىمدەۋىنشە، 6 قاراشا كۇنى تاڭعى ساعات 03:00 شاماسىندا «يم» تەررورلىق توبىنىڭ 20 سودىرى شەكارا بەكەتىنە شابۋىل جاساعان. شەكارا كۇزەتى جاساقتارى جانە پوليتسيامەن قاقتىعىس كەزىندە تەررورلىق توپتىڭ 15 ادامى وققا ۇشقان.

الايدا، قازىرگە دەيىن اتالعان تەررورلىق ۇيىم بۇل شابۋىلعا قاتىسى بار-جوعى تۋرالى مالىمدەمە تاراتقان جوق. تاجىك پوليتسياسى ايماقتاعى جولداردى جاۋىپ تاستادى. بۇل ماڭعا جاقىن وزبەكستان شەكارا كۇزەتى دە قاتاڭ كۇزەت رەجيمىن ورناتقان.

قاقىتىعىس ورنىنان تۇسىرىلگەن سۋرەت. فوتو: ASIAPLUS/OFFICIAL

تاجىكتىڭ قورعانىس مينيسترلىگى وقيعا ورنىنان كۇيىپ كەتكەن ادام مۇردەلەرى مەن ورتەنگەن كولىكتەردىڭ سۋرەتىن جاريا ەتكەن. مالىمەتكە قاراعاندا شابۋىل جاسالعان شەكارا بەكەتى تاجىكستاننىڭ ورتالىق قالاسى دۋشانبەدەن 60 شاقىرىم قاشىقتىقتا. شابۋىلعا قاتىسى بار دەگەن 5 كۇدىكتى قامالعان.

سول ەلدەگى اقپارات قۇرالدارىنىڭ حابارلاۋىنشا، بۇل قارۋلى سودىرلار ەل شەكاراسىنا 3 قاراشادا اۋعانستاننىڭ قۇندىز (كۋندۋز) پروۆينتسياسىنان ءوتىپ كەلگەن. تاعى ءبىر نازار اۋداراتىن جايت – قارۋلى توپتىڭ شەكاراعا جاساعان شابۋىلى تاجىكستان مەن وزبەكستان اراسىنداعى شەكارا داۋىنا بايلانىستى كەلىسىمگە قول قويعاننان كەيىن بولىپ وتىر.

ايتا كەتەيىك، يراك پەن ءسۇريا جەرىندە جەڭىلىس تاپقان «يم» تەررورلىق توبى ساياسي تۇراقسىزدىق كۇشەيگەن اۋعانستان جەرىنە جينالا باستاعان بولاتىن. تەررورلىق توپتىڭ بۇل ارەكەتى ورتالىق ازيا ەلدەرىنە جاڭا قاۋىپ جاراتۋى مۇمكىن ەكەنى بۇدان بۇرىن دا ايتىلعان.

“The Qazaq Times”