«Oyan, Qazaqstan» azamattıq wyımınıñ belsendi müşesi Äsem Japişevadan 9 qaraşada astana men Almatıda «Respublika» qozğalısımen birigip  ötkizgeli jatqan «Sayasi reformalar men Parlamenttik respublika üşin» taqırıbındağı şerudiñ alğışarttarı men barısı jayında swrap bildik. Ol eşqanday bilik biigin közdemeytin, bar bolğanı demokratiyalı qoğam qwruğa tırısıp jürgen azamattıq belsendilerdiñ betalısı men olarğa qwzırlı organdar tarapınan jasalıp jatqan qısımdar turalı pikir bildirdi. 

— 9 qaraşağa josparlanğan beybit şerudiñ negizgi maqsattarı turalı aytsañız.

Şerudiñ maqsatı — sayasi reformalardıñ qajettiligin jariyalau. Eldi jäne ekonomikanı basqarudın prezidenttik modeli bir prezident pen Nwr Otan partiyasınıñ 28 jıldıq bilik monopoliyasınan keyin qwldırağanı anıq. Qoğam kedey köpşilikke jäne öte bay azşılıqqa bölinedi. Ekonomikalıq mümkindikter bilik basındağılarğa ğana qol jetimdi, al keñ tarağan sıbaylas jemqorlıq ömirdiñ barlıq salaların bwzadı. Qoğamnıñ bolaşaqqa degen senimi joq.
Bizdiñ äl-auqatımız, qauipsizdigimiz jäne bügingi küni jaqsı ömir süruimiz eldegi sayasi reformalarğa tikeley baylanıstı. Sondıqtan biz prezidenttik ökilettikterdi şekteudi jäne parlamenttik respublikağa köşudi däyekti türde jaqtadıq. Bwl bolaşaqtağı sayasi bäsekelestik, ädil sot, esep beretin ükimet jäne barşağa arnalğan ekonomikalıq mümkindikter siyaqtı oñ özgerister üşin eñ jaqsı sayasi alğışarttar.

— Şeru ötkizemiz degennen-aq seriktes «Respublika» qozğalısınıñ müşesi Bella Orınbetovanı astanalıq policiya şaqırtqanın, jauap alğanın bilemiz. Almatılıq wyımdastıruşılarğa qandayda bir şaqırtu ne eskertuler boldı ma? Qwqıq qorğau organdarı tarapınan qısım jasaldı ma?

Iä, Almatıdağı jäne basqa qalalardağı policiya departamentiniñ qızmetkerleri bizdiñ qozğalıstıñ müşelerine qısım körsetip jatır. Osı şerudiñ aldında Almatı qalasınıñ policiyası «Oyan, Qazaqstan» müşelerin bopsalauğa jäne psihologiyalıq qısım jasauğa tırıstı. Astanada da bizdiñ birqatar jaqtauşılarımız Policiya departamentine şaqırıldı. Odan basqa meni jäne basqa adamdardı tamızdağı şerudiñ aldında Almatı äkimşiligi Policiya departamentine şaqırıp, qısım körsetti.

— Mitingke qatıstı äkimdik, basqa qwzırlı organdar tarapınan rwqsat beretini nemese bermeytini jaylı habar berildi me?

Joq, «Oyan, Qazaqstan» eşqanday rwqsat swrağan joq, sebebi atazañımız boyınşa jäne Qazaqstan qol qoyğan BWW adamdar qwqıqtarı paktisi boyınşa rwqsat swrau zañsız, tek eskertu berilui tiis. Bizdiñ bir talabımız şeruler turalı zañdı konstituciyağa säykes özgertu.

— «Oyan, Qazaqstan» azamattıq wyımınıñ alğa qoyğan mwrattarı qanday? Basqa qozğalıstar siyaqtı partiya bolu josparda bar ma? Äzirge wyım qwramında kimder bar?

Bizdiñ negizgi maqsatımız — parlamenttik respublika jäne sayasi reformalar. Mwnıñ barlığı bizdiñ deklaraciyada körsetilgen. Partiya bolu qozğalıstıñ josparında joq, sebebi bizdiñ maqsat bilikke kelu emes, reformalar. Jüye özgergen kezde, partiya qwram nemese partiyağa kirem deuşi qozğalıs müşelerine, ärine, jol aşıq. Wyımnıñ qwramındağılar eldiñ bolaşağın özgertkisi keletin azamattar.

— Soñğı kezderi jiilegen är türli mitingter, sizder wyımdastırğan «Senbilik seruen» akciyaları, ötkendegi marş. Mwnıñ bäri neni añğartadı? Bilik aytqanday «jılımıq kezeñniñ» körinisi dep bağalauğa bola ma? Jalpı beybit şeruler halıqqa ne beredi, paydası bar ma?

Seruenderdiñ maqsatı Qazaqstannıñ erkin azamatı retinde qoğamdıq orındardı qayta "qaytarıp alu", qorıqpaytındığımızdı körsetu. Odan basqa, özara tanısıp, bilisu, aşıq dialog ornatu, pikir almasu. Beybit şerulerdiñ paydası zor. Aldımen, bizdiñ elde azamattardıñ bilikke narazılığın basqaşa jetkize almaydı, barlıq basqa joldardı şeneuikter zañdı bwrmalap, zañsız etti.

— Bolaşaqta «Respublika» qozğalısı partiyağa aynalıp jatsa, «Oyan, Qazaqstan»-dıqtar äriptesteriniñ jağına ötui mümkin be?

Joğarıda aytqanımday, bizdiñ qozğalıstıñ maqsatı bilikke kelu emes, reformalar. Öz basım, meni bilik qızıqtırmaydı.

— Äsem, soñğı swraq, azamattıq qoğam belsendisi retinde Qazaqstan jastarına, sonıñ işinde almatılıqtarğa qanday ündeu joldar ediñiz, elge aytarıñız bolsa, marhabat!

Jurnalist Baubek Sağındıq meni bir ret "jüregi mahabatqa tolı adam" dep atağan, sol sözderdi özimniñ wranıma aynaldırğanday boldım. Qazaqstan jastarına tileytinim, jürekteriñ mahabatqa tolı bolsın. Ol bolsa, qorqınışqa orın qalmaydı, jala jabuşılardıñ qara sözderi jürekke timeydi, zwlımdıq jolamaydı, al eñ bastısı — däl öziñiz sekildi senimdi seriktesterdi taba alasız. Biz qozğalısımızdıñ işinde az uaqıtta jäy dos emes, janwyağa aynalğanday boldıq. Täuelsiz bolu, jasırmaymın, öte qiın, sonday kezderde tek seriktester tüsne aladı, qolday aladı. Biz jüregimizdi mahabbatqa toltıruğa tırısamız - otanımızğa, janwyamızğa, dostarımızğa, özimizge. Basqa närselermen jwmısımız joq, şındıq bäribir jeñedi.
Sağan da tileytinim sol, qwrdas. Qorıqpa, jüregiñ mahabbatqa tolı bolsın, oyan!

Replika: Bügin azamattıq wyım öziniñ facebook jelisinde 9 qaraşa şeru ötkizu üşin äkimdikten rwqsat swramaytının äri bwl atazañ jäne BWW halıqaralıq kelisimder boyınşa zañdı ekenin habarlap, mälimdeme jariyaladı:

«Oyan, Qazaqstan» qozğalısı Almatıda bolatın mitingisine äkimdiktiñ rwqsatın swrağan joq, sonday-aq aldağı uaqıtta da swramaydı. Biz köpşilik aldında mälimdeme jasau arqılı barlığına eskerttik.

Beybit maqsatta jinalıp, öz qwqığımızdı paydalanu üşin bizge rwqsat kerek emes.

9 qaraşa küni sağat 14:00 - de Abay eskertkişiniñ janında, qozğalısımız wyımdastırıp otırğan parlamenttik respublika jäne sayasi reformalardı talap etuşi miting ötedi. Barşañızdı şaqıramız!

«Oyan, Qazaqstan» wyımınıñ 9 qaraşadağı şeruge qatıstı posteri. Foto: facebook-tağı wyım paraqşasınan

"The Qazaq Times"