«Oyan, Qazaqstan» ازاماتتىق ۇيىمىنىڭ بەلسەندى مۇشەسى اسەم جاپيشەۆادان 9 قاراشادا استانا مەن الماتىدا «رەسپۋبليكا» قوزعالىسىمەن بىرىگىپ  وتكىزگەلى جاتقان «ساياسي رەفورمالار مەن پارلامەنتتىك رەسپۋبليكا ءۇشىن» تاقىرىبىنداعى شەرۋدىڭ العىشارتتارى مەن بارىسى جايىندا سۇراپ بىلدىك. ول ەشقانداي بيلىك بيىگىن كوزدەمەيتىن، بار بولعانى دەموكراتيالى قوعام قۇرۋعا تىرىسىپ جۇرگەن ازاماتتىق بەلسەندىلەردىڭ بەتالىسى مەن ولارعا قۇزىرلى ورگاندار تاراپىنان جاسالىپ جاتقان قىسىمدار تۋرالى پىكىر ءبىلدىردى. 

— 9 قاراشاعا جوسپارلانعان بەيبىت شەرۋدىڭ نەگىزگى ماقساتتارى تۋرالى ايتساڭىز.

شەرۋدىڭ ماقساتى — ساياسي رەفورمالاردىڭ قاجەتتىلىگىن جاريالاۋ. ەلدى جانە ەكونوميكانى باسقارۋدىن پرەزيدەنتتىك مودەلى ءبىر پرەزيدەنت پەن نۇر وتان پارتياسىنىڭ 28 جىلدىق بيلىك مونوپولياسىنان كەيىن قۇلدىراعانى انىق. قوعام كەدەي كوپشىلىككە جانە وتە باي ازشىلىققا بولىنەدى. ەكونوميكالىق مۇمكىندىكتەر بيلىك باسىنداعىلارعا عانا قول جەتىمدى، ال كەڭ تاراعان سىبايلاس جەمقورلىق ءومىردىڭ بارلىق سالالارىن بۇزادى. قوعامنىڭ بولاشاققا دەگەن سەنىمى جوق.
ءبىزدىڭ ءال-اۋقاتىمىز، قاۋىپسىزدىگىمىز جانە بۇگىنگى كۇنى جاقسى ءومىر ءسۇرۋىمىز ەلدەگى ساياسي رەفورمالارعا تىكەلەي بايلانىستى. سوندىقتان ءبىز پرەزيدەنتتىك وكىلەتتىكتەردى شەكتەۋدى جانە پارلامەنتتىك رەسپۋبليكاعا كوشۋدى دايەكتى تۇردە جاقتادىق. بۇل بولاشاقتاعى ساياسي باسەكەلەستىك، ءادىل سوت، ەسەپ بەرەتىن ۇكىمەت جانە بارشاعا ارنالعان ەكونوميكالىق مۇمكىندىكتەر سياقتى وڭ وزگەرىستەر ءۇشىن ەڭ جاقسى ساياسي العىشارتتار.

— شەرۋ وتكىزەمىز دەگەننەن-اق سەرىكتەس «رەسپۋبليكا» قوزعالىسىنىڭ مۇشەسى بەللا ورىنبەتوۆانى استانالىق پوليتسيا شاقىرتقانىن، جاۋاپ العانىن بىلەمىز. الماتىلىق ۇيىمداستىرۋشىلارعا قاندايدا ءبىر شاقىرتۋ نە ەسكەرتۋلەر بولدى ما؟ قۇقىق قورعاۋ ورگاندارى تاراپىنان قىسىم جاسالدى ما؟

ءيا، الماتىداعى جانە باسقا قالالارداعى پوليتسيا دەپارتامەنتىنىڭ قىزمەتكەرلەرى ءبىزدىڭ قوزعالىستىڭ مۇشەلەرىنە قىسىم كورسەتىپ جاتىر. وسى شەرۋدىڭ الدىندا الماتى قالاسىنىڭ پوليتسياسى «Oyan, Qazaqstan» مۇشەلەرىن بوپسالاۋعا جانە پسيحولوگيالىق قىسىم جاساۋعا تىرىستى. استانادا دا ءبىزدىڭ بىرقاتار جاقتاۋشىلارىمىز پوليتسيا دەپارتامەنتىنە شاقىرىلدى. ودان باسقا مەنى جانە باسقا ادامداردى تامىزداعى شەرۋدىڭ الدىندا الماتى اكىمشىلىگى پوليتسيا دەپارتامەنتىنە شاقىرىپ، قىسىم كورسەتتى.

ميتينگكە قاتىستى اكىمدىك، باسقا قۇزىرلى ورگاندار تاراپىنان رۇقسات بەرەتىنى نەمەسە بەرمەيتىنى جايلى حابار بەرىلدى مە؟

جوق، «Oyan, Qazaqstan» ەشقانداي رۇقسات سۇراعان جوق, سەبەبى اتازاڭىمىز بويىنشا جانە قازاقستان قول قويعان بۇۇ ادامدار قۇقىقتارى پاكتىسى بويىنشا رۇقسات سۇراۋ زاڭسىز، تەك ەسكەرتۋ بەرىلۋى ءتيىس. ءبىزدىڭ ءبىر تالابىمىز شەرۋلەر تۋرالى زاڭدى كونستيتۋتسياعا سايكەس وزگەرتۋ.

— «Oyan, Qazaqstan» ازاماتتىق ۇيىمىنىڭ العا قويعان مۇراتتارى قانداي؟ باسقا قوزعالىستار سياقتى پارتيا بولۋ جوسپاردا بار ما؟ ازىرگە ۇيىم قۇرامىندا كىمدەر بار؟

ءبىزدىڭ نەگىزگى ماقساتىمىز — پارلامەنتتىك رەسپۋبليكا جانە ساياسي رەفورمالار. مۇنىڭ بارلىعى ءبىزدىڭ دەكلاراتسيادا كورسەتىلگەن. پارتيا بولۋ قوزعالىستىڭ جوسپارىندا جوق، سەبەبى ءبىزدىڭ ماقسات بيلىككە كەلۋ ەمەس، رەفورمالار. جۇيە وزگەرگەن كەزدە، پارتيا قۇرام نەمەسە پارتياعا كىرەم دەۋشى قوزعالىس مۇشەلەرىنە، ارينە، جول اشىق. ۇيىمنىڭ قۇرامىنداعىلار ەلدىڭ بولاشاعىن وزگەرتكىسى كەلەتىن ازاماتتار.

— سوڭعى كەزدەرى جيىلەگەن ءار ءتۇرلى ميتينگتەر، سىزدەر ۇيىمداستىرعان «سەنبىلىك سەرۋەن» اكتسيالارى، وتكەندەگى مارش. مۇنىڭ ءبارى نەنى اڭعارتادى؟ بيلىك ايتقانداي «جىلىمىق كەزەڭنىڭ» كورىنىسى دەپ باعالاۋعا بولا ما؟ جالپى بەيبىت شەرۋلەر حالىققا نە بەرەدى، پايداسى بار ما؟

سەرۋەندەردىڭ ماقساتى قازاقستاننىڭ ەركىن ازاماتى رەتىندە قوعامدىق ورىنداردى قايتا "قايتارىپ الۋ", قورىقپايتىندىعىمىزدى كورسەتۋ. ودان باسقا، ءوزارا تانىسىپ، ءبىلىسۋ، اشىق ديالوگ ورناتۋ، پىكىر الماسۋ. بەيبىت شەرۋلەردىڭ پايداسى زور. الدىمەن، ءبىزدىڭ ەلدە ازاماتتاردىڭ بيلىككە نارازىلىعىن باسقاشا جەتكىزە المايدى، بارلىق باسقا جولداردى شەنەۋىكتەر زاڭدى بۇرمالاپ، زاڭسىز ەتتى.

— بولاشاقتا «رەسپۋبليكا» قوزعالىسى پارتياعا اينالىپ جاتسا، «ويان، قازاقستان»-دىقتار ارىپتەستەرىنىڭ جاعىنا ءوتۋى مۇمكىن بە؟

جوعارىدا ايتقانىمداي، ءبىزدىڭ قوزعالىستىڭ ماقساتى بيلىككە كەلۋ ەمەس، رەفورمالار. ءوز باسىم، مەنى بيلىك قىزىقتىرمايدى.

— اسەم، سوڭعى سۇراق، ازاماتتىق قوعام بەلسەندىسى رەتىندە قازاقستان جاستارىنا، سونىڭ ىشىندە الماتىلىقتارعا قانداي ۇندەۋ جولدار ەدىڭىز، ەلگە ايتارىڭىز بولسا، مارحابات!

جۋرناليست باۋبەك ساعىندىق مەنى ءبىر رەت "جۇرەگى ماحاباتقا تولى ادام" دەپ اتاعان، سول سوزدەردى ءوزىمنىڭ ۇرانىما اينالدىرعانداي بولدىم. قازاقستان جاستارىنا تىلەيتىنىم، جۇرەكتەرىڭ ماحاباتقا تولى بولسىن. ول بولسا، قورقىنىشقا ورىن قالمايدى، جالا جابۋشىلاردىڭ قارا سوزدەرى جۇرەككە تيمەيدى، زۇلىمدىق جولامايدى، ال ەڭ باستىسى — ءدال ءوزىڭىز سەكىلدى سەنىمدى سەرىكتەستەردى تابا الاسىز. ءبىز قوزعالىسىمىزدىڭ ىشىندە از ۋاقىتتا ءجاي دوس ەمەس، جانۇياعا اينالعانداي بولدىق. تاۋەلسىز بولۋ، جاسىرمايمىن، وتە قيىن، سونداي كەزدەردە تەك سەرىكتەستەر تۇسنە الادى، قولداي الادى. ءبىز جۇرەگىمىزدى ماحابباتقا تولتىرۋعا تىرىسامىز - وتانىمىزعا، جانۇيامىزعا، دوستارىمىزعا، وزىمىزگە. باسقا نارسەلەرمەن جۇمىسىمىز جوق، شىندىق ءبارىبىر جەڭەدى.
ساعان دا تىلەيتىنىم سول، قۇرداس. قورىقپا، جۇرەگىڭ ماحابباتقا تولى بولسىن، ويان!

رەپليكا: بۇگىن ازاماتتىق ۇيىم ءوزىنىڭ facebook جەلىسىندە 9 قاراشا شەرۋ وتكىزۋ ءۇشىن اكىمدىكتەن رۇقسات سۇرامايتىنىن ءارى بۇل اتازاڭ جانە بۇۇ حالىقارالىق كەلىسىمدەر بويىنشا زاڭدى ەكەنىن حابارلاپ، مالىمدەمە جاريالادى:

«وyan, Qazaqstan» قوزعالىسى الماتىدا بولاتىن ميتينگىسىنە اكىمدىكتىڭ رۇقساتىن سۇراعان جوق، سونداي-اق الداعى ۋاقىتتا دا سۇرامايدى. ءبىز كوپشىلىك الدىندا مالىمدەمە جاساۋ ارقىلى بارلىعىنا ەسكەرتتىك.

بەيبىت ماقساتتا جينالىپ، ءوز قۇقىعىمىزدى پايدالانۋ ءۇشىن بىزگە رۇقسات كەرەك ەمەس.

9 قاراشا كۇنى ساعات 14:00 - دە اباي ەسكەرتكىشىنىڭ جانىندا، قوزعالىسىمىز ۇيىمداستىرىپ وتىرعان پارلامەنتتىك رەسپۋبليكا جانە ساياسي رەفورمالاردى تالاپ ەتۋشى ميتينگ وتەدى. بارشاڭىزدى شاقىرامىز!

«وyan, Qazaqstan» ۇيىمىنىڭ 9 قاراشاداعى شەرۋگە قاتىستى پوستەرى. فوتو: facebook-تاعى ۇيىم پاراقشاسىنان

"The Qazaq Times"