Qwrılısşılar mwnara üstinde twr. Foto: KTK

Amalı tausılğan eki qwrılısşı su mwnarasına şığıp, eñbekaqısınıñ üşten eki böligin öndirip aldı.  

Jambıl oblısında eñbekaqısın ala almağan jwmısşılar su mwnarasınıñ  üstine şığıp, «Bas merdiger mañday ter aqımızdı bermese, biikten, osı jerden sekiremiz» dep şağınğan.

Barlığı bes adam trotuar töseu üşin  2 million 180 mıñ teñgege tapsırıs alğan. Biraq jwmıs ayaqtaluğa taqağanda bas merdiger nätijege köñili tolmaytının aytıp, bärin bwzğızıp, qayta isteudi tapsırıptı. Aşınğan jwmısşılar käsipkerden osığan deyin tökken mañday teriniñ aqısın berudi talap etken. Merdiger kompaniya oğan könbek tügili qwlaq türmegen. Amalı tausılağan bes azamattıñ ekeui biik su mwnarasına şığıp, talap qoyuğa mäjbür bolğan.

«Esep ayırıspasa, ölemiz!» degen ekeuin eşkim tömen tüsire almay äurege tüsti. Aradağı jeti sağattıq kelissözden keyin bas merdiger jwmısşılardıñ eñbekaqısınıñ bir böligin beruge kelisti. Naqtıraq aytqanda, swralğan 1 mln 300 mıñ teñgeniñ 800 mıñ teñgesi qolma-qol qaytarıldı. Sodan keyin şu kötergender jerge tüsti. Al käsipker jwmısşılardıñ bwl äreketin «bopsalau» dep bağalap otır. Onıñ aytuınşa, olar sapasız qwrılıs jürgizgen.

«Zañsız alıp twr, mwnı bopsalau dese de boladı. Bizge olardıñ istegen jwmıstarına qatıstı akt äli kelgen joq, endi keledi. Akt bolmağandıqtan, biz aqşanı töley almaymız. Jwmısşılar jwmıstı istegenimen, dwrıs atqarmağan. Sondıqtan tehqadağalau qabıldamay, bwzğızıp tastadı», – deydi bas merdiger Jwmağwl Baymenov.

Qazaqstanda eñbek dauı jii bolıp twradı. Mwnıñ sebebin mamandar eñbek kelisimşartın jasaspau, yağni azamattardıñ qwqıqtıq sauattılıqqa beyjay qarauı men käsipodaqtardıñ öz deñgeyinde jwmıs istey almauımen baylanıstıradı.

"The Qazaq Times"