Aqtöbede jalaqısın ösirudi talap etip twrğan avtobus jürgizuşileri men konduktorları. 12 aqpan 2021 jıl. Foto: Azarttıq radiosı / Jañagül Jürsin

12 aqpan jwma küni Kentau qalasında käsiporın jwmısşıları men Aqtöbede qoğamdıq kölik jürgizuşileri ereuilge şıqtı.

Türkistan oblısı Kentau qalasındağı transformator zauıtınıñ ondağan jwmısşısı jalaqını köterudi talap etip, narazılıq jiın ötkizgen. Mwnı zauıt basşılığı Azattıqqa rastağan.

Aqparat qwralı jwmısşılardıñ prezident Toqaevqa video ündeu joldağanın habarladı. Olar eñbekaqını ösirudi talap etken. Tüske deyin jalğasqan ereuilge qatısuşınıñ biri «käsiporın basşılığı qañtar ayında keybir jwmısşılardıñ jalaqısın 60 mıñ teñgege deyin kemitip jibergen, bwğan basqaları narazılıq bildirdi» degen.

Kentau transformator zauıtınıñ direktorı Hayrolla Qojabaevtıñ Azattıqqa aytuınşa, jalaqı jwmıstıñ auırlığı men uaqıtına qaray belgilenedi. Jwmısşılardıñ ortaşa jalaqı – 156 mıñ teñge. Ereuilge 120 mıñ teñge jalaqı alatın jwmısşılar şıqqan.

Mıñnan astam jwmısşısı bar zauıt bastığı Qojabaev «Tüske deyin jwmısşılarmen söylesip aylıq jalaqıların 150 mıñ teñgege köteruge şeşim şığardıq» dep mälimdegen.

Kentau transformator zauıtı jwmısşılarınıñ ereuili. Türkistan oblısı, 12 aqpan 2021 jıl. Foto: Azattıq radiosına joldanğan videodan skrin-qiındı

Däl osığan wqsas eñbek dauımen Aqtöbede «Jolauşılar avtokölik käsipornınıñ» jüzge juıq jürgizuşisi bügin qarsılıq akciyasın ötkizgen. Qala men mañayında 19 bağıt boyınşa jolauşı tasımaldaytın jürgizuşiler jalaqını 200 mıñ teñgege deyin ösirudi, eñbek jağdayın jaqsartudı talap etti. Jwmısşılar narazılığınıñ saldarınan mıñdağan jolauşı mejeli jerine der kezinde jete almay äbigerlengen.

Äytpegende jwmısqa şıqpaytının jetkizgen jürgizuşilerdiñ mwñın Azattıq tıñdağan. Narazılardıñ biri Bekzat Ayazbaev käsiporın basşılığınan «aptasına 400 mıñ teñgeden astam plan ötkizse de, nelikten aylığı 32 mıñ ekenin, jartı jıldan beri zeynetaqı men medicinalıq saqtandıruğa jarna tüspegenin» swradı. Jwmısşılardıñ sözinşe, eñbek mäselesi şaş etekten. Jalaqı uaqıtılı berilmeydi, kölik bwzılsa jwmısşı şığındaladı, jospar negizsiz köbeytildi, zeynetaqı audarımı tölenbeydi, konduktordı jürgizuşi jaldaydı degen jwrt qapalı.

Kompaniya direktorınıñ mindetin atqaruşı Esbol Sataev bwl mäselege memleketten subsidiya men kompensaciya tölenbeui sebep deydi. Tañğı beste bastalğan ereuilge sağat 9-dar kezinde kelgen Aqtöbe qalasınıñ äkimi Ashat Şaharov «mäseleni şeşemin» dep uäde berdi. Biraq qalay şeşetinin aytpadı.

Qazaqstanda äleumettik jäne eñbek sayasatı jetilmegendikten, eldiñ är aymağında türli saladağı mamandar jii narazılıqqa şığıp, lajsız prezident atına ündeu jasap jatadı. Juırda ğana Şımkentte Shymkent bus,  Aqtöbede «Sağız Petroluem», «KMK Mwnay» men «AMK Mwnay» kompaniyalarınıñ jwmısşıları ereuildetken. Bwğan deyin Qazaqstannıñ jaña tarihında biliktiñ öz azamattarına oq atuımen ayaqtalğan 2011 jılğı Jañaözen qandı oqiğası da eñbek dauınan bastalğan edi.

"The Qazaq Times"