ەڭبەك داۋىنىڭ سۋيتسيدتىك شەشىمى: ەكى قۇرىلىسشى مۇنارادان سەكىرمەك بولدى

امالى تاۋسىلعان ەكى قۇرىلىسشى سۋ مۇناراسىنا شىعىپ، ەڭبەكاقىسىنىڭ ۇشتەن ەكى بولىگىن ءوندىرىپ الدى.  

جامبىل وبلىسىندا ەڭبەكاقىسىن الا الماعان جۇمىسشىلار سۋ مۇناراسىنىڭ  ۇستىنە شىعىپ، «باس مەردىگەر ماڭداي تەر اقىمىزدى بەرمەسە، بيىكتەن، وسى جەردەن سەكىرەمىز» دەپ شاعىنعان.

بارلىعى بەس ادام تروتۋار توسەۋ ءۇشىن  2 ميلليون 180 مىڭ تەڭگەگە تاپسىرىس العان. بىراق جۇمىس اياقتالۋعا تاقاعاندا باس مەردىگەر ناتيجەگە كوڭىلى تولمايتىنىن ايتىپ، ءبارىن بۇزعىزىپ، قايتا ىستەۋدى تاپسىرىپتى. اشىنعان جۇمىسشىلار كاسىپكەردەن وسىعان دەيىن توككەن ماڭداي تەرىنىڭ اقىسىن بەرۋدى تالاپ ەتكەن. مەردىگەر كومپانيا وعان كونبەك تۇگىلى قۇلاق تۇرمەگەن. امالى تاۋسىلاعان بەس ازاماتتىڭ ەكەۋى بيىك سۋ مۇناراسىنا شىعىپ، تالاپ قويۋعا ءماجبۇر بولعان.

«ەسەپ ايىرىسپاسا، ولەمىز!» دەگەن ەكەۋىن ەشكىم تومەن تۇسىرە الماي اۋرەگە ءتۇستى. اراداعى جەتى ساعاتتىق كەلىسسوزدەن كەيىن باس مەردىگەر جۇمىسشىلاردىڭ ەڭبەكاقىسىنىڭ ءبىر بولىگىن بەرۋگە كەلىستى. ناقتىراق ايتقاندا، سۇرالعان 1 ملن 300 مىڭ تەڭگەنىڭ 800 مىڭ تەڭگەسى قولما-قول قايتارىلدى. سودان كەيىن شۋ كوتەرگەندەر جەرگە ءتۇستى. ال كاسىپكەر جۇمىسشىلاردىڭ بۇل ارەكەتىن «بوپسالاۋ» دەپ باعالاپ وتىر. ونىڭ ايتۋىنشا، ولار ساپاسىز قۇرىلىس جۇرگىزگەن.

«زاڭسىز الىپ تۇر، مۇنى بوپسالاۋ دەسە دە بولادى. بىزگە ولاردىڭ ىستەگەن جۇمىستارىنا قاتىستى اكت ءالى كەلگەن جوق، ەندى كەلەدى. اكت بولماعاندىقتان، ءبىز اقشانى تولەي المايمىز. جۇمىسشىلار جۇمىستى ىستەگەنىمەن، دۇرىس اتقارماعان. سوندىقتان تەحقاداعالاۋ قابىلداماي، بۇزعىزىپ تاستادى»، – دەيدى باس مەردىگەر جۇماعۇل بايمەنوۆ.

قازاقستاندا ەڭبەك داۋى ءجيى بولىپ تۇرادى. مۇنىڭ سەبەبىن ماماندار ەڭبەك كەلىسىمشارتىن جاساسپاۋ، ياعني ازاماتتاردىڭ قۇقىقتىق ساۋاتتىلىققا بەيجاي قاراۋى مەن كاسىپوداقتاردىڭ ءوز دەڭگەيىندە جۇمىس ىستەي الماۋىمەن بايلانىستىرادى.

"The Qazaq Times"