Miting qarsañında belsendilerge «qısım körsetilip», Bas prokuratura ündeu jasadı

QDT akciyaları qarsañında ädettegidey qwzırlı organdar azamattıq qoğam belsendilerin tüs-atın tügendep, eskertip, şaqırtıp ne habarlasıp, osı kezge deyingi täjiribe körsetkendey «kerek dep tapqan twsında» twtqındap, rwqsat etilmegen jiınnıñ bolmauına barınşa «eñbek etude». Küştik qwrılımdardıñ profilaktikasınan bölek Qazaqstannıñ Bas prokuraturası respublika jwrtşılığına «qatañ eskertu» häm «saqtandıru» jaylı ündeu-hatın joldadı.

Profilaktik policiya, pärmenşil prokuratura ündeu şaştı

QR Bas prokurorınıñ orınbasarı Bolat Dembaev Qazaqstanda ekstremistik dep tanılğan 20 jılğa sırttay sottalğan eks-bankir Mwhtar Äbilyazovtıñ jetekşiligindegi «Qazaqstannıñ demokratiyalıq tañdauı» beyresmi qozğalısınıñ halıqtı sankciyalanbağan kezekti qarsılıq akciyasına qatısuğa şaqıruına oray ündeu jariyaladı. Onda ekstremistik wyım batamaşıldıq etetin rwqsat etilmegen şeru «wyımdastıruşıları men qatısuşılarına zañmen belgilengen tärtipte qatañ şaralar qoldanatını» jaylı eskertilgen.

Bas Prokurornıñ orınbasarı B.Dembaevtıñ «Prokuratura turalı» Zañnıñ 31-babı tärtibindegi ündeuinde:

– Äleumettik jelilerde sotpen ekstremistik dep tanılğan «Qazaqstannıñ demokratiyalıq tañdauı» wyımı (QDT) men onıñ jaqtastarı 2019 jılğı 26 qazanda kezekti zañsız akciyalardı wyımdastırıp, qatısuğa şaqırular taratuda.

Atalğan wyımnıñ müşeleri asa auır qılmıstar jasağanı üşin şetelde sot töreliginen jasırınıp jür.

«Ekstremizmge qarsı is-qimıl turalı» Zañnıñ 13-babına säykes ekstremistik wyımdardı tarta otırıp, beybit jinalıstar, mitingiler, şeruler, piketter jäne demonstraciyalar ötkizuge, olardıñ ayırım belgilerin paydalanuğa, ekstremistik materialdardı taratuğa jol berilmeydi.

Osığan baylanıstı, memlekettik organdar sotpen tıyım salınğan ekstremistik wyım bastamaşılıq etudegi rwqsat etilmegen narazılıq akciyalarınıñ wyımdastıruşıları men qatısuşılarına zañmen belgilengen tärtipte qatañ şaralar qoldanatın boladı. Zañsız akciyalarğa qatısu faktileri rastalğan jağdayda Äkimşilik qwqıq bwzuşılıqtar turalı kodeksiniñ 488-babı boyınşa jauapkerşilik mäselesi qoyılatın boladı (50 AEK-ke deyin ayıppwl, 15 täulikke deyin qamaqqa alu).

Bas prokuratura qwqıq bwzuşılıqtıñ aldın alu, adamnıñ qwqıqtarı men bostandıqtarın qorğau maqsatında azamattardı arandatuşılıq şaqırularğa berilmeuge jäne ekstremistik wyımdardıñ zañsız akciyalarına qatısudan bas tartuğa şaqıradı, –  delingen.

QDT akciyaları qarsañındağı azamattıq qoğamnıñ dästürli qısım körui

Qazaqstandağı qızmetine tıyım salınğan oppoziciyalıq qozğalıstıñ kezekti mitingi qarsañında qwqıq qorğau organdarı ädettegidey közge tüsken azamattıq qoğam belsendilerine aldın-ala eskertu berip jatır. Mısalı, jañaözendik bir top belsendi: Mwratbay Jwmağaliev, Sätmağambet Bektileev, Nwrlıbek Nwrğalievter özderin policiya üylerine izdep kelip jatqanın aytqan. Tipti Jañaözen belsendisi Şolpan Ötekeeva Azattıqqa  bergen swhbatında onı WQK şaqırğanın aytqan. Sonımen qatar, astanalıq belsendiler Erbol Eshojin men Äliya Jaqıpova, tağı basqaları policiya tarapınan şaqırtular alğan, tipti añdu-qorqıtu amaldarı qoldanılğan.

Facebook-tağı #IHaveAChoise #ActivistsNotExtremists tobı wsınğan mälimet boyınşa, 17-24 qazan aralığında belsendilerge 31 qısım körsetu oqiğası anıqtalğan. Top jetekşisi, «Otkrıtıy dialog» qorınıñ prezidenti Lyudmila Kozlovska «Beybit jiın qarsañında Qazaqstan biligi belsendilerdiñ izine tüsip, qorqıta bastadı, bwl masqara jağday» dep mälimdegen Azattıqqa.

"The Qazaq Times"