ميتينگ قارساڭىندا بەلسەندىلەرگە «قىسىم كورسەتىلىپ»، باس پروكۋراتۋرا ۇندەۋ جاسادى

قدت اكتسيالارى قارساڭىندا ادەتتەگىدەي قۇزىرلى ورگاندار ازاماتتىق قوعام بەلسەندىلەرىن ءتۇس-اتىن تۇگەندەپ، ەسكەرتىپ، شاقىرتىپ نە حابارلاسىپ، وسى كەزگە دەيىنگى تاجىريبە كورسەتكەندەي «كەرەك دەپ تاپقان تۇسىندا» تۇتقىنداپ، رۇقسات ەتىلمەگەن جيىننىڭ بولماۋىنا بارىنشا «ەڭبەك ەتۋدە». كۇشتىك قۇرىلىمداردىڭ پروفيلاكتيكاسىنان بولەك قازاقستاننىڭ باس پروكۋراتۋراسى رەسپۋبليكا جۇرتشىلىعىنا «قاتاڭ ەسكەرتۋ» ءھام «ساقتاندىرۋ» جايلى ۇندەۋ-حاتىن جولدادى.

پروفيلاكتيك پوليتسيا، پارمەنشىل پروكۋراتۋرا ۇندەۋ شاشتى

قر باس پروكۋرورىنىڭ ورىنباسارى بولات دەمباەۆ قازاقستاندا ەكسترەميستىك دەپ تانىلعان 20 جىلعا سىرتتاي سوتتالعان ەكس-بانكير مۇحتار ءابىليازوۆتىڭ جەتەكشىلىگىندەگى «قازاقستاننىڭ دەموكراتيالىق تاڭداۋى» بەيرەسمي قوزعالىسىنىڭ حالىقتى سانكتسيالانباعان كەزەكتى قارسىلىق اكتسياسىنا قاتىسۋعا شاقىرۋىنا وراي ۇندەۋ جاريالادى. وندا ەكسترەميستىك ۇيىم باتاماشىلدىق ەتەتىن رۇقسات ەتىلمەگەن شەرۋ «ۇيىمداستىرۋشىلارى مەن قاتىسۋشىلارىنا زاڭمەن بەلگىلەنگەن تارتىپتە قاتاڭ شارالار قولداناتىنى» جايلى ەسكەرتىلگەن.

باس پروكۋرورنىڭ ورىنباسارى ب.دەمباەۆتىڭ «پروكۋراتۋرا تۋرالى» زاڭنىڭ 31-بابى تارتىبىندەگى ۇندەۋىندە:

– الەۋمەتتىك جەلىلەردە سوتپەن ەكسترەميستىك دەپ تانىلعان «قازاقستاننىڭ دەموكراتيالىق تاڭداۋى» ۇيىمى (قدت) مەن ونىڭ جاقتاستارى 2019 جىلعى 26 قازاندا كەزەكتى زاڭسىز اكتسيالاردى ۇيىمداستىرىپ، قاتىسۋعا شاقىرۋلار تاراتۋدا.

اتالعان ۇيىمنىڭ مۇشەلەرى اسا اۋىر قىلمىستار جاساعانى ءۇشىن شەتەلدە سوت تورەلىگىنەن جاسىرىنىپ ءجۇر.

«ەكسترەميزمگە قارسى ءىس-قيمىل تۋرالى» زاڭنىڭ 13-بابىنا سايكەس ەكسترەميستىك ۇيىمداردى تارتا وتىرىپ، بەيبىت جينالىستار، ميتينگىلەر، شەرۋلەر، پيكەتتەر جانە دەمونستراتسيالار وتكىزۋگە، ولاردىڭ ايىرىم بەلگىلەرىن پايدالانۋعا، ەكسترەميستىك ماتەريالداردى تاراتۋعا جول بەرىلمەيدى.

وسىعان بايلانىستى، مەملەكەتتىك ورگاندار سوتپەن تىيىم سالىنعان ەكسترەميستىك ۇيىم باستاماشىلىق ەتۋدەگى رۇقسات ەتىلمەگەن نارازىلىق اكتسيالارىنىڭ ۇيىمداستىرۋشىلارى مەن قاتىسۋشىلارىنا زاڭمەن بەلگىلەنگەن تارتىپتە قاتاڭ شارالار قولداناتىن بولادى. زاڭسىز اكتسيالارعا قاتىسۋ فاكتىلەرى راستالعان جاعدايدا اكىمشىلىك قۇقىق بۇزۋشىلىقتار تۋرالى كودەكسىنىڭ 488-بابى بويىنشا جاۋاپكەرشىلىك ماسەلەسى قويىلاتىن بولادى (50 اەك-كە دەيىن ايىپپۇل، 15 تاۋلىككە دەيىن قاماققا الۋ).

باس پروكۋراتۋرا قۇقىق بۇزۋشىلىقتىڭ الدىن الۋ، ادامنىڭ قۇقىقتارى مەن بوستاندىقتارىن قورعاۋ ماقساتىندا ازاماتتاردى ارانداتۋشىلىق شاقىرۋلارعا بەرىلمەۋگە جانە ەكسترەميستىك ۇيىمداردىڭ زاڭسىز اكتسيالارىنا قاتىسۋدان باس تارتۋعا شاقىرادى، –  دەلىنگەن.

قدت اكتسيالارى قارساڭىنداعى ازاماتتىق قوعامنىڭ ءداستۇرلى قىسىم كورۋى

قازاقستانداعى قىزمەتىنە تىيىم سالىنعان وپپوزيتسيالىق قوزعالىستىڭ كەزەكتى ميتينگى قارساڭىندا قۇقىق قورعاۋ ورگاندارى ادەتتەگىدەي كوزگە تۇسكەن ازاماتتىق قوعام بەلسەندىلەرىنە الدىن-الا ەسكەرتۋ بەرىپ جاتىر. مىسالى، جاڭاوزەندىك ءبىر توپ بەلسەندى: مۇراتباي جۇماعاليەۆ، ساتماعامبەت بەكتىلەەۆ، نۇرلىبەك نۇرعاليەۆتەر وزدەرىن پوليتسيا ۇيلەرىنە ىزدەپ كەلىپ جاتقانىن ايتقان. ءتىپتى جاڭاوزەن بەلسەندىسى شولپان وتەكەەۆا ازاتتىققا  بەرگەن سۇحباتىندا ونى ۇقك شاقىرعانىن ايتقان. سونىمەن قاتار، استانالىق بەلسەندىلەر ەربول ەسحوجين مەن ءاليا جاقىپوۆا، تاعى باسقالارى پوليتسيا تاراپىنان شاقىرتۋلار العان، ءتىپتى اڭدۋ-قورقىتۋ امالدارى قولدانىلعان.

Facebook-تاعى #IHaveAChoiسe #ActivistsNotExtremists توبى ۇسىنعان مالىمەت بويىنشا، 17-24 قازان ارالىعىندا بەلسەندىلەرگە 31 قىسىم كءورسەتۋ وقيعاسى انىقتالعان. توپ جەتەكشىسى، «وتكرىتىي ديالوگ» قورىنىڭ پرەزيدەنتى ليۋدميلا كوزلوۆسكا «بەيبىت جيىن قارساڭىندا قازاقستان بيلىگى بەلسەندىلەردىڭ ىزىنە تءۇءسىپ، قورقىتا باستادى، بۇل ماسقارا جاعداي» دەپ مالىمدەگەن ازاتتىققا.

"The Qazaq Times"