QR Prem'er-ministriniñ orınbasarı Berdibek Saparbaev İİİ imamdar forumında "zamanui uağız" turalı ayttı. 23 qazan 2019 jıl. Elorda. Foto: aşıq derekköz

Keşe, qazannıñ 23-i el astanasınıñ törinde ötken «Ruhani qwndılıqtar – qoğam birliginiñ negizi» attı İİİ respublikalıq imamdar forumında QR Prem'er-ministriniñ orınbasarı Berdibek Saparbaev qabıldanğan 3 qwjattıñ mänin söz etip, imamdardı «birlese jwmıs jasauğa» şaqırdı.

Respublikanıñ är öñirinen kelgen 500-ge juıq imamnıñ basın qosqan alqalı jiınğa QMDB törağası, bas müfti Serikbay Qajı Oraz, el prem'er-ministriniñ orınbasarı Berdibek Saparbaev, aqparat ministri Däuren Abaev, Prezidenti Äkimşiliginiñ basşısı Erlan Qoşanovtar da qatıstı.

"Jeti ruhani qazıq" taqırıbındağı respublikalıq İİİ imamdar forumına qatısqan şeneunikter. 23 qazan 2019 jıl. Elorda. Foto: aşıq derekköz

Ükimet basşısınıñ orınbasarı Berdibek Saparbaev söz alğan twsta-aq eks-prezident Nazarbaevtıñ «Ekonomikanıñ damuınan bes jıl qalıp qoysaq, onı on jıldıñ işinde qalpına keltiruge boladı. Al eger ruhani jağınan bes jılğa qalıp qoysaq, oğan eñ kem degende jiırma-otız jıl kerek» degen sözin erekşe tebirenispen eske ala otırıp:

– Forumnıñ «Ruhani qwndılıqtar – qoğam birliginiñ negizi» ataluı öte dwrıs. Bizdiñ wltımızda «Birlik barda, tirlik bar» degen jaqsı söz bar. Ekinşi mañızdı mäsele – twraqtılıq. Twraqtılıq bolsa, ekonomika damidı, halıqtıñ twrmısı jaqsaradı. Adamnıñ sana-sezimi joğarı boluı kerek, öziniñ wlttıq qwndılıqtarın saqtamasa, alısqa barmaydı. Adam üşin eñ bastısı, bala-şağasına tärbie beru. Äkelik, analıq borışın balalarınıñ aldında orındasa, öz mindetin tolıq atqarğan bolar edi», – dedi.

Berdibek Mäşbekwlı Qazaqstan mwsılmandarı dini basqarmasına jılı lebizin bildirip, el imamdarınıñ halıq ömirindegi atqaratın rölin atap, jastarğa «irtki saluşı» arandatuşılar turalı «zaman talabına say uağızben» «tüsindiru kerektigin» ayttı:

– El işinde birlikti saqtauğa, tälim-tärbie berude Qazaqstan mwsılmandarı dini basqarmasınıñ atqarıp jatqan eñbeginiñ mañızı zor. Memleket sizderdi qoldaydı. Halıq, äsirese, auıldı jerlerde uağızdarıñızdı köptep tıñdaydı. Meşitterge jastar barıp jatır. Qaltalı azamattar meşit twrğızıp, qasına medrese, as beretin orındar salıp jatqanı öte jaqsı. Sizder adam ömirge kelgennen bastap, ömirden ozğanına deyin qasında bolasızdar. Sizder aytatın uağız zaman talabına say boluı kerek. Eñ negizgisi – aramızğa iritki saluşılardan aulaq boluımız qajet. Olardıñ aytatın sözderin, ne üşin iritki salıp otırğandığın, maqsattarı qanday ekendigin jastarğa tüsindiru kerek. «Jeti ruhani qazıq» Qazaqstan mwsılmandarınıñ ruhani twğırnamasında otanşıldıq jaqsı aytılğan. Otanımızdıñ abıroyı üşin birlese jwmıs jasayıq. Twğırnamada eñbekqorlıq, bilimdilik turalı aytılğan. Bwlardıñ barlığı öte mañızdı. Forum jwmısına Qazaqstan Ükimeti atınan alğısımdı bildiremin, –  dedi vice-prem'er.

Eske sala ketsek, forum ayasında «Jeti ruhani qazıq» Qazaqstan mwsılmandarınıñ ruhani twğırnaması», «Din qızmetkerleri atqaratın dini räsimder tizilimi» jäne «QMDB qwrılımındağı dini lauazımdar tizilimi jäne mindetteri» attı üş qwjat qabıldandı.

Qazaqstan ükimeti basşısınıñ orınbasarı Berdibek Saparbaev imamdarğa "jastarğa irtki saluşılardı tüsindiru kerektigin" eskertti. 23 qazan 2019 jıl. Elorda. Foto: aşıq derekköz

Jalpı soñğı kezderi azamattıq qoğam tarapınan Qazaqstan biligin «memleket isine dinniñ aralasuına müddeli« dep ayıptap sınaytın pikir küşeye tüsti. Jazdağı jarılıstan bosıp qaşqan arıstıqtarmen til tabısa almağan Şımkent qalası men oblıs äkimderiniñ imamdardıñ, meşittiñ kömegine jüginui jäne İİM tekseris jürgizip jatqan dini arna basşısı, eks-aytısker M.Tazabekovtiñ küştik organdar aldında «policiyanıñ mitingide qalay äreket etu» jayındağı däristeri qoğamnıñ qızu talqısına tüsken edi. Jartı jıldan beri «Dini twlğalardı sayasi mediator ya aydap saluşı» retinde bağalağan qoğam belsendileri «dinniñ bilik isinde qolşoqpar bolmauın» talap etip keledi.

"The Qazaq Times"