بەردىبەك ساپارباەۆ "زاماناۋي يمامدارعا": ...جاستارعا ارامىزعا ىرتكى سالۋشىلار تۋرالى ءتۇسىندىرۋ كەرەك

كەشە، قازاننىڭ 23-ءى ەل استاناسىنىڭ تورىندە وتكەن «رۋحاني قۇندىلىقتار – قوعام بىرلىگىنىڭ نەگىزى» اتتى ءىىى رەسپۋبليكالىق يمامدار فورۋمىندا قر پرەمەر-ءمينيسترىنىڭ ورىنباسارى بەردىبەك ساپارباەۆ قابىلدانعان 3 قۇجاتتىڭ ءمانىن ءسوز ەتىپ، يمامداردى «بىرلەسە جۇمىس جاساۋعا» شاقىردى.

رەسپۋبليكانىڭ ءار وڭىرىنەن كەلگەن 500-گە جۋىق يمامنىڭ باسىن قوسقان القالى جيىنعا قمدب توراعاسى، باس ءمۇفتي سەرىكباي قاجى وراز، ەل پرەمەر-ءمينيسترىنىڭ ورىنباسارى بەردىبەك ساپارباەۆ، اقپارات ءمينيسترى داۋرەن اباەۆ، پرەزيدەنتى اكىمشىلىگىنىڭ باسشىسى ەرلان قوشانوۆتار دا قاتىستى.

"جەتى رۋحاني قازىق" تاقىرىبىنداعى رەسپۋبليكالىق ءىىى يمامدار فورۋمىنا قاتىسقان شەنەۋنىكتەر. 23 قازان 2019 جىل. ەلوردا. فوتو: اشىق دەرەككوز

ۇكىمەت باسشىسىنىڭ ورىنباسارى بەردىبەك ساپارباەۆ ءسوز العان تۇستا-اق ەكس-پرەزيدەنت نازارباەۆتىڭ «ەكونوميكانىڭ دامۋىنان بەس جىل قالىپ قويساق، ونى ون جىلدىڭ ىشىندە قالپىنا كەلتىرۋگە بولادى. ال ەگەر رۋحاني جاعىنان بەس جىلعا قالىپ قويساق، وعان ەڭ كەم دەگەندە جيىرما-وتىز جىل كەرەك» دەگەن ءسوزىن ەرەكشە تەبىرەنىسپەن ەسكە الا وتىرىپ:

– فورۋمنىڭ «رۋحاني قۇندىلىقتار – قوعام بىرلىگىنىڭ نەگىزى» اتالۋى وتە دۇرىس. ءبىزدىڭ ۇلتىمىزدا «بىرلىك باردا، تىرلىك بار» دەگەن جاقسى ءسوز بار. ەكىنشى ماڭىزدى ماسەلە – تۇراقتىلىق. تۇراقتىلىق بولسا، ەكونوميكا داميدى، حالىقتىڭ تۇرمىسى جاقسارادى. ادامنىڭ سانا-سەزىمى جوعارى بولۋى كەرەك، ءوزىنىڭ ۇلتتىق قۇندىلىقتارىن ساقتاماسا، الىسقا بارمايدى. ادام ءۇشىن ەڭ باستىسى، بالا-شاعاسىنا تاربيە بەرۋ. اكەلىك، انالىق بورىشىن بالالارىنىڭ الدىندا ورىنداسا، ءوز مىندەتىن تولىق اتقارعان بولار ەدى»، – دەدى.

بەردىبەك ماشبەكۇلى قازاقستان مۇسىلماندارى ءدىني باسقارماسىنا جىلى لەبىزىن ءبىلدىرىپ، ەل يمامدارىنىڭ حالىق ومىرىندەگى اتقاراتىن ءرولىن اتاپ، جاستارعا «ىرتكى سالۋشى» ارانداتۋشىلار تۋرالى «زامان تالابىنا ساي ۋاعىزبەن» «ءتۇسىندىرۋ كەرەكتىگىن» ايتتى:

– ەل ىشىندە بىرلىكتى ساقتاۋعا، ءتالىم-تاربيە بەرۋدە قازاقستان مۇسىلماندارى ءدىني باسقارماسىنىڭ اتقارىپ جاتقان ەڭبەگىنىڭ ماڭىزى زور. مەملەكەت سىزدەردى قولدايدى. حالىق، اسىرەسە، اۋىلدى جەرلەردە ۋاعىزدارىڭىزدى كوپتەپ تىڭدايدى. مەشىتتەرگە جاستار بارىپ جاتىر. قالتالى ازاماتتار مەشىت تۇرعىزىپ، قاسىنا مەدرەسە، اس بەرەتىن ورىندار سالىپ جاتقانى وتە جاقسى. سىزدەر ادام ومىرگە كەلگەننەن باستاپ، ومىردەن وزعانىنا دەيىن قاسىندا بولاسىزدار. سىزدەر ايتاتىن ۋاعىز زامان تالابىنا ساي بولۋى كەرەك. ەڭ نەگىزگىسى – ارامىزعا ىرىتكى سالۋشىلاردان اۋلاق بولۋىمىز قاجەت. ولاردىڭ ايتاتىن سوزدەرىن، نە ءۇشىن ىرىتكى سالىپ وتىرعاندىعىن، ماقساتتارى قانداي ەكەندىگىن جاستارعا ءتۇسىندىرۋ كەرەك. «جەتى رۋحاني قازىق» قازاقستان مۇسىلماندارىنىڭ رۋحاني تۇعىرناماسىندا وتانشىلدىق جاقسى ايتىلعان. وتانىمىزدىڭ ابىرويى ءۇشىن بىرلەسە جۇمىس جاسايىق. تۇعىرنامادا ەڭبەكقورلىق، بىلىمدىلىك تۋرالى ايتىلعان. بۇلاردىڭ بارلىعى وتە ماڭىزدى. فورۋم جۇمىسىنا قازاقستان ۇكىمەتى اتىنان العىسىمدى بىلدىرەمىن، –  دەدى ۆيتسە-پرەمەر.

ەسكە سالا كەتسەك، فورۋم اياسىندا «جەتى رۋحاني قازىق» قازاقستان مۇسىلماندارىنىڭ رۋحاني تۇعىرناماسى»، «ءدىن قىزمەتكەرلەرى اتقاراتىن ءدىني راسىمدەر ءتىزىلىمى» جانە «قمدب قۇرىلىمىنداعى ءدىني لاۋازىمدار ءتىزىلىمى جانە مىندەتتەرى» اتتى ءۇش قۇجات قابىلداندى.

قازاقستان ۇكىمەتى باسشىسىنىڭ ورىنباسارى بەردىبەك ساپارباەۆ يمامدارعا "جاستارعا ىرتكى سالۋشىلاردى ءتۇسىندىرۋ كەرەكتىگىن" ەسكەرتتى. 23 قازان 2019 جىل. ەلوردا. فوتو: اشىق دەرەككوز

جالپى سوڭعى كەزدەرى ازاماتتىق قوعام تاراپىنان قازاقستان بيلىگىن «مەملەكەت ىسىنە ءدىننىڭ ارالاسۋىنا مۇددەلى« دەپ ايىپتاپ سىنايتىن پىكىر كۇشەيە ءتۇستى. جازداعى جارىلىستان بوسىپ قاشقان ارىستىقتارمەن ءتىل تابىسا الماعان شىمكەنت قالاسى مەن وبلىس اكىمدەرىنىڭ يمامداردىڭ، مەشىتتىڭ كومەگىنە جۇگىنۋى جانە ءىىم تەكسەرىس جۇرگىزىپ جاتقان ءدىني ارنا باسشىسى، ەكس-ايتىسكەر م.تازابەكوۆتىڭ كۇشتىك ورگاندار الدىندا «پوليتسيانىڭ ميتينگىدە قالاي ارەكەت ەتۋ» جايىنداعى دارىستەرى قوعامنىڭ قىزۋ تالقىسىنا تۇسكەن ەدى. جارتى جىلدان بەرى «ءدىني تۇلعالاردى ساياسي مەدياتور يا ايداپ سالۋشى» رەتىندە باعالاعان قوعام بەلسەندىلەرى «ءدىننىڭ بيلىك ىسىندە قولشوقپار بولماۋىن» تالاپ ەتىپ كەلەدى.

"The Qazaq Times"