Qazannıñ 9-ı  memleket basşısı Q.Toqaev qol qoyğan  «QR Prezidentiniñ keybir aktilerine özgerister men tolıqtırular engizu turalı» №184 jarlığı öz küşine endi. Jarlıq boyınşa äkimder men ministrler, küştik qwrılım basşıları jäne tağı köptegen memlekettik lauazım ielerin tağayındau Qauipsizdik keñesiniñ törağası Nazarbaevtıñ kelisimimen ğana jüzege asadı. 

Üzindi: 2-1-tarmağı:

«Ortalıq atqaruşı organdardıñ jäne oblıstardıñ, respublikalıq mañızı bar qalalardıñ jäne astananıñ jergilikti atqaruşı organdarınıñ, sonday-aq Qazaqstan Respublikasınıñ Prezidentine tikeley bağınatın jäne esep beretin memlekettik organdardıñ birinşi basşıları lauazımına tağayındauğa wsınılatın (qarastırılatın) kandidaturalar Qazaqstan Respublikası Qauipsizdik Keñesiniñ Törağasımen kelisiluge tiis».

Nazarbaevtıñ jeke apparatı, öz keñsesi, qorı men baspasöz qızmeti bar. Aqparat ministri Däuren Abaev «Toqaev – ekinşi Nazarbaev emes, onıñ öz basqaru stili, öz közqarası bar. Sondıqtan, jaña Prezident öz jwmısında jaña format qoldanğan sayın «qos bilik» turalı şu köterudiñ qajeti joq» dep, el işindegi «Qazaqstandağı qos bilik» jaylı qauesetti joqqa şığarıp baqqan bolatın. «Qos bilikti» bayqap, onı söz etuşilerdi «arandatuşığa» balau küş alğan şaqta Nazarbaev juırda «Habar» arnasına swhbat berdi. Qos bilik taqırıbın «şeteldegi qaşqındar şığarğan ösek» retinde bağalap, birinşi basşığa qatıstı «Keñesti men bergenmen, şeşim qabıldauşı – keñes alğan adamnıñ özi ğoy»  degen edi «Nwr Otan» kösemi.

Osığan deyin saylau aldında, mamırda eks-prezident «Alayda, Qazaqstanda mwnday eki prezidenttik basqaru joq. Bir ğana prezident bar jäne ol – eñ bastısı» dep «nükte qoyğanday» bolıp edi. Ol Toqaevtı ayaqsız qalğan isti jalğastıratın, dayındıqtan ötken täjiribeli adam dep esepteytinin, öziniñ tek jaña prezidentke qoldau körsetetinin aytqan.

Qazaqstanda ekstremizmdik wyım retinde tanılıp, jwmısına tıyım salınğan «Qazaqstannıñ demokratiyalıq tañdauı» beyresmi qozğalısınıñ jetekşisi 20 jılğa sırttay sottalğan eks-bankir Mwhtar Äbilyazovtıñ Toqaevtı «jihaz» dep bağalağan sözi sankciyalanbağan mitingterde auıq-auıq aytılıp keledi.

Otandıq täuelsiz sayasi sarapşılar mwnday «qwdiretti şeşimderdi» qoğamnıñ bilikke degen senimin älsiretip, demokratiyalıq üderisterdi keşeuildetedi deydi.

"The Qazaq Times"