Astana sayajaydağı twrğın üy. Körneki suret. Foto: aşıq derekköz

QR Eñbek jäne halıqtı äleumettik qorğau ministrliginiñ mälimetinşe,  2020 jıldan bastap  340 mıñnan astam köpbalalı otbası memlekettik järdemaqığa ümitker bola aladı. Jaña memlekettik järdemaqı qazirgi AÄK-niñ jalpı şığının ünemdeudiñ sayasi ädisi me?

Ayta keterligi, atalğan järdemaqı engizilgen kezde Qazaqstandağı köpbalalı otbasılar sanınıñ artuına baylanıstı bwl tölemdi aluşılar sanı da artuı mümkin.

«Tayauda eñbek ministrligi tiisti zañ jobasın parlamenttiñ qarauına engizudi josparlap otır. Joğarıda atalğan memlekettik järdemaqı 4 nemese odan da köp kämeletke tolmağan nemese 23 jasqa deyingi kündizgi bölimde oqitın balaları bar barlıq köpbalalı otbasılarğa tabısına qaramastan tölenedi dep josparlanuda. Memlekettik järdemaqınıñ mölşeri bala sanına qaray saralanadı. YAğni, 4 balası bar otbasılarğa 42 500 teñge, 5 balağa – 53 125 teñge, 6 balağa – 63 750 teñge, 7 jäne odan da köp balalarğa 74 375 teñge tölenedi», – delingen ministrlik mälimdemesinde.

Bwdan bwrın habarlanğanday, osı jıldıñ 7 qazanındağı Ükimet otırısında eñbek jäne halıqtı äleumettik qorğau ministri Birjan Nwrımbetov Qazaqstanda 2020 jılğı 1 qañtardan bastap engizu josparlanıp otırğan AÄK körsetudiñ jaña tetikterin tanıstırğan bolatın. AÄK tabısı az otbasılarğa, sonıñ işinde köpbalalı otbasılarğa tölenetin boladı.

Eñ tömen künköris deñgeyiniñ 70%-ı tağayındaudıñ şekti kriteriyi bolıp qala beredi. Eger eñbekke qabiletti otbası müşesi wsınılğan jwmıstan jäne jwmıspen qamtuğa järdemdesu şaralarınan bas tartsa, onda AÄK tölemi tek oğan ğana emes, bükil otbasına da toqtatılmaq. Tabısı az otbasılardan şıqqan balalar üşin kepildendirilgen äleumettik paketti engizu wsınıladı deydi.

1 jastan 6 jasqa deyingi balalardı azıq-tülik jiıntığımen jäne gigienalıq qwraldarmen, 6 jastan 18 jasqa deyingi balalardı mektepterde ıstıq tamaqpen, oqu qwraldarımen jäne mektep kiimimen qamtamasız etilip, sonday-aq olarğa mektepke deyingi jol jüru şığındarı öteledi-mis.

Medicinalıq, onıñ işinde stomatologiyalıq kömek 18 jasqa deyingi balalarğa tegin medicinalıq kömektiñ kepildik berilgen kölemi jäne mindetti äleumettik medicinalıq saqtandıru ayasında körsetiledi desedi.

Bwl mäselege qatıstı täuelsiz sarapşılar  «jaña memlekettik järdemaqı ülgisi» biliktiñ 21 mıñ teñgeni qwraytın qazirgi AÄK-niñ şığının qısqartu üşin oylap tapqan «tetigi» ekenin aytadı. Är balağa 21 mıñ teñge alıp otırğan otbasılarğa qosımşa tabısına qaramay beriletin atalmış järdemaqı jalpı tabıs esebine engizilip, tiisinşe toqsandıq tabıs monitoringinde şekti körsetkişten arttıru üşin «äzirlengen ädis» deydi keybir belsendiler. Osı arqılı jan basına şaqqanda tabısı 21 mıñnan asqanda AÄK tölemi toqtatılatının aytadı.

Äu basta-aq ministrlik «Memlekettik ataulı äleumettik kömek turalı» QR Zañın basşılıqqa ala otırıp, aldın-ala täuekelder men «alayaqtıq» qauipterin boljap, tiisinşe keşendi nwsqaulıq äzirleui qajet edi. Qwqıqtıq sauatı artıp, öz ülesin äri azamattıq haqın talap ete bastağan bwqaranı jappay «masılğa» balap, şulı mälimdemeler jasap jürgen şeneunikter men äkim-qaralar qoğammen dialog qwruğa talpınğan Toqaev sayasatına köleñkesin tüsirui ıqtimal. Demek, aldağı uaqıtta jaña memlekettik järdemaqınıñ qoğam talqısına, azamattıq belsendilerdiñ sarapşılıq süzgisine tüsip, äli talay söz bolatını anıq.

"The Qazaq Times"