Bügin elodanıñ Halıqaralıq äuejayında belgili til janaşırı men tasımaldauşı äuekompaniya arasında dau tudı.  Fly Arystan äuekompaniyası «qara tizimge» ilikken Oğız Doğandı tirkeu punktinen ötkizbey qoydı.  

Osığan deyin bortseriktiñ qazaq tilinde qızmet körsetuin talap etken Oğız Doğan 2017 jılı 22 jeltoqsanda  Air Astana äuekompaniyasın sotta jeñip, 1 teñge kölemindegi moral'dıq şığın öndirgen bolatın.

9 qazan orın alğan mäselede de filologiya ğılımdarınıñ doktorı, qoğam belsendisi Oğız Doğan otbası müşelerimen «bir ay bwrın» alınğan biletine qaramastan, Air Astana-ğa qarastı  el işindegi reysterdi jürgizetin Fly Arystan kompaniyasınıñ qızmetkerleri onıñ «sottan keyin qara tizimge engizilgenin» aytıp, wşaqqa kirgizbey qoyğan. Fly Arystan ökilderi bügin astana uaqıtımen 14:55-te Şımkentke qaray wşuı tiis KC7327POW reysine Oğız Doğannan özge otbasılarınıñ «wşuına bolatının» aytıp mäseleniñ şeşimin «wsınğanday boldı».

Türkologtıñ joldası Jibek Äbilğazı biletti 8 qırküyek flyarystan.com saytınan satıp alğan. Biraq wşu uaqıtına deyin äuekompaniya tarapınan jolauşınıñ «qara tizimge engizilgeni jaylı» eşbir aqparat ya habarlama kelmegen. Biletke tölem operaciyası eş qiındıqsız sätti jürgizilgen.

Oğız Doğan biletterdi flyarystan.com saytınan bir ay bwrın brondağan. Foto: Oğız Doğan

Eki kisilik biletke tolıq tölem jürgizilgendigi, orın nömirleri jaylı äuekompaniya habarlaması. Foto: Oğız Doğan

Oğız Doğan mwnı «Air Astana jas baladay menen kek alıp otır» dep bağalaydı. Otbasımen (özi, äyeli, balası) jolğa şıqqan Doğannıñ jan ayqayına policiya qızmetkeri aralasqan kezde özin Fly Arystan men Air Astana ökili retinde tanıstırğan Swñğat Abılaywlı «Sottan keyin qara tizimge engizilgenin» rastap, «...mingize almaymız» dep kesip ayttı. Äuekompaniya ökili koll-ortalıqqa habarlasıp, zañgerlermen baylanısudı nemese bilet aqısın keri qaytaru joldarın wsındı.  Air Astana-nıñ işki jarğı-erejelerine qatıstı qara tizimge engizu twtınuşı qwqıqtarına qayşı bolğanı ma degen saual tuadı. Memlekettik tildegi olqılıqtarmen küresetin til janaşırlar jekelegen kompaniyalardıñ «qara tizimine» ene beretin bolsa, qoğamdıq qızmet alu haqısınan qağılıp, qwqığı taptalmay ma?

Özin Fly Arystan men Air Astana ökili retinde tanıstırğan Swñğat Abılaywlı Oğız Doğanğa "qara tizimge kirgenin" tüsindirip twr. Foto: O.Doğannıñ facebook paraqşasınan skrinşot qiındısı

Jolınan qalğan Oğız Doğan oqiğa ornınan facebook äleumettik jelisi arqılı tikeley efirge şığıp, qwqıq qorğauşılar men qwqıqtıq organdardan kömek swradı. Joldan emes, janjaldan azap şekken Oğız Doğanğa habarlasıp bilgenimizdey, joldası men balası üşeui basqa künge özge äuekompaniyağa bilet alğan. Aldağı uaqıtta zañger Abzal Qwspanmen birge bügingi jaytqa baylanıstı zañdıq twrğıda «iske kirisetinin» mälimdedi.

Sonımen qatar ekinşi tarap Air Astana äuekompaniyasına habarlasıp, bes ret bir-birine dopşa siltegen qızmetrkerlerden mandıtıp jauap ala almadıq. Al Fly Arystan ökili qoğammen baylanıs nemese basşılıq bölimderinen jauaptı mamanmen tildesudi swrağanımızğa qarmay, tek «habarlama türinde» saytqa joldauın, «eki aptanıñ işinde qarastırılıp, bir habar beriletinin» ayttı.

«Servis kriteriyi boyınşa» birneşe dürkin halıqaralıq sıyğa bölengen mañday aldı äuekompaniya düniya jwrtına oñ qabaq tanıtqanda, «qazaq tiliniñ saqşılarına» qırın qarap, twqırtatu sayasatımen aynalısuı  azamattıq qoğamnıñ aşuı men alañdauşılığın tudırdı.

Eki sağat aldın ğana jariyalanğan tikeley efirdi 4 mıñ kisi qarap, 140 ret bölisip,    500-ge tarta  pikir qaldırılğan. Köpşilik «äuekompaniyanıñ isine narazılıq tanıtıp, sotqa berudi» swrağan.

"The Qazaq Times"