بۇگىن ەلودانىڭ حالىقارالىق اۋەجايىندا بەلگىلى ءتىل جاناشىرى مەن تاسىمالداۋشى اۋەكومپانيا اراسىندا داۋ تۋدى.  Fly Arystan اۋەكومپانياسى «قارا تىزىمگە» ىلىككەن وعىز دوعاندى تىركەۋ پۋنكتىنەن وتكىزبەي قويدى.  

وسىعان دەيىن بورتسەرىكتىڭ قازاق تىلىندە قىزمەت كورسەتۋىن تالاپ ەتكەن وعىز دوعان 2017 جىلى 22 جەلتوقساندا  Air Astana اۋەكومپانياسىن سوتتا جەڭىپ، 1 تەڭگە كولەمىندەگى مورالدىق شىعىن وندىرگەن بولاتىن.

9 قازان ورىن العان ماسەلەدە دە فيلولوگيا عىلىمدارىنىڭ دوكتورى، قوعام بەلسەندىسى وعىز دوعان وتباسى مۇشەلەرىمەن «ءبىر اي بۇرىن» الىنعان بيلەتىنە قاراماستان، Air Astana-عا قاراستى  ەل ىشىندەگى رەيستەردى جۇرگىزەتىن Fly Arystan كومپانياسىنىڭ قىزمەتكەرلەرى ونىڭ «سوتتان كەيىن قارا تىزىمگە ەنگىزىلگەنىن» ايتىپ، ۇشاققا كىرگىزبەي قويعان. Fly Arystan وكىلدەرى بۇگىن استانا ۋاقىتىمەن 14:55-تە شىمكەنتكە قاراي ۇشۋى ءتيىس KC7327POW رەيسىنە وعىز دوعاننان وزگە وتباسىلارىنىڭ «ۇشۋىنا بولاتىنىن» ايتىپ ماسەلەنىڭ شەشىمىن «ۇسىنعانداي بولدى».

تۇركولوگتىڭ جولداسى جىبەك ابىلعازى بيلەتتى 8 قىركۇيەك flyarystan.com سايتىنان ساتىپ العان. بىراق ۇشۋ ۋاقىتىنا دەيىن اۋەكومپانيا تاراپىنان جولاۋشىنىڭ «قارا تىزىمگە ەنگىزىلگەنى جايلى» ەشبىر اقپارات يا حابارلاما كەلمەگەن. بيلەتكە تولەم وپەراتسياسى ەش قيىندىقسىز ءساتتى جۇرگىزىلگەن.

وعىز دوعان بيلەتتەردى flyarystan.com سايتىنان ءبىر اي بۇرىن برونداعان. فوتو: وعىز دوعان

ەكى كىسىلىك بيلەتكە تولىق تولەم جۇرگىزىلگەندىگى، ورىن نومىرلەرى جايلى اۋەكومپانيا حابارلاماسى. فوتو: وعىز دوعان

وعىز دوعان مۇنى «Air Astana جاس بالاداي مەنەن كەك الىپ وتىر» دەپ باعالايدى. وتباسىمەن ء(وزى، ايەلى، بالاسى) جولعا شىققان دوعاننىڭ جان ايقايىنا پوليتسيا قىزمەتكەرى ارالاسقان كەزدە ءوزىن Fly Arystan مەن Air Astana وكىلى رەتىندە تانىستىرعان سۇڭعات ابىلايۇلى «سوتتان كەيىن قارا تىزىمگە ەنگىزىلگەنىن» راستاپ، «...مىنگىزە المايمىز» دەپ كەسىپ ايتتى. اۋەكومپانيا وكىلى كولل-ورتالىققا حابارلاسىپ، زاڭگەرلەرمەن بايلانىسۋدى نەمەسە بيلەت اقىسىن كەرى قايتارۋ جولدارىن ۇسىندى.  Air Astana-نىڭ ىشكى جارعى-ەرەجەلەرىنە قاتىستى قارا تىزىمگە ەنگىزۋ تۇتىنۋشى قۇقىقتارىنا قايشى بولعانى ما دەگەن ساۋال تۋادى. مەملەكەتتىك تىلدەگى ولقىلىقتارمەن كۇرەسەتىن ءتىل جاناشىرلار جەكەلەگەن كومپانيالاردىڭ «قارا تىزىمىنە» ەنە بەرەتىن بولسا، قوعامدىق قىزمەت الۋ حاقىسىنان قاعىلىپ، قۇقىعى تاپتالماي ما؟

ءوزىن Fly Arystan مەن Air Astana وكىلى رەتىندە تانىستىرعان سۇڭعات ابىلايۇلى وعىز دوعانعا "قارا تىزىمگە كىرگەنىن" ءتۇسىندىرىپ تۇر. فوتو: و.دوعاننىڭ facebook پاراقشاسىنان سكرينشوت قيىندىسى

جولىنان قالعان وعىز دوعان وقيعا ورنىنان facebook الەۋمەتتىك جەلىسى ارقىلى تىكەلەي ەفيرگە شىعىپ، قۇقىق قورعاۋشىلار مەن قۇقىقتىق ورگانداردان كومەك سۇرادى. جولدان ەمەس، جانجالدان ازاپ شەككەن وعىز دوعانعا حابارلاسىپ بىلگەنىمىزدەي، جولداسى مەن بالاسى ۇشەۋى باسقا كۇنگە وزگە اۋەكومپانياعا بيلەت العان. الداعى ۋاقىتتا زاڭگەر ابزال قۇسپانمەن بىرگە بۇگىنگى جايتقا بايلانىستى زاڭدىق تۇرعىدا «ىسكە كىرىسەتىنىن» مالىمدەدى.

سونىمەن قاتار ەكىنشى تاراپ Air Astana اۋەكومپانياسىنا حابارلاسىپ، بەس رەت ءبىر-بىرىنە دوپشا سىلتەگەن قىزمەتركەرلەردەن ماندىتىپ جاۋاپ الا المادىق. ال Fly Arystan وكىلى قوعاممەن بايلانىس نەمەسە باسشىلىق بولىمدەرىنەن جاۋاپتى مامانمەن تىلدەسۋدى سۇراعانىمىزعا قارماي، تەك «حابارلاما تۇرىندە» سايتقا جولداۋىن، «ەكى اپتانىڭ ىشىندە قاراستىرىلىپ، ءبىر حابار بەرىلەتىنىن» ايتتى.

«سەرۆيس كريتەريى بويىنشا» بىرنەشە دۇركىن حالىقارالىق سىيعا بولەنگەن ماڭداي الدى اۋەكومپانيا ءدۇنيا جۇرتىنا وڭ قاباق تانىتقاندا، «قازاق ءتىلىنىڭ ساقشىلارىنا» قىرىن قاراپ، تۇقىرتاتۋ ساياساتىمەن اينالىسۋى  ازاماتتىق قوعامنىڭ اشۋى مەن الاڭداۋشىلىعىن تۋدىردى.

ەكى ساعات الدىن عانا جاريالانعان تىكەلەي ەفيردى 4 مىڭ كىسى قاراپ، 140 رەت ءبولىسىپ،    500-گە تارتا  پىكىر قالدىرىلعان. كوپشىلىك «اۋەكومپانيانىڭ ىسىنە نارازىلىق تانىتىپ، سوتقا بەرۋدى» سۇراعان.

"The Qazaq Times"