Belgili jurnalist Amangeldi Batırbekov. Foto: Azattıq / Dilara Isa

Bügin Şımkent qonaqüyleriniñ birinde jergilikti belsendiler aymaqtağı belgili jurnalist Amangeldi Batırbekovti bosatu turalı baspasöz jiının ötkizip, qoldau komitetin qwrdı.

Azattıqtıñ habarlauınşa, audandıq «Sarıağaş info» gazetiniñ redaktorı, jurnalist Amangeldi Batırbekovke qırküyektiñ 23-i Sarıağaş audandıq sotı Qılmıstıq kodekstiñ «jala jabu» (130-bap) jäne «qorlau» (131-bap) baptarı boyınşa 2 jıl 3 ayğa bas bostandığınan ayıruğa ükim şığarğan. Sottıñ qabıldağan uäj-şeşiminde «Batırbekovtiñ Facebook paraqşasına jariyalağan bes jazbasına arnayı saraptama jasalğan. Saraptama qorıtındısı boyınşa «jäbirlenuşi, Keles audanı bilim böliminiñ basşısı Baqtiyar Abdievtiñ ar-namısına tietin, qadir-qasietin qorlaytın sözder bar ekeni anıqtalğan», – delingen.

İsti bolğan BAQ ökilin qoldauğa eluge tarta azamat kelip qatısqan. Belsendilerdiñ biri brifingte «Amangeldige bostandıq» degen jazuı bar plakat wstap otırğan desedi Azattıq tilşisi Dilara Isa. Jurnalistiñ jwbayı äri qoğamdıq qorğauşısı Gülzada Baymwratova men advokatı Şınar Ermekova sot tergeuinde «is birjaqtı qaralıp, Batırbekovtiñ qwqığı şekteldi» dep mälimdedi.

Advokat Şınar Ermekovanıñ aytuınşa, «sot tergeui eki ret Amangeldi Batırbekovtiñ qatısuınsız ötken. Zañ boyınşa ayıptaluşınıñ qatısuınsız sot tergeuin ötkizuge tıyım salınadı. Saraptama da birjaqtı jasalğan. Batırbekovtiñ sotqa tüsirgen birneşe ötinişiniñ eşbiri, sonıñ işinde, sud'ya Zäure Älseevağa senimsizdik bildirgeni de qanağattandırılmağan».

- Bwl - sot tergeuindegi öreskel qatelik. Sarıağaş audandıq sotınıñ ükimine apellyaciyalıq şağım tüsirdik, – deydi advokat Ermekova. Baspasöz jiınınıñ qorıtındı böliminde «bostandıq» dep wrandatqan belsendiler «sıñarjaq ükimniñ qwrbanı» Amangeldi Batırbekovti qoldau komitetin qwrğan.

Azattıq wsınğan derekterge süyensek, Amangeldi Batırbekovti 2015 jılı küzde Sarıağaş audandıq sotı Qılmıstıq kodekstiñ 130-babınıñ ("Jala jabu") 3-böligi boyınşa bir jarım jılğa bas bostandığınan ayırğan. Qazaqstan prezidenti Nwrswltan Nazarbaevqa şağımdanğan soñ is qayta qaralıp, aqtalğan. Arızdanuşı Sayram audanı prokurorınıñ orınbasarı Nwrlan Saparov osı is boyınşa qayta şağımdanğannan keyin bir jıl altı ayğa bas bostandığı şektelip, raqımşılıq turalı zañğa säykes 2017 jılı bostandıqqa şıqqan.

Ayta keterlik jayt, halıqaralıq jäne otandıq täuelsiz sarapşılar men mediabaqılauşılar Qazaqstanda Qılmıstıq kodekstiñ «Jala jabu»(130-bap) äri «Qorlau» (131-bap) baptarı «jeleuletip» söz bostandığı jii şektelip, pikir erkindigi qısımğa wşıraytının aytadı. Soñğı kezderi Qazaqstanda da memlekettik tapsırıs alatın resmi BAQ-tardan bölek täuelsiz aqparat wyımdarına qısım arta tüsken. Sayasi özgeristerdiñ qızu nauqanı twsında ötken azamattıq qoğam men aşınğan jwrttıñ miting-şerulerinde tilşilerge birneşe ret kedergi keltirilip, tipti şabuıl da jasap, tilşilerge közdi jasauratatın gaz şaşqan. Şildede Almatıda qazaqstandıq adam qwqığın qorğau jäne zañdılıqtı saqtau byurosına baspasöz jiınına qatısuğa barğan Azattıq pen özge de BAQ tilşilerine «biliktiñ jaldamalıları» delinetin äyelder tobı qol jwmsap, käsibi tehnikasın sındırğan. Bir qızığı, policiya ökilderi BAQ ökilderiniñ qızmetine jasalğan kedergilerdi köre twra eşqanday şara qoldanbaydı. Şildedegi bassızdıqtıñ da artı swyılıp ketti, şabuıldauşılar turalı resmi mälimdeme jasalğan joq.

«Reporters Without Borders» halıqaralıq wyımınıñ reytingisinde söz bostandığı  boyınşa Qazaqstan 180 eldiñ işinde 158-orında twr.

"The Qazaq Times"