"تۇرمەدەگى ءتىلشى". بەلسەندىلەر سارىاعاش سوتىنىڭ ۇكىمىنە نارازى

بۇگىن شىمكەنت قوناقۇيلەرىنىڭ بىرىندە جەرگىلىكتى بەلسەندىلەر ايماقتاعى بەلگىلى جۋرناليست امانگەلدى باتىربەكوۆتى بوساتۋ تۋرالى ءباسپاسوز جيىنىن وتكىزىپ، قولداۋ كوميتەتىن قۇردى.

ازاتتىقتىڭ حابارلاۋىنشا، اۋداندىق «سارىاعاش ينفو» گازەتىنىڭ رەداكتورى، جۋرناليست امانگەلدى باتىربەكوۆكە قىركۇيەكتىڭ 23-ءى سارىاعاش اۋداندىق سوتى قىلمىستىق كودەكستىڭ «جالا جابۋ» (130-باپ) جانە «قورلاۋ» (131-باپ) باپتارى بويىنشا 2 جىل 3 ايعا باس بوستاندىعىنان ايىرۋعا ۇكىم شىعارعان. سوتتىڭ قابىلداعان ءۋاج-شەشىمىندە «باتىربەكوۆتىڭ Facebook پاراقشاسىنا جاريالاعان بەس جازباسىنا ارنايى ساراپتاما جاسالعان. ساراپتاما قورىتىندىسى بويىنشا «جابىرلەنۋشى، كەلەس اۋدانى ءبىلىم ءبولىمىنىڭ باسشىسى باقتيار ابديەۆتىڭ ار-نامىسىنا تيەتىن، قادىر-قاسيەتىن قورلايتىن سوزدەر بار ەكەنى انىقتالعان»، – دەلىنگەن.

ءىستى بولعان باق وكىلىن قولداۋعا ەلۋگە تارتا ازامات كەلىپ قاتىسقان. بەلسەندىلەردىڭ ءبىرى بريفينگتە «امانگەلدىگە بوستاندىق» دەگەن جازۋى بار پلاكات ۇستاپ وتىرعان دەسەدى ازاتتىق ءتىلشىسى ديلارا يسا. ءجۋرناليستىڭ جۇبايى ءارى قوعامدىق قورعاۋشىسى گۇلزادا بايمۇراتوۆا مەن ادۆوكاتى شىنار ەرمەكوۆا سوت تەرگەۋىندە «ءىس بىرجاقتى قارالىپ، باتىربەكوۆتىڭ قۇقىعى شەكتەلدى» دەپ مالىمدەدى.

ادۆوكات شىنار ەرمەكوۆانىڭ ايتۋىنشا، «سوت تەرگەۋى ەكى رەت امانگەلدى باتىربەكوۆتىڭ قاتىسۋىنسىز وتكەن. زاڭ بويىنشا ايىپتالۋشىنىڭ قاتىسۋىنسىز سوت تەرگەۋىن وتكىزۋگە تىيىم سالىنادى. ساراپتاما دا بىرجاقتى جاسالعان. باتىربەكوۆتىڭ سوتقا تۇسىرگەن بىرنەشە ءوتىنىشىنىڭ ەشبىرى، سونىڭ ىشىندە، سۋديا زاۋرە السەەۆاعا سەنىمسىزدىك بىلدىرگەنى دە قاناعاتتاندىرىلماعان».

- بۇل - سوت تەرگەۋىندەگى ورەسكەل قاتەلىك. سارىاعاش اۋداندىق سوتىنىڭ ۇكىمىنە اپەللياتسيالىق شاعىم تۇسىردىك، – دەيدى ادۆوكات ەرمەكوۆا. ءباسپاسوز جيىنىنىڭ قورىتىندى بولىمىندە «بوستاندىق» دەپ ۇرانداتقان بەلسەندىلەر «سىڭارجاق ۇكىمنىڭ قۇربانى» امانگەلدى باتىربەكوۆتى قولداۋ كوميتەتىن قۇرعان.

ازاتتىق ۇسىنعان دەرەكتەرگە سۇيەنسەك، امانگەلدى باتىربەكوۆتى 2015 جىلى كۇزدە سارىاعاش اۋداندىق سوتى قىلمىستىق كودەكستىڭ 130-بابىنىڭ ("جالا جابۋ") 3-بولىگى بويىنشا ءبىر جارىم جىلعا باس بوستاندىعىنان ايىرعان. قازاقستان پرەزيدەنتى نۇرسۇلتان نازارباەۆقا شاعىمدانعان سوڭ ءىس قايتا قارالىپ، اقتالعان. ارىزدانۋشى سايرام اۋدانى پروكۋرورىنىڭ ورىنباسارى نۇرلان ساپاروۆ وسى ءىس بويىنشا قايتا شاعىمدانعاننان كەيىن ءبىر جىل التى ايعا باس بوستاندىعى شەكتەلىپ، راقىمشىلىق تۋرالى زاڭعا سايكەس 2017 جىلى بوستاندىققا شىققان.

ايتا كەتەرلىك جايت، حالىقارالىق جانە وتاندىق تاۋەلسىز ساراپشىلار مەن مەدياباقىلاۋشىلار قازاقستاندا قىلمىستىق كودەكستىڭ «جالا جابۋ»(130-باپ) ءارى «قورلاۋ» (131-باپ) باپتارى «جەلەۋلەتىپ» ءسوز بوستاندىعى ءجيى شەكتەلىپ، پىكىر ەركىندىگى قىسىمعا ۇشىرايتىنىن ايتادى. سوڭعى كەزدەرى قازاقستاندا دا مەملەكەتتىك تاپسىرىس الاتىن رەسمي باق-تاردان بولەك تاۋەلسىز اقپارات ۇيىمدارىنا قىسىم ارتا تۇسكەن. ساياسي وزگەرىستەردىڭ قىزۋ ناۋقانى تۇسىندا وتكەن ازاماتتىق قوعام مەن اشىنعان جۇرتتىڭ ميتينگ-شەرۋلەرىندە تىلشىلەرگە بىرنەشە رەت كەدەرگى كەلتىرىلىپ، ءتىپتى شابۋىل دا جاساپ، تىلشىلەرگە كوزدى جاساۋراتاتىن گاز شاشقان. شىلدەدە الماتىدا قازاقستاندىق ادام قۇقىعىن قورعاۋ جانە زاڭدىلىقتى ساقتاۋ بيۋروسىنا ءباسپاسوز جيىنىنا قاتىسۋعا بارعان ازاتتىق پەن وزگە دە باق تىلشىلەرىنە «بيلىكتىڭ جالدامالىلارى» دەلىنەتىن ايەلدەر توبى قول جۇمساپ، كاسىبي تەحنيكاسىن سىندىرعان. ءبىر قىزىعى، پوليتسيا وكىلدەرى باق وكىلدەرىنىڭ قىزمەتىنە جاسالعان كەدەرگىلەردى كورە تۇرا ەشقانداي شارا قولدانبايدى. شىلدەدەگى باسسىزدىقتىڭ دا ارتى سۇيىلىپ كەتتى، شابۋىلداۋشىلار تۋرالى رەسمي مالىمدەمە جاسالعان جوق.

«Reporters Without Borders» حالىقارالىق ۇيىمىنىڭ رەيتينگىسىندە ءسوز بوستاندىعى  بويىنشا قازاقستان 180 ەلدىڭ ىشىندە 158-ورىندا تۇر.

"The Qazaq Times"