Qıtaylıq hakerler Australiyanıñ (Avstraliya) mamır ayındağı saylau nauqanına deyin Parlament pen üş iri partiyasına kiber-şabuıl jasağan. Bwl turalı Reuters agenttigi Australiyanıñ barlau agenttigindegi aqparat közderine silteme jasay otırıp habarladı. Atalğan aqparat agenttigine Qıtaydıñ hakerlik şabuılı turalı anıqtağan Australiyanıñ 5 birdey barlau qızmetkeri osınday mälimet bergen.

Atalğan aqparat közderiniñ mälimetine qarağanda, Australiyanıñ Wlttıq barlau qızmeti naurız ayındağı kiber-şabuıldı Qıtay Wlttıq qızmeti jağınan jasalğan degen qorıtındı şığaradı. Degenmen, Australiya barlau qızmetiniñ eki qızmetkeri anıqtalğan mälimettiñ maqsattı türde qwpiya saqtalğanın aytqan. Olardıñ aytuınşa, bwl mälimet eki el arasındağı sauda baylanısına keri äser etui mümkin. Australiya ükimeti kiber-şabuıl turalı mälimetti taratpağan. Äri, «Reyter» agenttiginiñ swraqtarına jauap beruden bas tartqan.

Qıtay SİM tarabı bwl turalı jauap bergende: «Bwnday mälimetti taratu üşin naqtı negiz boluı kerek, olay bolmağanda bwl elderdiñ qarım-qatınasına jäne twlğalardıñ bedeline nwqsan keltiredi», – dep qana qayırğan. Äri, Qıtaydıñ Australiyamen äriptestik ıntımaqtastıqtı saqtaytının aytqan.

Qıtay Australiyanıñ negizgi sauda seriktesi bolıp sanaladı. Qıtay köp mölşerdegi temir jäne kömir sekildi ken önimderin Australiyadan import etedi. Al, Qıtayğa kiretin eksportı Australiyanıñ jalpı eksportınıñ üşten birin ieleydi. Joğarıda söz etken «sauda baylanısına keri äserin tigizu» degen pikir osı iri sauda baylanısınan kelip şıqqan.

“The Qazaq Times”