رەيتەر: قىتاي اۋسترالياعا حاكەرلىك شابۋىل جاساعان

قىتايلىق حاكەرلەر اۋستراليانىڭ (اۆستراليا) مامىر ايىنداعى سايلاۋ ناۋقانىنا دەيىن پارلامەنت پەن ءۇش ءىرى پارتياسىنا كيبەر-شابۋىل جاساعان. بۇل تۋرالى Reuters اگەنتتىگى اۋستراليانىڭ بارلاۋ اگەنتتىگىندەگى اقپارات كوزدەرىنە سىلتەمە جاساي وتىرىپ حابارلادى. اتالعان اقپارات اگەنتتىگىنە قىتايدىڭ حاكەرلىك شابۋىلى تۋرالى انىقتاعان اۋستراليانىڭ 5 بىردەي بارلاۋ قىزمەتكەرى وسىنداي مالىمەت بەرگەن.

اتالعان اقپارات كوزدەرىنىڭ مالىمەتىنە قاراعاندا، اۋستراليانىڭ ۇلتتىق بارلاۋ قىزمەتى ناۋرىز ايىنداعى كيبەر-شابۋىلدى قىتاي ۇلتتىق قىزمەتى جاعىنان جاسالعان دەگەن قورىتىندى شىعارادى. دەگەنمەن، اۋستراليا بارلاۋ قىزمەتىنىڭ ەكى قىزمەتكەرى انىقتالعان مالىمەتتىڭ ماقساتتى تۇردە قۇپيا ساقتالعانىن ايتقان. ولاردىڭ ايتۋىنشا، بۇل مالىمەت ەكى ەل اراسىنداعى ساۋدا بايلانىسىنا كەرى اسەر ەتۋى مۇمكىن. اۋستراليا ۇكىمەتى كيبەر-شابۋىل تۋرالى مالىمەتتى تاراتپاعان. ءارى، «رەيتەر» اگەنتتىگىنىڭ سۇراقتارىنا جاۋاپ بەرۋدەن باس تارتقان.

قىتاي ءسىم تارابى بۇل تۋرالى جاۋاپ بەرگەندە: «بۇنداي مالىمەتتى تاراتۋ ءۇشىن ناقتى نەگىز بولۋى كەرەك، ولاي بولماعاندا بۇل ەلدەردىڭ قارىم-قاتىناسىنا جانە تۇلعالاردىڭ بەدەلىنە نۇقسان كەلتىرەدى»، – دەپ قانا قايىرعان. ءارى، قىتايدىڭ اۋستراليامەن ارىپتەستىك ىنتىماقتاستىقتى ساقتايتىنىن ايتقان.

قىتاي اۋستراليانىڭ نەگىزگى ساۋدا سەرىكتەسى بولىپ سانالادى. قىتاي كوپ مولشەردەگى تەمىر جانە كومىر سەكىلدى كەن ونىمدەرىن اۋستراليادان يمپورت ەتەدى. ال، قىتايعا كىرەتىن ەكسپورتى اۋستراليانىڭ جالپى ەكسپورتىنىڭ ۇشتەن ءبىرىن يەلەيدى. جوعارىدا ءسوز ەتكەن «ساۋدا بايلانىسىنا كەرى اسەرىن تيگىزۋ» دەگەن پىكىر وسى ءىرى ساۋدا بايلانىسىنان كەلىپ شىققان.

“The Qazaq Times”