Jañaözen halqı: qıtaylıq 55 zauıttıñ salınuına qarsımız

Bügin kündiz Mañğıstau oblısı Jañaözen qalasında jergilikti halıq qıtaylıq 55 zauıttıñ Qazaqstanda salınuına qarsı jiın ötkizdi.

Äkimdik mañına jinalğan jüzge tarta twrğın «Qıtaydan qaysıbir sau zauıt keledi deysiñ» dep käsibiligine kümän keltirip, şeteldik biznes sektordıñ keluin qıtaylıq kadrlardı tartudıñ astırtın jobası dep sanaytının ayttı. Köpşilik «keleşegimizdi oylayıq, auızbirşilikte bolayıq» dep wrandastı.

Jinalğandar «Biz otız jılda jeriniñ astında Mendeleevtiñ bükil elementi bar memlekette eñ soñı künimiz eki siırğa qarağan hälge jettik» degen orta jastağı er adamnıñ sözin qoldaytının bildirip baqtı. Narazılar «bilik basındağılarğa» «Qıtay turalı taqırıptı jabu kerek» dep talap qoydı. Sonımen qatar azamattar el prezidenti Qasım-Jomart Toqaevqa 11-12 qırküyekte Qıtayğa josparlanğan resmi is-sapardan bas tartuın swrap, ündeu jariyaladı.

Narazılıqta eñ jii aytılğan lozungtik talaptar: «55 zauıttı alıp kelu – qazaqtıñ basına kün tuğanı», «Biz jañaözendikter qıtaylıq 55 zauıttıñ kirgiziluine qarsımız», «Bizge gaz, jol mäselesinen de mañızdısı  55 zauıttı alıp kelmeu».

Äkimdik ökili men äkim orınbasarı Amanğali Nwrdäuletov narazılar aldına şığıp, mekeme zalına kirudi, sonda arız jazudı wsındı. Jañaözendikterdiñ narazılıq akciyasına qwqıq qorğau organdarı kedergi keltirgen joq. Qıtay ekspanciyasına qarsılıq köñil-küy soñğı kezderi qayta küşeyip, piket-jiın türindegi qarsılıq şaraları elimizdiñ tükpir-tükpirinen boy körsete bastadı.

Azattıq radiosınıñ habarlauınşa, QHR – Qazaqstanğa eñ köp investiciya qwyatın – törtinşi, eñ köp qarız beretin üşinşi el. Al Qıtay biligi «Qazaqstandı şikizat közi, sauda narığı jäne tranzit aymağı retinde paydalanadı». Bıltır Beyjiñ Qazaqstanğa 2 milliard 62 million yuan' köleminde nesie bergen. Jalpı jiını astananıñ Beyjiñge qarızı 12 milliard AQŞ dollardan asadı desedi. Youtube videohostinginde jariyalanğan jiınnıñ äuesqoy tüsirilimi:

"The Qazaq Times"