Memleket basşısı Q.Toqaevtı Atırau oblısınıñ äkimi N.Noğaev kütip aluda. 5 qırküyek 2019 jıl. Foto: Berik Uälidiñ feyzbuk paraqşasınan

5 qırküyek tüs mezgilinde el prezidenti  Qasım-Jomart Toqaev jwmıs saparımen Atırau oblısına keldi.

Memleket basşısınıñ is-saparı jaylı onıñ hatşısı Berik Uäli öziniñ jeke paraqşasında:

– Memleket basşısı oblıstıñ mwnay servistik käsiporındarınıñ birine barıp, Qazaqstannıñ mwnay-gaz salasın damıtu mäseleleri jöninde keñeytilgen keñes ötkizedi.

Sapar bağdarlamasına sonday-aq Qasım-Jomart Toqaevtıñ Qazaqstan mwnayınıñ 120 jıldığına arnalğan saltanattı jiınğa qatısuı josparlanğan, – dep jazdı.

Aqorda saytı men äleumettik jelilerdegi paraqşalarında äli resmi aqparat jariyalana qoyğan joq.  Berik Uäli wsınğan materialğa qarağanda, Toqaevtı 2016 jıldıñ 26 naurızınan öñirdi basqarıp kele jatqan oblıs äkimi Nwrlan Noğaev kütip alğan.

650 mıñğa tarta twrğını bar oblıstağı Teñiz ken ornı men Kaspiy qayrañındağı mwnay qorı Qazaqstan boyınşa anıqtalğan qorlar men resurstardıñ 80%-ın qwraydı. Üş künnen beri «Qazaqstanda jüzege asırılatın Qıtaymen birlesken 55 jobağa qarsılıq», «Qıtay ekspansiyasına» narazılıq bildirip, prezidenttiñ keluin, atalmış ekonomikalıq şeşimnen bas tartuın talap etip, Toqaevtan qırküyektiñ 11-12-sine josparlanğan QHR-na barmauın swrağan jañaözendikterge prezident äzirge moyın bwra qoyğan joq.

Esteriñizge sala ketsek, 2 qırküyekten beri Jañaözen qalasında bastalıp, respublikanıñ 10 şaqtı qalasında qoldau tapqan «Qıtay ekspansiyasına» qarsılıq akciyaların İİM «rwqsat etilmegen jiın» retinde tanıp, «atalmış 55 zauıt köşiriletinin» joqqa şığarğan edi. Söyte twra Almatı qalası äkiminiñ orınbasarı Saparbek Twyaqbaev 55 zauıttı ekonomikalıq-investiciyalıq birlesken joba ekenin rastap, «Türkistan oblısındağı tüye sütin öndiretin» käsiporının mısalğa keltirdi. Keşegi narazılıqta söz arasında Twyaqbaev Qıtaydan basqa da köptegen örkenietti, damığan eldermen jalpı jiını «iri 185 joba jasalğandığın» mälimdep, mwnıñ ekonomikalıq qajettilik ekenin tüsindiruge tırıstı.

Qala äkiminiñ orınbasarı Saparbek Twyaqbaev narazılarğa 55 jobanıñ büge-şügesine deyin tüsindirip beruge dayın ekenin aytıp twr. Almatı qalası. 4 qırküyek 2019 jıl. Foto: QT

Köşirilmeytin, – birlesip salınatın jobalar jaylı  2019 jılı säuirde Qazaqstannıñ eks-prezidenti N.Nazarbaev Beyjiñde ötken «Bir beldeu – bir jol» forumında Qıtaydıñ Qazaqstandağı 55 iri jobasınıñ 15-i jwmısın bastağanın, 11 nısan biıl paydalanuğa beriletinin aytqan edi.

"The Qazaq Times"