Resey tarabı yadrolıq kelisimdegi talaptardı öreskel bwzdı jäne halıqaralıq qauipsizdikke nwqsan keltirip otır dep Qwrama Ştattarına ayıp taqtı.

«Izvestiya»-ğa mälimdeme jasağan reseylik Sırtqı barlau qızmeti: «AQŞ maqsattı türde memleketterdiñ qauipsizdik salasına qauip töndiretin äreketterge köşken. mäselen, Amerika Venesuela dağdarısı men Süriya jağdayında tek kelissözder ötkizumen şektelip qaldı, kömek tigizgen joq. Sol sebepti yadrolıq kelisimdegi talaptardı da orındağan joq dep ayta alamız», – degen. Reseydiñ bwl ayıptaularına AQŞ birinşi kezekte Mäskeudiñ agressiyalıq sayasat wstanudı doğarar degen ümit bildirgen.

Negizinen Amerika men Resey arasındağı zımıran kelisimine 1987 jılı qol qoyılğan. Kelisimge säykes, qos tarapqa 500 jäne 5,5 mıñ şaqırım qaşıqtıqqa wşatın ballistikalıq zımırandardı jasauğa tıyım salınğan. Biıl 1 aqpanda AQŞ prezidenti Donal'd Tramp Reseymen jasasqan 30 jıldıq tarihı bar orta qaşıqtıqqa wşatın zımırandarğa qatıstı kelisimdi toqtatatının habarladı. Aq üy köp uaqıttan beri Reseydi qol qoyğan kelisimge qayşı qadamdar jasap, AQŞ jäne onıñ odaqtastarına qater töndiretin zımırandar men jüyelerdi jasap, qoldandı dep ayıptaydı. Bwl kelisimge qatıstı NATO Bas hatşısı Yens Stoltenberg Reseydiñ biraz uaqıt köleminde talaptarğa qayşı äreket etkenin mälimdedi.

AQŞ-tıñ Resey Federaciyasımen tağı bir kelisimi bar. Oğan 2010 jılı Barak Obama men Dmitriy Medvedev qol qoyğan edi. Osı qwjatqa säykes, qos taraptıñ da yadrolıq qaru arsenalın qısqartuı közdelgen. Onıñ merzimi 2021 jılı ayaqtaladı.

Sonımen, Qwrama Ştattarınıñ Reseymen ekijaqtı kelisimdi bwzuı qayta qarulanu bäsekesiniñ bwrınğıdan da quattıraq ekendigin bildirse kerek. Tağı bir ayta keter jayt, Resey Federaciyasınıñ äskeri doktrinasınıñ 24 böliminde: «Resey özine jäne odaqtastarına qarsı yadrolıq qaru qoldanğan arandatuşa elge däl solay jauap beruge jäne Reseydiñ memlekettigine qauip töndiretin kez kelgen jağdayda yadrolıq qaru qoldanuğa qwqılı» delingen.

"The Qazaq Times"