رەسەي تارابى يادرولىق كەلىسىمدەگى تالاپتاردى ورەسكەل بۇزدى جانە حالىقارالىق قاۋىپسىزدىككە نۇقسان كەلتىرىپ وتىر دەپ قۇراما شتاتتارىنا ايىپ تاقتى.

«يزۆەستيا»-عا مالىمدەمە جاساعان رەسەيلىك سىرتقى بارلاۋ قىزمەتى: «اقش ماقساتتى تۇردە مەملەكەتتەردىڭ قاۋىپسىزدىك سالاسىنا قاۋىپ توندىرەتىن ارەكەتتەرگە كوشكەن. ماسەلەن، امەريكا ۆەنەسۋەلا داعدارىسى مەن ءسۇريا جاعدايىندا تەك كەلىسسوزدەر وتكىزۋمەن شەكتەلىپ قالدى، كومەك تيگىزگەن جوق. سول سەبەپتى يادرولىق كەلىسىمدەگى تالاپتاردى دا ورىنداعان جوق دەپ ايتا الامىز»، – دەگەن. رەسەيدىڭ بۇل ايىپتاۋلارىنا اقش ءبىرىنشى كەزەكتە ماسكەۋدىڭ اگرەسسيالىق ساياسات ۇستانۋدى دوعارار دەگەن ءۇمىت بىلدىرگەن.

نەگىزىنەن امەريكا مەن رەسەي اراسىنداعى زىمىران كەلىسىمىنە 1987 جىلى قول قويىلعان. كەلىسىمگە سايكەس، قوس تاراپقا 500 جانە 5,5 مىڭ شاقىرىم قاشىقتىققا ۇشاتىن بالليستيكالىق زىمىرانداردى جاساۋعا تىيىم سالىنعان. بيىل 1 اقپاندا اقش پرەزيدەنتى دونالد ترامپ رەسەيمەن جاساسقان 30 جىلدىق تاريحى بار ورتا قاشىقتىققا ۇشاتىن زىمىراندارعا قاتىستى كەلىسىمدى توقتاتاتىنىن حابارلادى. اق ءۇي كوپ ۋاقىتتان بەرى رەسەيدى قول قويعان كەلىسىمگە قايشى قادامدار جاساپ، اقش جانە ونىڭ وداقتاستارىنا قاتەر توندىرەتىن زىمىراندار مەن جۇيەلەردى جاساپ، قولداندى دەپ ايىپتايدى. بۇل كەلىسىمگە قاتىستى ناتو باس حاتشىسى يەنس ستولتەنبەرگ رەسەيدىڭ ءبىراز ۋاقىت كولەمىندە تالاپتارعا قايشى ارەكەت ەتكەنىن مالىمدەدى.

اقش-تىڭ رەسەي فەدەراتسياسىمەن تاعى ءبىر كەلىسىمى بار. وعان 2010 جىلى باراك وباما مەن دميتري مەدۆەدەۆ قول قويعان ەدى. وسى قۇجاتقا سايكەس، قوس تاراپتىڭ دا يادرولىق قارۋ ارسەنالىن قىسقارتۋى كوزدەلگەن. ونىڭ مەرزىمى 2021 جىلى اياقتالادى.

سونىمەن، قۇراما شتاتتارىنىڭ رەسەيمەن ەكىجاقتى كەلىسىمدى بۇزۋى قايتا قارۋلانۋ باسەكەسىنىڭ بۇرىنعىدان دا قۋاتتىراق ەكەندىگىن بىلدىرسە كەرەك. تاعى ءبىر ايتا كەتەر جايت، رەسەي فەدەراتسياسىنىڭ اسكەري دوكتريناسىنىڭ 24 بولىمىندە: «رەسەي وزىنە جانە وداقتاستارىنا قارسى يادرولىق قارۋ قولدانعان ارانداتۋشا ەلگە ءدال سولاي جاۋاپ بەرۋگە جانە رەسەيدىڭ مەملەكەتتىگىنە قاۋىپ توندىرەتىن كەز كەلگەن جاعدايدا يادرولىق قارۋ قولدانۋعا قۇقىلى» دەلىنگەن.

"The Qazaq Times"