Almatılıq belsendi jastar «Konstituciyanı reformalau» turalı marş ötkizdi

Tamızdıñ 30-ı QR Konstituciyası küni Almatı qalasında Oyan, Qazaqstan azamattıq qozğalısı belsendileriniñ qatısuımen şeru marşı ötti.

Sağat 17:10-dar şamasında bastalğan şeruge qatısuşı 30 şaqtı belsendi Konstituciyanı reformalaudı talap etip, özderiniñ konstituciyalıq deñgeyde kepildendirilgen qwqıqtarı men bostandıqtarın bilik esine salatının ayttı. «Parlamenttik respublika», «Renkonstituciya» degen jazuı bar kölemdi bannerlerdi qolına wstağan marş qatısuşıları jol boyı «Oyan, Qazaqstan», «Konstituciya reforması üşin», «Meniñ tañdauım bar», «Sayasi twtqındarğa bostandıq», «Avtoritarizmge qarsımız» lozungtarın wrandap jürip ötti.

Jibek jolı köşesinde ornalasqan Arbattan bastalıp Abay atındağı opera jäne balet teatrına deyin jalğastı. Astana alañınıñ (bwrınğı QBTU)  aldına kelip, biraz ayaldağan top belsendisi Äsem Japişeva «Biz avtoritarlıq rejimniñ negizin qalağan konstituciyanı özgertetin uaqıt keldi. Biz mwnday memleket qwrğımız kelmeydi, konstituciyalıq reformalauğa arnalğan wsınıstarımızdı öz platformamızda jariyaladıq» dep mälimdedi.

– Qazaqstannıñ prezidenttik basqaru jüyesinen bas tartatın kezi keldi. Elimiz parlamenttik respublika boluı kerek. Qoğam demokratiyağa zäru. Elimiz demokratiyağa dayın emes siyaqtı tirkesterdiñ mäni joq. Özgeris jasaytın kez keldi. Biz ülgi etetin elderde öz pikirin tanıtatın şerulerdi bilikke eskertse, ökinişke oray bizde rwqsat swraydı, – dedi azamattıq qoğam belsendileriniñ biri Dimaş Al'janov marş barısında.

Merekelik kün retinde demalıs uaqıtına arnayı josparlanğan şaranıñ talap-şarttarı turalı qozğalıs ökilderi osı uaqıtqa deyin äleumettik jeli arqılı habarlağan edi. Onda «Bizdiñ beybit Marştıñ maqsatı – Oyan, Qazaqstan mälimdemesinde körsetilgen konstituciyanı reformalaudı talap etu. Bwl sonımen birge tuğan köşeler bizge – halıqqa tiesili ekenin, Konstituciyamen kepildendirilgen qwqıqtar men bostandıqtarımız turalı biliktiñ esine tüsiru», – dep körsetilgen. Azamattıq qozğalıs ökilderiniñ aytuınşa, atalmış şaranıñ ötetini turalı habarlanğannan keyin birqatar belsendilerdi «policiya, äkimdik qızmetkerleri qorqıtıp jäne arnayı qızmet ökilderi añduğa tüsken». Osığan deyin  eki ay ilgeri el prezidenti Q.Toqaev Euronews-ke bergen swhbatında Oyan, Qazaqstan jaqtastarı men belsendileriniñ öte kreativti ekenin söz etip, jastardı memleketti basqaru isine tartatınıñ aytqanın eske alıp, soğan qaramastan qudalau isiniñ jürip jatqanın «Prezident (Toqaev) mırza, bwl sizdiñ jastardıñ kreativtiligine jauabıñız ba?» dep sınadı.

Konstituciya küni Almatı, Şımkent qalaları men el astanasında osı sipattağı Atazañdı tüpkilikti reformalauğa qatıstı birneşe qarsılıq şaraları ötti. Almatı qalasında ötken qozğalıs marşında qwqıq qorğau organdarı tarapınan oqıs wstau-qamau äreketteri bolğan joq. Azamattıq kiim ülgisindegi belgisiz adamdar beynekamerağa tüsirip, topppen erip jürdi.

Marşqa qatısuşı jas belsendiler. Almatı qalası. 30 tamız 2019 jıl. Foto: Vlast/ YU.Korosteleva

"The Qazaq Times"