Körneki suret. Foto: aşıq derekköz

Qazaqstandıq eriktiler arıstıq oquşılarğa 900 mıñ teñgege juıq jılu jiıp, jaña oqu jılına dayındıqqa atsalısuda.

Mausımnıñ 24-i küni bolğan asa iri jarılıstan soñ Arıs jwrtşılığına ärtürli deñgeyde respublika halqı qol wşın sozıp, qayırımdılıq tanıtqan edi. Sol twsta azamattıq qoğam ökilderi bir auızdan el belsendileriniñ basın biriktiretin feyzbuk paraqşasınan «Arıs. Aqparat» tobın qwrğan, sonda wyımdastıru şaraları talqılanıp, esep berilip otıradı.

Tötenşe jağday kezinde san aluan azıq-tülik, qajetti qwral-bwyımdarmen qamtamasız etuge tırısqan eriktiler tobı bwl jolı arıstıqtardıñ mektepke dayındıq nauqanına bolısıp, öz ülesin qosuda. Qoğam belsendisi, jurnalist Bella Orınbetovanıñ mälimdeuinşe, eki jwmanıñ işinde habarlandırudan keyin respublikanıñ är aymağınan jüzdegen azamattıñ atsalısuımen 900 mıñğa juıq qarajat jinalğan. Bwl somağa arıstıq 300 balağa jaña oqu jılına qajetti ryukzak, däpter, qarındaş satıp alınğan. Ryukzak işinde: 20 däpter (10 tor köz, 10 jol däpter), 3 qalam, 3 qarındaş, 1 türli-tüsti qarındaş jinağı, 1 flamaster jinağı, 1 sızğış, öşirgiş pen  wştağış, al'bom, türli-tüsti qağaz jinağı, jelim, qaptama däpterdiñ tısı qamtılğan. Tipti, eriktiler balaqaylarğa su jaña sömkemen birge mazmwnı motivaciya men pozitivke tolı hat tabıstağan.

Belsendi jastar kömekke mwqtaj otbasılardıñ tizimin äkimdikten alğan. «Biz bwğan deyin äkimdikten «Jaña oqu jılı qarsañında otbasılarğa kömek berile me, berilmey me» dep swrağanbız. Olar oğan şamamız jetpeydi dep ayttı. Osılayşa özimiz jasayıq dep kelistik», – deydi Bella Orınbetova.

Atalmış akciyağa «Oyan, Qazaqstan», Şımkent qalası jastar resursınıñ jäne Arıs qalasınıñ volonterleri ün qosısıp, igi şarağa mwrındıq bolğan.

"The Qazaq Times"