ەرىكتىلەر ارىستىق 300 وقۋشىعا مەكتەپ قۇرالدارىن سىيلادى

قازاقستاندىق ەرىكتىلەر ارىستىق وقۋشىلارعا 900 مىڭ تەڭگەگە جۋىق جىلۋ جيىپ، جاڭا وقۋ جىلىنا دايىندىققا اتسالىسۋدا.

ماۋسىمنىڭ 24-ءى كۇنى بولعان اسا ءىرى جارىلىستان سوڭ ارىس جۇرتشىلىعىنا ءارتۇرلى دەڭگەيدە رەسپۋبليكا حالقى قول ۇشىن سوزىپ، قايىرىمدىلىق تانىتقان ەدى. سول تۇستا ازاماتتىق قوعام وكىلدەرى ءبىر اۋىزدان ەل بەلسەندىلەرىنىڭ باسىن بىرىكتىرەتىن فەيزبۋك پاراقشاسىنان «ارىس. اقپارات» توبىن قۇرعان، سوندا ۇيىمداستىرۋ شارالارى تالقىلانىپ، ەسەپ بەرىلىپ وتىرادى.

توتەنشە جاعداي كەزىندە سان الۋان ازىق-تۇلىك، قاجەتتى قۇرال-بۇيىمدارمەن قامتاماسىز ەتۋگە تىرىسقان ەرىكتىلەر توبى بۇل جولى ارىستىقتاردىڭ مەكتەپكە دايىندىق ناۋقانىنا بولىسىپ، ءوز ۇلەسىن قوسۋدا. قوعام بەلسەندىسى، جۋرناليست بەللا ورىنبەتوۆانىڭ مالىمدەۋىنشە، ەكى جۇمانىڭ ىشىندە حابارلاندىرۋدان كەيىن رەسپۋبليكانىڭ ءار ايماعىنان جۇزدەگەن ازاماتتىڭ اتسالىسۋىمەن 900 مىڭعا جۋىق قاراجات جينالعان. بۇل سوماعا ارىستىق 300 بالاعا جاڭا وقۋ جىلىنا قاجەتتى ريۋكزاك، داپتەر، قارىنداش ساتىپ الىنعان. ريۋكزاك ىشىندە: 20 داپتەر (10 تور كوز، 10 جول داپتەر), 3 قالام، 3 قارىنداش، 1 ءتۇرلى-ءتۇستى قارىنداش جيناعى، 1 فلاماستەر جيناعى، 1 سىزعىش، وشىرگىش پەن  ۇشتاعىش، البوم، ءتۇرلى-ءتۇستى قاعاز جيناعى، جەلىم، قاپتاما داپتەردىڭ تىسى قامتىلعان. ءتىپتى، ەرىكتىلەر بالاقايلارعا سۋ جاڭا سومكەمەن بىرگە مازمۇنى موتيۆاتسيا مەن پوزيتيۆكە تولى حات تابىستاعان.

بەلسەندى جاستار كومەككە مۇقتاج وتباسىلاردىڭ ءتىزىمىن اكىمدىكتەن العان. «ءبىز بۇعان دەيىن اكىمدىكتەن «جاڭا وقۋ جىلى قارساڭىندا وتباسىلارعا كومەك بەرىلە مە، بەرىلمەي مە» دەپ سۇراعانبىز. ولار وعان شامامىز جەتپەيدى دەپ ايتتى. وسىلايشا ءوزىمىز جاسايىق دەپ كەلىستىك»، – دەيدى بەللا ورىنبەتوۆا.

اتالمىش اكتسياعا «ويان، قازاقستان»، شىمكەنت قالاسى جاستار رەسۋرسىنىڭ جانە ارىس قالاسىنىڭ ۆولونتەرلەرى ءۇن قوسىسىپ، يگى شاراعا مۇرىندىق بولعان.

"The Qazaq Times"