Bügin erteñgilik üş adamnan twratın al'pinister tobı (Mwrat Ötepbaev, Andrey Korneev jäne ökpe qabınuınan qaytıs bolğan Aleksandr Çeçulin) iz-tüzsiz joğalıp, baylanıssız qalğan. Bwl turalı Almatı äkimi äleumettik jelide jariyalağan.

"Tañ ata dabıldı habar jetti: İle Alatauınıñ qırğız jağında qazaqstandıq bir top al'pinister iz-tüzsiz joğalıp ketken. Jigitterimiz Qırğızstan aumağında bolğandıqtan, SİM men İİM jwmıstı üylestirudemiz. İİM izdeu-qwtqaru jwmıstarı bastaldı. Hantäñiri tauınan izdestiru ornına qwramında tauda jayau jürip izdeytin qwtqaratın top bar tikwşaq jiberildi. Qiındığı sol, tikwşaq biik şıñdar üstimen wşa almaydı. Şıñnıñ biiktigi 4500 metr. Odan äri qaray izdestiru tobı men eriktiler jwmıstarın bastaydı. Qırğız äriptesterimiz qoldau körsetedi dep senemiz", – dep jazdı Baqıtjan Sağıntaev instagram jelisinde.

Sonımen qatar, jağdaydı öz baqılauına alğan B.Sağıntaev sağat 15-ter şamasında intasgram paraqşasında QR Qorğanıs ministrliginiñ üş äskeri al'pinisi qwtqaru operaciyasın orındau üşin «Qazaviaqwtqarudıñ» MI-703 (171) tikwşağımen jiberilgendigin mälimdedi. Maqswt Jwmaev basqaruındağı toptağı "Qwtqaruşılardıñ şıñğa şığuda täjiribe jinaqtağan nağız mamandar ekenin atap ötkim keledi", – dedi ol. Sağıntaev qwtqaruşılardıñ Istıqköl oblısındağı (Qırğızstan) Qaraköl qalasına jiberiletinin, «qwtqaru otryadı joğalğan al'pinister tirkelgen «AK-SAI TRAVEL» turkompaniyasınıñ lagerine baradı. Olar qajetti qondırğılarmen tolıq jabdıqtalğan», – dep ayttı.

Almatı qalası äkimi B.Sağıntaevtıñ joğalğan al'pinister turalı äleumettik jelidegi jazbası. 19 tamız 2019 jıl. Foto: sagintayev.b instagram paraqşasınan skrinşot

Habar-oşarsız joğalıp ketken al'pinister Qırğızstandağı 7439 metrlik Jeñis şıñınıñ joğarğı jağına köterilgen. Tyan'-Şan'nıñ joğarğı şıñına şığu bağıtı al'pinizmdegi eñ kürdeli, yağni 5-6-şı sanatına jatatın biik, eñseru qiın şıñdardıñ biri. Äzirge belgili aqparat, topta Mwrat Ötepbaev, Andrey Korneev bar jäne Aleksandr Çeçulin ökpesiniñ qabınuınan köz jwmğan.

Bügin al'pinisterdiñ biri Mwrat Ötepbaevtıñ qızı Aygül äleumettik jelide "Üş al'pinisten qwralğan top Jeñis şıñında şamamen 6600 metr biiktikte qalıp qoydı, sol jerden ne tömen tüse almay, ne sonda qala almaydı. Tabiği jağdaylar men jabdıqtardıñ jetispeui toptıñ bazalıq lager'ge uaqıtında tüsuine mümkindik bermedi. Aman qalğan Mwrat Ötepbaev pen Andrey Korneev eşkimmen baylanısa almaydı", – degen jazbasımen bölisip, mümkindiginşe dereu kömektesuin swrağan. Belgili bolğanday Mwrat Ötepbaev al'pinizmde 13 jıldıq täjiribesi  bar sport şeberine kandidat, Alpine Asia Team bapkeri, tört balanıñ äkesi.

13 jıldıq täjiribesi bar sport şeberine kandidat, al'pinist Mwrat Ötepbaev turalı äleumettik jelidegi jazba. 19 tamız 2019 jıl. Foto: @baktybala instagram paraqşasınan skrinşot

Al'pinisterdiñ biri Andrey Korneev turalı äleumettik jelidegi jazba. 19 tamız 2019 jıl. Foto: @baktybala instagram paraqşasınan skrinşot

Qazaqstandıq äskeri qızmetşiler dabıl boyınşa köterilip, tolıq jauıngerlik äzirlikte twr. QR İİM TJK bölgen tikwşaqpen 4400 metr biiktiktegi bazalıq lager'ge köteriludi josparlauda jäne jayau izdestiru jwmıstarı jalğasuda.

QR Qorğanıs ministrligi baspasöz qızmetiniñ mälimeti boyınşa qwtqaru tobında – kapitan Maqswt Jwmaev, mayor Amanjol Rahmetov, top basşısı – ağa leytenant Vasiliy Pivcov bar.

«Atalğan operaciya aua-rayınıñ naşarlığına baylanıstı kürdelenude. Mwnday biiktikte jwmıs jasau üşin kün-rayına beyimdelgen qwtqaruşılardı jiberu asa mañızdı. Bwl operaciyada Europadağı biik şıñdardı bağındırıp jürgen, Reseyde ötken «El'brus şeñberi-2019» halıqaralıq sayısına qatısuşıları jwmıluda», – dep habarladı Qorğanıs ministrliginiñ baspasöz qızmeti. Qazaqstannıñ TJ komiteti habarlağanday, tau jaqta bügin de qar jauıp twr.

"The Qazaq Times"