اسكەري الپينيستەردەن قۇرالعان قۇتقارۋشى وترياد تىكۇشاقپەن ىزدەستىرۋ جۇمىستارىنا كىرىسكەن. 19 تامىز 2019 جىل. فوتو: فوتو: @sagintayev.b ينستاگرام پاراقشاسىنان

بۇگىن ەرتەڭگىلىك ءۇش ادامنان تۇراتىن الپينيستەر توبى (مۇرات وتەپباەۆ، اندرەي كورنەەۆ جانە وكپە قابىنۋىنان قايتىس بولعان الەكساندر چەچۋلين) ءىز-ءتۇزسىز جوعالىپ، بايلانىسسىز قالعان. بۇل تۋرالى الماتى اكىمى الەۋمەتتىك جەلىدە جاريالاعان.

"تاڭ اتا دابىلدى حابار جەتتى: ىلە الاتاۋىنىڭ قىرعىز جاعىندا قازاقستاندىق ءبىر توپ الپينيستەر ءىز-ءتۇزسىز جوعالىپ كەتكەن. جىگىتتەرىمىز قىرعىزستان اۋماعىندا بولعاندىقتان، ءسىم مەن ءىىم جۇمىستى ۇيلەستىرۋدەمىز. ءىىم ىزدەۋ-قۇتقارۋ جۇمىستارى باستالدى. ءحانتاڭىرى تاۋىنان ىزدەستىرۋ ورنىنا قۇرامىندا تاۋدا جاياۋ ءجۇرىپ ىزدەيتىن قۇتقاراتىن توپ بار تىكۇشاق جىبەرىلدى. قيىندىعى سول، تىكۇشاق بيىك شىڭدار ۇستىمەن ۇشا المايدى. شىڭنىڭ بيىكتىگى 4500 مەتر. ودان ءارى قاراي ىزدەستىرۋ توبى مەن ەرىكتىلەر جۇمىستارىن باستايدى. قىرعىز ارىپتەستەرىمىز قولداۋ كورسەتەدى دەپ سەنەمىز", – دەپ جازدى باقىتجان ساعىنتاەۆ ينستاگرام جەلىسىندە.

سونىمەن قاتار، جاعدايدى ءوز باقىلاۋىنا العان ب.ساعىنتاەۆ ساعات 15-تەر شاماسىندا ينتاسگرام پاراقشاسىندا قر قورعانىس مينيسترلىگىنىڭ ءۇش اسكەري ءالپينيسى قۇتقارۋ وپەراتسياسىن ورىنداۋ ءۇشىن «قازاۆياقۇتقارۋدىڭ» مي-703 (171) تىكۇشاعىمەن جىبەرىلگەندىگىن مالىمدەدى. ماقسۇت جۇماەۆ باسقارۋىنداعى توپتاعى "قۇتقارۋشىلاردىڭ شىڭعا شىعۋدا تاجىريبە جيناقتاعان ناعىز ماماندار ەكەنىن اتاپ وتكىم كەلەدى", – دەدى ول. ساعىنتاەۆ قۇتقارۋشىلاردىڭ ىستىقكول وبلىسىنداعى (قىرعىزستان) قاراكول قالاسىنا جىبەرىلەتىنىن، «قۇتقارۋ وتريادى جوعالعان الپينيستەر تىركەلگەن «AK-SAI TRAVEL» تۋركومپانياسىنىڭ لاگەرىنە بارادى. ولار قاجەتتى قوندىرعىلارمەن تولىق جابدىقتالعان»، – دەپ ايتتى.

الماتى قالاسى اكىمى ب.ساعىنتاەۆتىڭ جوعالعان الپينيستەر تۋرالى الەۋمەتتىك جەلىدەگى جازباسى. 19 تامىز 2019 جىل. فوتو: sagintayev.b ينستاگرام پاراقشاسىنان سكرينشوت

حابار-وشارسىز جوعالىپ كەتكەن الپينيستەر قىرعىزستانداعى 7439 مەترلىك جەڭىس شىڭىنىڭ جوعارعى جاعىنا كوتەرىلگەن. تيان-شاننىڭ جوعارعى شىڭىنا شىعۋ باعىتى الپينيزمدەگى ەڭ كۇردەلى، ياعني 5-6-شى ساناتىنا جاتاتىن بيىك، ەڭسەرۋ قيىن شىڭداردىڭ ءبىرى. ازىرگە بەلگىلى اقپارات، توپتا مۇرات وتەپباەۆ، اندرەي كورنەەۆ بار جانە الەكساندر چەچۋلين وكپەسىنىڭ قابىنۋىنان كوز جۇمعان.

بۇگىن الپينيستەردىڭ ءبىرى مۇرات وتەپباەۆتىڭ قىزى ايگۇل الەۋمەتتىك جەلىدە "ءۇش الپينيستەن قۇرالعان توپ جەڭىس شىڭىندا شامامەن 6600 مەتر بيىكتىكتە قالىپ قويدى، سول جەردەن نە تومەن تۇسە الماي، نە سوندا قالا المايدى. تابيعي جاعدايلار مەن جابدىقتاردىڭ جەتىسپەۋى توپتىڭ بازالىق لاگەرگە ۋاقىتىندا تۇسۋىنە مۇمكىندىك بەرمەدى. امان قالعان مۇرات وتەپباەۆ پەن اندرەي كورنەەۆ ەشكىممەن بايلانىسا المايدى", – دەگەن جازباسىمەن ءبولىسىپ، مۇمكىندىگىنشە دەرەۋ كومەكتەسۋىن سۇراعان. بەلگىلى بولعانداي مۇرات وتەپباەۆ الپينيزمدە 13 جىلدىق تاجىريبەسى  بار سپورت شەبەرىنە كانديدات، Alpine Asia Team باپكەرى، ءتورت بالانىڭ اكەسى.

13 جىلدىق تاجىريبەسى بار سپورت شەبەرىنە كانديدات، الپينيست مۇرات وتەپباەۆ تۋرالى الەۋمەتتىك جەلىدەگى جازبا. 19 تامىز 2019 جىل. فوتو: @baktybala ينستاگرام پاراقشاسىنان سكرينشوت

الپينيستەردىڭ ءبىرى اندرەي كورنەەۆ تۋرالى الەۋمەتتىك جەلىدەگى جازبا. 19 تامىز 2019 جىل. فوتو: @baktybala ينستاگرام پاراقشاسىنان سكرينشوت

قازاقستاندىق اسكەري قىزمەتشىلەر دابىل بويىنشا كوتەرىلىپ، تولىق جاۋىنگەرلىك ازىرلىكتە تۇر. قر ءىىم تجك بولگەن تىكۇشاقپەن 4400 مەتر بيىكتىكتەگى بازالىق لاگەرگە كوتەرىلۋدى جوسپارلاۋدا جانە جاياۋ ىزدەستىرۋ جۇمىستارى جالعاسۋدا.

قر قورعانىس مينيسترلىگى ءباسپاسوز قىزمەتىنىڭ مالىمەتى بويىنشا قۇتقارۋ توبىندا – كاپيتان ماقسۇت جۇماەۆ، مايور امانجول راحمەتوۆ، توپ باسشىسى – اعا لەيتەنانت ۆاسيلي پيۆتسوۆ بار.

«اتالعان وپەراتسيا اۋا-رايىنىڭ ناشارلىعىنا بايلانىستى كۇردەلەنۋدە. مۇنداي بيىكتىكتە جۇمىس جاساۋ ءۇشىن كۇن-رايىنا بەيىمدەلگەن قۇتقارۋشىلاردى جىبەرۋ اسا ماڭىزدى. بۇل وپەراتسيادا ەۋروپاداعى بيىك شىڭداردى باعىندىرىپ جۇرگەن، رەسەيدە وتكەن «ەلبرۋس شەڭبەرى-2019» حالىقارالىق سايىسىنا قاتىسۋشىلارى جۇمىلۋدا»، – دەپ حابارلادى قورعانىس مينيسترلىگىنىڭ ءباسپاسوز قىزمەتى. قازاقستاننىڭ تج كوميتەتى حابارلاعانداي، تاۋ جاقتا بۇگىن دە قار جاۋىپ تۇر.

"The Qazaq Times"