Bügin, 24 şildede Semey qalasınıñ №2 sotı "Qazatomönerkäsip" wlttıq kompaniyasınıñ bwrınğı prezidenti Mwhtar Jäkişevtiñ merziminen bwrın bosatu turalı ötinişin qarap, qanağattandırmadı - dep habarlaydı Azattıq radiosı. 

Sot şeşimin oqığan sud'ya Ermek Şımırov sottaluşı Mwhtar Jäkişevtiñ memleket aldında 99 milliard teñgeden astam qarızı bar ekenin, mwnday jağdayda sottaluşı merziminen bwrın bosap şığa almaydı dedi. Ol Jäkişevtiñ bwğan deyin jeti "ıntalandıruğa" ie bolğanın, biraq bwğan sottaluşı twraqtı türde qol jetkizbegenin ayttı. Ol Jäkişevtiñ densaulığı qattı naşarlap, mügedektik alğanğa deyin memleket aldında qarızın öteuge tırıspağanın atap ötti. Qorğau tarabınıñ sot şeşimin 15 kün işinde apellyaciyağa bere alatının ayttı.

Sotqa jinalğan azamattar sot ükimi oqılğan soñ "Masqara!" dep ayqayladı. Olar sot şeşimin ädiletsiz dep bağalap, sud'yağa swraqtar jaudırdı.

Bıltır 28 qaraşada birinşi ret tüsirgen arızın Semeydiñ №2 sotı qanağattandırmağan edi. Sottıñ habarlauınşa, bwğan sottaluşınıñ "şığındı ötemeui sebep bolğan". Sot ökili sol küni Azattıqqa Jäkişevtiñ şığındı kimge jäne qanşa kölemde öteui kerektigi jaylı aqparattıñ "qwpiya" ekenin jetkizgen. Degenmen bir künnen keyin Semeydegi №2 sottıñ sud'yası Nwrlan Nwralinov jergilikti aqparat agenttikterine bergen swhbatında "Mwhtar Jäkişev keltirgen şığın kölemi 99,6 milliard teñge" ekeni, "osı künge deyin ol bir tiın tölemegenin" aytqan.

Al Mwhtar Jäkişevtiñ advokatı Nwrlan Beysekeev türmede üşinşi top mügedektigi tağayındalğan twtqınnıñ jwmıs isteuge mümkindigi joq ekenin aytıp, sot şeşimi joğarğı sot qaulısına qayşı dep aytqan.

55 jastağı Mwhtar Jäkişev 2009 jılı mamırda wstalğan soñ sıbaylas jemqorlıq qılmısın jasadı dep ayıptalıp, 14 jılğa sottalğan. Qazir ol jazasın Semey qalasındağı qatañ rejimdegi koloniyada ötep jatır.

Bwğan deyin Mwhtar Jäkişev häl üstinde jatqan anası – Raisa Jäkişevamen kezdesuge, keyin anası qaytıs bolğanda jerleuge jiberuge ötiniş jasağan. Biraq türme basşılığı ekeuinde de oğan rwqsat bermedi. Qılmıstıq atqaru jüyesi komiteti mwnı Qılmıstıq-atqaru kodeksiniñ "Mekemeniñ şeginen tıs jerge şığu" turalı 113-babınıñ 5-tarmağımen tüsindirgen. Bwl tarmaqta "qılmıstıq top qwramında jasalğan qılmıstarmen sottalğandarğa sırtqa şığuğa rwqsat berilmeydi" dep jazılğan.

"The Qazaq Times"