بۇگىن، 24 شىلدەدە سەمەي قالاسىنىڭ №2 سوتى "قازاتومونەركاسىپ" ۇلتتىق كومپانياسىنىڭ بۇرىنعى پرەزيدەنتى مۇحتار جاكىشەۆتىڭ مەرزىمىنەن بۇرىن بوساتۋ تۋرالى ءوتىنىشىن قاراپ، قاناعاتتاندىرمادى - دەپ حابارلايدى ازاتتىق راديوسى. 

سوت شەشىمىن وقىعان سۋديا ەرمەك شىمىروۆ سوتتالۋشى مۇحتار جاكىشەۆتىڭ مەملەكەت الدىندا 99 ميلليارد تەڭگەدەن استام قارىزى بار ەكەنىن، مۇنداي جاعدايدا سوتتالۋشى مەرزىمىنەن بۇرىن بوساپ شىعا المايدى دەدى. ول جاكىشەۆتىڭ بۇعان دەيىن جەتى "ىنتالاندىرۋعا" يە بولعانىن، بىراق بۇعان سوتتالۋشى تۇراقتى تۇردە قول جەتكىزبەگەنىن ايتتى. ول جاكىشەۆتىڭ دەنساۋلىعى قاتتى ناشارلاپ، مۇگەدەكتىك العانعا دەيىن مەملەكەت الدىندا قارىزىن وتەۋگە تىرىسپاعانىن اتاپ ءوتتى. قورعاۋ تارابىنىڭ سوت شەشىمىن 15 كۇن ىشىندە اپەللياتسياعا بەرە الاتىنىن ايتتى.

سوتقا جينالعان ازاماتتار سوت ۇكىمى وقىلعان سوڭ "ماسقارا!" دەپ ايقايلادى. ولار سوت شەشىمىن ادىلەتسىز دەپ باعالاپ، سۋدياعا سۇراقتار جاۋدىردى.

بىلتىر 28 قاراشادا ءبىرىنشى رەت تۇسىرگەن ارىزىن سەمەيدىڭ №2 سوتى قاناعاتتاندىرماعان ەدى. سوتتىڭ حابارلاۋىنشا، بۇعان سوتتالۋشىنىڭ "شىعىندى وتەمەۋى سەبەپ بولعان". سوت وكىلى سول كۇنى ازاتتىققا جاكىشەۆتىڭ شىعىندى كىمگە جانە قانشا كولەمدە وتەۋى كەرەكتىگى جايلى اقپاراتتىڭ "قۇپيا" ەكەنىن جەتكىزگەن. دەگەنمەن ءبىر كۇننەن كەيىن سەمەيدەگى №2 سوتتىڭ سۋدياسى نۇرلان نۇرالينوۆ جەرگىلىكتى اقپارات اگەنتتىكتەرىنە بەرگەن سۇحباتىندا "مۇحتار جاكىشەۆ كەلتىرگەن شىعىن كولەمى 99,6 ميلليارد تەڭگە" ەكەنى، "وسى كۇنگە دەيىن ول ءبىر تيىن تولەمەگەنىن" ايتقان.

ال مۇحتار جاكىشەۆتىڭ ادۆوكاتى نۇرلان بەيسەكەەۆ تۇرمەدە ءۇشىنشى توپ مۇگەدەكتىگى تاعايىندالعان تۇتقىننىڭ جۇمىس ىستەۋگە مۇمكىندىگى جوق ەكەنىن ايتىپ، سوت شەشىمى جوعارعى سوت قاۋلىسىنا قايشى دەپ ايتقان.

55 جاستاعى مۇحتار جاكىشەۆ 2009 جىلى مامىردا ۇستالعان سوڭ سىبايلاس جەمقورلىق قىلمىسىن جاسادى دەپ ايىپتالىپ، 14 جىلعا سوتتالعان. قازىر ول جازاسىن سەمەي قالاسىنداعى قاتاڭ رەجيمدەگى كولونيادا وتەپ جاتىر.

بۇعان دەيىن مۇحتار جاكىشەۆ ءحال ۇستىندە جاتقان اناسى – رايسا جاكىشەۆامەن كەزدەسۋگە، كەيىن اناسى قايتىس بولعاندا جەرلەۋگە جىبەرۋگە ءوتىنىش جاساعان. بىراق تۇرمە باسشىلىعى ەكەۋىندە دە وعان رۇقسات بەرمەدى. قىلمىستىق اتقارۋ جۇيەسى كوميتەتى مۇنى قىلمىستىق-اتقارۋ كودەكسىنىڭ "مەكەمەنىڭ شەگىنەن تىس جەرگە شىعۋ" تۋرالى 113-بابىنىڭ 5-تارماعىمەن تۇسىندىرگەن. بۇل تارماقتا "قىلمىستىق توپ قۇرامىندا جاسالعان قىلمىستارمەن سوتتالعاندارعا سىرتقا شىعۋعا رۇقسات بەرىلمەيدى" دەپ جازىلعان.

"The Qazaq Times"