Resey Sarışağan poligonında zımırannan qorğanu jüyesiniñ (ZQJ) jaña raketasın sınaqtan ötkizdi. Bwl turalı Resey Qorğanıs ministrligi habarladı.

Resey Qorğanıs ministrligine qarastı äue-ğarıştıq küşiniñ polkovnigi Pavel Kuz'min «jaña raketa sınaqtan sätti ötkenin» habarladı. Ministrlik dereginşe, jaña zımıran ğarıştan jäne aspannan jasalğan şabuıldardan qorğauğa arnalğan jäne sınaq kezinde ol Sarışağandağı şarttı nısanğa däl tigen. Resmi habarlamada zımırannıñ qaşan sınalğanı aytılmağan. Reseylik jergilikti aqparat qwraldarı instagram paraqşalarında zımıran qorğanıs jüyesiniñ sätti sınalğanın jäne bwl «ülken jetistik» ekenin jazğan.

Qarağandı oblısındağı Sarışağan poligonınıñ bir böligin Resey 1996 jılı Qazaqstanmen jasalğan kelisim boyınşa jalğa alğan. Poligonnıñ qalğan böligin Qazaqstan paydalanadı. Sol kezden bastap Resey Sarışağan poligonındağı şarttı nısanağa bağıttap jii zımıran atadı. Birneşe ret Resey qorğanıs ministrligi Qazaqstanmen şekaradağı Astrahan oblısında ornalasqannan poligonnan «Topol'» qwrlıqaralıq ballistikalıq zımıranın sınaqtan ötkizgen. Sınaq kezinde zımıran Sarışağan poligonındağı şarttı nısananı atıp tüsirgen.

Biıl Qazaqstan üşin «tar jol, tayğaq keşken» jıl bolğanı belgili. Bwlay deuimizge jıl basınan beri jalğasın tauıp kele jatqan sätsiz oqiğalar, tayauda ğana Arısta bolğan jarılıs dälel. Qazaqstan halqı osınday qıspaqtı kezeñderdi bastan ötkerip otırğanda, Resey tarabı halıq qarsılığına qaramastan, qazaq jerine tiesili aumaqtarda zımıranın sınaqtan ötkizip, jergilikti BAQ-tarda «quanıştı habar» taratıp jür. Mäselen, Resey qarulı küşteri 2017 jıldıñ qırküyeginde «Batıs-2017» äskeri oqu-jattığu jwmıstarı ayasında Kapustin YAr sınaq alañınan «Eskendir-M» zımıranın wşırğan bolatın. Joğarı quattı «Eskendir-M» zımıranı 480 şaqırım wşıp Qazaqstan aumağındağı Maqat poligonına kelip qwlağan. Himiyalıq qosındınıñ zardabı qarapayım halıq tartıp otır. Al bwl jağdaylar «şıdamnıñ şegine jetkende», soñı jaqsılıqqa aparması anıq.

"The Qazaq Times"