كورنەكى سۋرەت. فوتو: https://img.gazeta.ru

رەسەي سارىشاعان پوليگونىندا زىمىراننان قورعانۋ جۇيەسىنىڭ (زقج) جاڭا راكەتاسىن سىناقتان وتكىزدى. بۇل تۋرالى رەسەي قورعانىس مينيسترلىگى حابارلادى.

رەسەي قورعانىس مينيسترلىگىنە قاراستى اۋە-عارىشتىق كۇشىنىڭ پولكوۆنيگى پاۆەل كۋزمين «جاڭا راكەتا سىناقتان ءساتتى وتكەنىن» حابارلادى. مينيسترلىك دەرەگىنشە، جاڭا زىمىران عارىشتان جانە اسپاننان جاسالعان شابۋىلداردان قورعاۋعا ارنالعان جانە سىناق كەزىندە ول سارىشاعانداعى شارتتى نىسانعا ءدال تيگەن. رەسمي حابارلامادا زىمىراننىڭ قاشان سىنالعانى ايتىلماعان. رەسەيلىك جەرگىلىكتى اقپارات قۇرالدارى ينستاگرام پاراقشالارىندا زىمىران قورعانىس جۇيەسىنىڭ ءساتتى سىنالعانىن جانە بۇل «ۇلكەن جەتىستىك» ەكەنىن جازعان.

قاراعاندى وبلىسىنداعى سارىشاعان پوليگونىنىڭ ءبىر بولىگىن رەسەي 1996 جىلى قازاقستانمەن جاسالعان كەلىسىم بويىنشا جالعا العان. پوليگوننىڭ قالعان بولىگىن قازاقستان پايدالانادى. سول كەزدەن باستاپ رەسەي سارىشاعان پوليگونىنداعى شارتتى نىساناعا باعىتتاپ ءجيى زىمىران اتادى. بىرنەشە رەت رەسەي قورعانىس مينيسترلىگى قازاقستانمەن شەكاراداعى استراحان وبلىسىندا ورنالاسقاننان پوليگوننان «توپول» قۇرلىقارالىق بالليستيكالىق زىمىرانىن سىناقتان وتكىزگەن. سىناق كەزىندە زىمىران سارىشاعان پوليگونىنداعى شارتتى نىسانانى اتىپ تۇسىرگەن.

بيىل قازاقستان ءۇشىن «تار جول، تايعاق كەشكەن» جىل بولعانى بەلگىلى. بۇلاي دەۋىمىزگە جىل باسىنان بەرى جالعاسىن تاۋىپ كەلە جاتقان ءساتسىز وقيعالار، تاياۋدا عانا ارىستا بولعان جارىلىس دالەل. قازاقستان حالقى وسىنداي قىسپاقتى كەزەڭدەردى باستان وتكەرىپ وتىرعاندا، رەسەي تارابى حالىق قارسىلىعىنا قاراماستان، قازاق جەرىنە تيەسىلى اۋماقتاردا زىمىرانىن سىناقتان وتكىزىپ، جەرگىلىكتى باق-تاردا «قۋانىشتى حابار» تاراتىپ ءجۇر. ماسەلەن، رەسەي قارۋلى كۇشتەرى 2017 جىلدىڭ قىركۇيەگىندە «باتىس-2017» اسكەري وقۋ-جاتتىعۋ جۇمىستارى اياسىندا كاپۋستين يار سىناق الاڭىنان «ەسكەندىر-م» زىمىرانىن ۇشىرعان بولاتىن. جوعارى قۋاتتى «ەسكەندىر-م» زىمىرانى 480 شاقىرىم ۇشىپ قازاقستان اۋماعىنداعى ماقات پوليگونىنا كەلىپ قۇلاعان. حيميالىق قوسىندىنىڭ زاردابى قاراپايىم حالىق تارتىپ وتىر. ال بۇل جاعدايلار «شىدامنىڭ شەگىنە جەتكەندە»، سوڭى جاقسىلىققا اپارماسى انىق.

"The Qazaq Times"