Bügin sağat 11-ge tayau Şımkent qalası «Aqmeşit» ortalıq meşiti mañına jinalğan arıstıq azamattar qalalıq negizgi küre joldardıñ biri – Temirlan tas jolın jauıp tastadı. Narazılar oblıs äkimi Ö.Şökeevtiñ kelip, jwrttıñ swraqtarına jauap berudi talap etken. Sağat tüski 12-ge tarta qala äkimi Ğabidolla Äbdirahımov kelip narazı arıstıqtarğa barlığı baqılauda ekenin, jağdaydıñ retteletinin ayttı jäne jwrttı köşeni bosatıp, «Aqmeşitke» kirip söylesuge şaqırdı. Jinalğan jwrttıñ bir böligi äkimge ilesip meşit işine kirse, ekinşi jartısı jol üstinde tapjılmay twrdı.

Meşit işinde mikrofonmen birneşe swraq-jauap barısında narazılardıñ keybiri «Biz onda (Arıs q.) qayta oralğımız kelmeydi, Şımkent ya Türkistan mañınan jer bersin», «Qaşan tağı töbemizde ot oynaydı eken dep kütemiz be?», «Sonşalıq köp qarudı 4-5 künde qalayşa köşirip, apta soñında üyleriñizge qaytasızdar deysizder?» degen uäjderin aytıp jattı.  Qala äkimi Äbdirahımov sözinde: «Şımkent qalasında 150 mıñğa juıq ärtürli äleumettik toptağı twrğındar bar. Olar da adam, olar da on jıldan beri kütip otır», – degen jauabın ayttı. Qala äkimi Arıs aglomeraciyası jayında  Taşkent qalasınıñ 60-jıldardağı jer silkinisinen qirap qalğanın mısal etip söyley bastap edi, narazı köpşilik şu-şwrqanğa basıp, din ökilderi meşitte qwran oqıp, jwrttı sabırğa şaqıruğa mäjbür boldı.

Sağat 12:40-tan asqanda oqiğa ornına Türkistan oblısınıñ äkimi Ömirzaq Şökeev keldi. Bwl jolı da eldiñ bir böligi oblıs äkimine ilesip «Aqmeşit» meşitiñ kişi zalına jinaldı. 20 minutqa deyin mikrofon bolmağandıqtan, ayqay-şu arasında äkim men jwrtşılıq dwrıs pikir almasa almadı. Bwdan soñ Ö.Şökeev «Arısta radiaciyalıq qauip joq», «Qala qayta qalpına keltiriledi» dedi. Sonday-aq Arısta twrğısı kelmeytin twrğındar aldağı uaqıtta üylerin satıp ketse bolatının ayttı. Köpşilik bwl jolı da ortaq kelisimge kele almadı.

Qazir jüzdegen arıstıqtar Temirlan tas jolı boyımen Şımkent qalası Äkimdigine qaray şeruletip bara jatır. Jiınnıñ belgili bir liderleri bayqalmaydı, halıq özdiginen wyımdasıp jatır. Tüsten keyin sağat 14:30 şamasında  aua temperaturası 35 gradustı körsetip twr.

Ayta keteyik, bügingi narazı arıstıq azamattardıñ qarsılıq akciyasında osı oqiğağa baylanıstı özderine «Şımkent qalası nemese Türkistan mañınan jer-üy berilse» degen pikir öte jii aytıluda. Narazı jwrttıñ aynalasında qauipsizdik qızmetkerleri de jür. Jwrtşılıq "Arıs köşirilsin!" dep birneşe ret wran salğanın da estidik. Şeru jasağan top künniñ ıstığına qaramastan "Aqmeşit"-ten 6 şaqırım qaşıqtıqtağı "Beybitşilik" jäne Ğ. Ilyaev köşeleriniñ qiılısındağı "Nwr Ortan" partiyasınıñ ğimaratı aldına barğan.

Qala twrğındarı jol boyında narazı jwrtqa salqın suların taratıp jatqanın kördik. Sonday-aq, şerudegi jwrt bir-birin arandatuğa jol bermeuge, eşbir dünie-mülikti qiratpauğa şaqırıp jatqanın da ayta ketu kerek.

Däl qazirgi jetken aqparatqa qarağanda, Şeruge şıqqan arıstıqtar qala ortalığındağı B.Momışwlı dañğılı men "Respublika" köşesiniñ qiılısında ayaldauda.

“The Qazaq Times”