Foto: http://panarin.com

Qazaqstandağı kezekten tıs prezidenttik saylaudı baqılau üşin TMD elderinen 432 bayqauşı keldi.

Integraciyalıq qwrılımnan kelgen top öñirlerdi aralap, kandidattardıñ ügit-nasihat jwmıstarın baqıladı. Osı rette TMD bayqauşılar missiyasınıñ basşısı Sergey Lebedev: «Biz bwl jerge saylau aldında jäne saylau barısında qanday da bir kemşilikterdi izdeuge kelgen joqpız. Qayta Qazaqstandağı dostarımız ben äriptesterimizge qoldau körseteyik dep keldik. Dese de, eldiñ işki isterine aralaspau qağidasın wstanamız. Eñ bastısı, sayasi process kezinde zañnıñ orındaluın jan-jaqtan baqılamaqpız», – deydi.

Şeteldik baqılauşılardan bölek, saylau kezinde aqparat taratatın jurnalister de resmi akkreditaciyadan ötti. QR SİM tarabınıñ habarlauınşa, twraqtı negizde 40-tan astam elden 227 şeteldik korrespondent tirkelgen. 2015 jılğı saylauda bwl san 168 bolğan.  Şeteldik jurnalister Qazaqstannıñ sırtqı sayasi vedomstvolarınıñ bergen twraqtı nemese uaqıtşa akkreditteu turalı kuäligi bolğanda ğana saylauğa baqılau jasay aladı.

Ayta keteyik, Qazaqstanda kezekten tıs prezidenttik saylau 9 mausımda ötedi. 8 mausım – tınıştıq küni. Biıl QR OSK jeti kandidattı tirkedi. Olardıñ işinde «Nur Otan» partiyasınan Qasım-Jomart Toqaev, «Wlt tağdırı» wlttıq-patriottıq qozğalısı wsınğan kandidat Ämirjan Qosanov, «Auıl» halıqtıq-demokratiyalıq patriottıq partiyasınan Töleutay Rahımbekov, Qazaqstannıñ kommunister partiyasınan Jambıl Ahmetbekov, «Wlı dala qırandarı» respublikalıq qozğalısınan Sädi-Bek Tügel, Qazaqstan Respublikasınıñ käsipodaqtar federaciyasınan Amangeldi Taspihov jäne «Aq jol» Qazaqstannıñ demokratiyalıq partiyasınan Daniya Espaeva bar.

"The Qazaq Times"