فوتو: http://panarin.com

قازاقستانداعى كەزەكتەن تىس پرەزيدەنتتىك سايلاۋدى باقىلاۋ ءۇشىن تمد ەلدەرىنەن 432 بايقاۋشى كەلدى.

ينتەگراتسيالىق قۇرىلىمنان كەلگەن توپ وڭىرلەردى ارالاپ، كانديداتتاردىڭ ۇگىت-ناسيحات جۇمىستارىن باقىلادى. وسى رەتتە تمد بايقاۋشىلار ميسسياسىنىڭ باسشىسى سەرگەي لەبەدەۆ: «ءبىز بۇل جەرگە سايلاۋ الدىندا جانە سايلاۋ بارىسىندا قانداي دا ءبىر كەمشىلىكتەردى ىزدەۋگە كەلگەن جوقپىز. قايتا قازاقستانداعى دوستارىمىز بەن ارىپتەستەرىمىزگە قولداۋ كورسەتەيىك دەپ كەلدىك. دەسە دە، ەلدىڭ ىشكى ىستەرىنە ارالاسپاۋ قاعيداسىن ۇستانامىز. ەڭ باستىسى، ساياسي پروتسەسس كەزىندە زاڭنىڭ ورىندالۋىن جان-جاقتان باقىلاماقپىز»، – دەيدى.

شەتەلدىك باقىلاۋشىلاردان بولەك، سايلاۋ كەزىندە اقپارات تاراتاتىن جۋرناليستەر دە رەسمي اككرەديتاتسيادان ءوتتى. قر ءسىم تارابىنىڭ حابارلاۋىنشا، تۇراقتى نەگىزدە 40-تان استام ەلدەن 227 شەتەلدىك كوررەسپوندەنت تىركەلگەن. 2015 جىلعى سايلاۋدا بۇل سان 168 بولعان.  شەتەلدىك جۋرناليستەر قازاقستاننىڭ سىرتقى ساياسي ۆەدومستۆولارىنىڭ بەرگەن تۇراقتى نەمەسە ۋاقىتشا اككرەديتتەۋ تۋرالى كۋالىگى بولعاندا عانا سايلاۋعا باقىلاۋ جاساي الادى.

ايتا كەتەيىك، قازاقستاندا كەزەكتەن تىس پرەزيدەنتتىك سايلاۋ 9 ماۋسىمدا وتەدى. 8 ماۋسىم – تىنىشتىق كۇنى. بيىل قر وسك جەتى كانديداتتى تىركەدى. ولاردىڭ ىشىندە «Nur Otan» پارتياسىنان قاسىم-جومارت توقاەۆ، «ۇلت تاعدىرى» ۇلتتىق-پاتريوتتىق قوزعالىسى ۇسىنعان كانديدات ءامىرجان قوسانوۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلى دالا قىراندارى» رەسپۋبليكالىق قوزعالىسىنان ءسادى-بەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپاەۆا بار.

"The Qazaq Times"