Foto: https://tengrinews.kz

Wlıbritaniyada Qazaqstanda ötetin kezekten tıs prezidenttik saylau talqılandı.

Qazaqstannıñ Britaniyadağı elşisi Erlan Idırısov jergilikti sayasi jäne biznes elita, sonday-aq BAQ ökilderine kezekten tıs prezidenttik saylaudıñ qazaqstandıqtar üşin mañızın jäne oğan dayındıq turalı äñgimeledi. Kezdesu Wlıbritaniyadağı sayasat pen biznestegi köşbasşılardıñ basın biriktiretin ortalıq – London direktorlar institutında ötken. Basqosu kezinde Qazaqstandağı reformalar men aldağı saylauğa dayındıq şaraları talqılanğan.

CMS Cameron Mckenna Nabarro Olswang LLP kompaniyasınıñ keñesşisi Trevor Barton: «Elşi saylau ötkizudiñ erejeleri turalı ayttı. Biz nauqannıñ demokratiyalıq normalarğa tolıq jauap beretindigin tüsindik. Birneşe kandidat bar eken. Saylau nätijelerin asığa kütetin bolamız jäne ädil saylau ötedi degen oydamız», – deydi.

Ayta keteyik, biıl kezekten tıs prezidenttik saylau 9 mausımda ötedi. Osı jolı QR OSK jeti kandidattı tirkedi. Olardıñ işinde «Nur Otan» partiyasınan Qasım-Jomart Toqaev, «Wlt tağdırı» wlttıq-patriottıq qozğalısı wsınğan kandidat Ämirjan Qosanov, «Auıl» halıqtıq-demokratiyalıq patriottıq partiyasınan Töleutay Rahımbekov, Qazaqstannıñ kommunister partiyasınan Jambıl Ahmetbekov, «Wlı dala qırandarı» respublikalıq qozğalısınan Sädi-Bek Tügel, Qazaqstan Respublikasınıñ käsipodaqtar federaciyasınan Amangeldi Taspihov jäne «Aq jol» Qazaqstannıñ demokratiyalıq partiyasınan Daniya Espaeva bar.

"The Qazaq Times"